დღევანდელი დღე სასიხარულოცაა და სევდიანიც, რადგან სპორტიდან ვაცილებთ ასეთ ვარსკვლავებს. ვფიქრობთ, არა მხოლოდ ქართული სპორტის, არამედ მთლიანად საქართველოს ისტორიას შემორჩება - 1981 წელს ვიტალი დარასელიას მიერ გატანილი გოლი თასების მფლობელთა თასის ფინალში და ზვიადაურის ზეაწეული თითი 2004 წელს ათენის ოლიმპიადის ფინალში - ზურაბ ზვიადაურისა და ნესტორ ხერგიანის გაცილების საზეიმო ცერემონიალზე საქართველოს ეროვნული ოლიმპიური კომიტეტის პრეზიდენტ გია ნაცვლიშვილის მიერ წარმოთქმული ეს სიტყვებიც, ალბათ, ბევრს მოჰგვრიდა სევდას ასეთი დონის სპორტსმენთა წასვლის გამო. თან იმ ბედნიერ წუთებს კიდევ ერთხელ გაახსენებდა მთელი სიცხადით...დიდ
''სპორტიდან წასვლა ნებისმიერი სპორტსმენისთვის ძნელია. გული მწყდება, ასე რომ მოხდა. გული მწყდება იმაზეც, რომ სპორტში გაცილებით მეტის მიღწევა შემეძლო. დიდი მადლობა მთელ ერს, ჩემს ქომაგს, განსაკუთრებით კი საქართველოს კათოლიკოს-პატრიარქს. ალბათ, გახსოვთ ის 4 წამი ათენის ოლიმპიადის ნახევარფინალში ფრანგ ფრედერიკ დემონფოკონთან – მაშინ ღმერთის ნება იყო, მეტოქე რომ გააფრთხილეს'', - განაცხადა ზვიადაურმა.
''ძალიან დიდი მადლობა ყველა ქართველს, თითოეულ ქომაგს, ვინც მთელი ეს წლები გვგულშემატკივრობდა'', - თქვა ხერგიანმა.
ზვიადაურისა და ხერგიანის გაცილება თბილისის სპორტის სასახლეში დღეს დაწყებულ ვაჟ ძიუდოისტთა მსოფლიოს თასზე შედგა. როგორც ასეთ ცერემონიალს შეეფერება, იყო უამრავი მილოცვა, ტაში და თბილი სიტყვები. ნაცვლიშვილის გარდა, მათ სპორტისა და ახალგაზრდობის საქმეთა მინისტრი ვლადიმერ ვარძელაშვილი, ძიუდოს საერთაშორისო ფედერაციის პრეზიდენტი მარიუს ვიზერი, საქართველოს ძიუდოს ფედერაციის პრეზიდენტის მოვალეობის შემსრულებელი გიორგი ალექსიძე მიესალმნენ.
გამომსვლელებმა არაერთგზის აღნიშნეს ამ ფალავანთა დამსახურება არა მხოლოდ ქართული, მსოფლიოს ძიუდოს წინაშე და გამოთქვეს სინანული სპორტიდან მათი წასვლის შესახებ. ითქვა, რომ ზვიადაური განსაკუთრებული ტალანტი იყო, ხერგიანი კი გაცილების შემდეგაც დარჩება მისაბაძი მაგალითი, როგორც უაღრესად პროფესიონალი, შრომისმოყვარე და დისციპლინირებული სპორტსმენი.
გამომსვლელები იმით ინუგეშებდნენ თავს, რომ ორივე რჩება ქართულ ძიუდოში და ამჯერად მწვრთნელის რანგში აგრძელებენ მუშაობას. ზვიადაურსა და ხერგიანს გადაეცათ სეოკ-ის ოქროს მედალი. ისინი მედლებით ვარძელაშვილმა და ვიზერმაც დაასაჩუქრეს. მედალი მიიღო თავად ვიზერმაც – სეოკ-მა დააჯილდოვა იმ სამსახურისთვის, რაც "თბილისი-2015" საარჩევნო კამპანიისას გააკეთა და რასაც მანამდე ქართული ძიუდოსთვის აკეთებდა.
.
