შავი ზღვა აბობოქრდა

ნაგოიას ბაშოს მესამედი უკვე გაილია, ლიდერთა ცხრაკაციან ჯგუფში (4 დაუმარცხებელი და 5 თითო მარცხით) ქართველი კოკაიც (ლევან ცაგურია) არის. კოკაის ძველებური გალაღება სასიამოვნო მოულოდნელობაა, რადგან ბოლო დროს ჩვენებურს ერთობ უჭირდა ელიტაში თავის შემაგრება, ახლაც "შავი ზღვა" მისთვის შეუფერებელ, მე-12 მაეგაშირას რანგს ატარებს. ევროპის პირველი ელიტელი სუმოისტი 4-1 ბალანსით იწონებს თავს. აი, სხვა ქართველები კი ვერ გვახარებენ...

22 წლის ლევან გორგაძე (ტოჩინოშინი) პირველად ასპარეზობს კომუსუბის რანგით, მაგრამ თუ კარდინალურად არ გამოასწორა მდგომარეობა, აგვისტოში მას ისევ რიგით მაეგაშირად მოუწევს დაქვეითება. გუშინდელი მარცხის

შემდეგ ტოჩინოშინს შემაშფოთებელი ბალანსი აქვს - 1-4. ქართველის მეტოქე ვეტერანი ოძეკი კაიო გახლდათ, რომელმაც კარიერაში 1004-ე (!) გამარჯვება იზეიმა. ნაგოიას ბაშოს დასრულებისას კაიო 38 წლისა გახდება, უკვე 5-6 წელიწადია მის სპორტიდან წასვლაზე ლაპარაკობენ, მაგრამ ჩემპიონს ახლაც კი არაფერი ეტყობა საამისო - გუშინ, მან 16 წლით უმცროსი ტოჩინოშინი უვატედაშინაგეს უზადო ილეთით წაგვიქცია. დღეს ლევანი ესტონელ ოძეკი ბარუტოს (3-2) გაეჯიბრება კარიერაში მეოთხედ, აქამდე ყველა ცდა ქართველის მარცხით დასრულდა.

კოკაის წინააღმდეგ დოჰიოზე მე-16 მაეგაშირა შოტენრო დადგა, ქართველმა ჰენკას (სასტარტო დაჯახების თავიდან არიდება) მიმართა და გაუმართლდა - მარჯვენა გვერდიდან მოექცა "ციურ მგელს" და ის რკალიდან განდევნა. დღეს მისი მეტოქე მე-9 მაეგაშირა შიმოტორი (2-3) იქნება. ურთიერთშეხვედრებში "შავი ზღვა" 6:5-ს იგებს.
202-კილოგრამიანი გაგამარუ (თეიმურაზ ჯუღელი) ჰენკას დიდოსტატ კიმურაიამას

ინააღმდეგ დადგა. ნუთუ არავინ უთხრა გაგამარუს ამის შესახებ, ან თავად წინა დღის ბრძოლა არ ნახა კოკაის და კიმურაიამას შორის? ფაქტია, ელიტის ყველაზე მძიმე რიკიში დაბალი დგომიდან ბულდოზერივით გამოექანა და მთელი სიჩქარით "გაფრინდა" მაყურებელთა დარბაზში ისე რომ არავინ შეხებია, მოხერხებულმა კიმურაიამამ კი ზედიზედ მეორე ქართველი დაგვიმარცხა. გაგამარუს 2-3 ბალანსი აქვს, საგანგაშო არაფერია - ის ჯერ ადაპტაციას გადის ელიტაში. მაკუუჩის დივიზიონში კარიერის მე-6 ორთაბრძოლას გაგამარუ ტამაასუკას წინააღმდეგ გამართავს, რომელთან ერთადაც გადმოვიდა ძურიოს დივიზიონიდან, თანაც მაისის ბაშოზე დაამარცხა იაპონელი.
ნაგოიას ბაშოზე ოთხი დაუმარცხებელი რიკიშია. გამარჯვების (ვერ ვიტყვით იმპერატორის თასის პრეტენდენტიო, რადგან ცნობილი სკანდალის გამო ბაშოზე გამარჯვებულს თასს არ გადასცემენ) უმთავრესი ფავორიტი მონღოლი ჰაკუჰოა, რომელსაც აგერ უკვე 37 შეხვედრაა არ წაუგია. გუშინ დიდმა ჩემპიონმა ცაციათი ჩვენებური მოგვერდი შეასრულა და ისე დაამარცხა "მატადორი" ამინიშიკი, რომელსაც აქამდე სამჯერ მოუგია ჰაკუჰოსთვის.

ივლისის ბაშო. 11-25 ივლისი. ნაგოია (იაპონია)
V დღე: ჰაკუჰო-ამინიშიკი (უვატენაგე), ბარუტო-კიოკუტენჰო (იორიკირი), ჰარუმაფუჯი-ასასეკირიუ (იორიკირი), კოტოოშუ-ტოჩიოძანი (იორიკირი), კაიო-ტოჩინოშინი (უვატედაშინაგე), კისენოსატო-კოტოშოგიკუ (ჰატაკიკომი), ჰაკუბა-არანი (იორიკირი), ტოკიტენკუ-იოშიკაძე (ჰატაკიკომი), კიტატაიკი-შიმოტორი (იორიკირი), კაკურიუ-კაკიძოე (ცუკიდაში), ტაკეკაძე-ვაკანოსატო (ოშიდაში), ტოკუსეგავა-ტაკამისაკარი (იორიკირი), მოკონამი-ტამავაში (ოშიტაოში), ბუშუიამა-ტოსაიუტაკა (ოშიდაში), კიმურაიამა-გაგამარუ (ჰიკიოტოში), კოკაი-შოტენრო (ოკურიდაში), ჰომაშო-ჰოკუტორიკი (ცუკიოტოში), ტამაასუკა-კოტოკასუგა (იორიკირი).

სატურნირო მდგომარეობა
5-0: ჰაკუჰო (იოკოძუნა), კოტოოშუ (ოძეკი), კაკურიუ (მაეგაშირა 6), ჰომაშო (მ 13).
4-1: კაიო (ოძეკი), კისენოსატო (სეკივაკე), ტოკიტენკუ (მ 3), მოკონამი (მ 10), კოკაი (მ 12)... 2:3 გაგამარუ (მ 12)... 1:4: ტოჩინოშინი (კომუსუბი).

VI დღე
ქართველთა მეტოქეები: ტოჩინოშინი-ბარუტო, კოკაი-შიმოტორი, გაგამარუ-ტამაასუკა.

ფოტოზე: ასე წააგო ტოჩინოშინმა კაიოსთან