ტოჩინოშინი დასაჯეს

სუმოს კლუბ "კასუგანო ბეიას" ხელმძღვანელობამ მკაცრად დასაჯა ქართველი ფალავანი ლევან გორგაძე (ტოჩინოშინი) - ის, თვის ბოლომდე ჩამოაცილეს დოჰიოზე ვარჯიშს. არადა, 24 წლის ქართველს ნოემბრის ბაშოზე, რომელიც 13 რიცხვში კუნძულ კიუშუზე იწყება, დიდი ბრძოლები ელის, რადგან ელიტაში კვლავ დაწინაურდება (ახალი რეიტინგი ოქტომბრის ბოლოს გამოქვეყნდება). ტოჩინოშინს შეუძლია ივარჯიშოს ჩვეულად, მაგრამ სპარინგები აკრძალული აქვს, რადგან სავარჯიშო დოჰიოზე ფეხის შედგმის უფლება არა აქვს.

სიმკაცრით განთქმული კასუგანო ამბობს, რომ მზადაა ერთი ბაშო შესწიროს შეგირდის მომავალს. თურმე ქართველმა ბოლო დროს შრომას უკლო, საკუთარი თავის მიმართ ნაკლებად მომთხოვნი გახდა, შეჯიბრებებზე ხშირად გაურბის ორთაბრძოლებს, რის გამოც ისეთ რიკიშებთან მარცხდება, რომლებიც მასზე ნაკლებად ნიჭიერები არიან.

კასუგანოს არ მოსწონს ქართველი სკოლის გარეთ სპორტულ ტანისამოსში, ან სულაც მაისურებში გამოწყობილი რომ დადის, მაშინ როცა დაუწერელი კანონით, სუმოისტებს კიმონო უნდა ეცვათ, როცა ხალხში გადიან.

კასუგანოს მოთმინების ფიალა კი 12 ოქტომბერს ავსებულა, როცა ლევანს დაბადების დღე ჰქონდა და ორ თანაგუნდელთან ერთად სკოლაში შუაღამის მერე დაბრუნდა. არადა, სკოლის კარი საღამოობით 22:30-ზე იკეტება. ამას მოჰყოლია გოლფის ყვანჯით სამივეს დასჯა, რამაც იაპონიაში დიდი სკანდალი გამოიწვია. კასუგანომ ტოჩინოშინს ესეც არ აკმარა და რადგან ინციდენტის შემდეგ კარი გაიჯახუნა და სკოლაში 2 დღე არ დაბრუნებულა, მკაცრად დასაჯა - დოჰიოს ჩამოაცილა.

ყოველდღიური სპორტული გაზეთი "ლელო"