ისტორია ბრინჯაოთი იწყება

მსოფლიოს ახალგაზრდობის პირველ ოლიმპიურ თამაშებზე მედალი საქართველო სპორტული დელეგაციის ყულაბაშიც გაჩნდა _ გუშინ ბრინჯაო თავისუფალი სტილით მოჭიდავე ირაკლი მოსიძემ დაიმსახურა.

ახლა კი უფრო დაწვრილებით: სინგაპურში ჩვენებურთაგან შეჯიბრებაში პირველი ჩაება მოცურავე გიორგი მთვრალაშვილი. კომბინირებული სტილით მან 200 მეტრი 2.12,70-ში გაცურა და 25 მონაწილეს შორის ბოლოსწინა ადგილით დაკმაყოფილდა.

გუშინ ხალიჩაზე თავისუფალი სტილით მოჭიდავეები _ ირაკლი მოსიძე (63 კგ) და გენო პეტრიაშვილი (100) გავიდნენ. თითოეულ წონით კატეგორიაში, როგორც გაუწყეთ, სხვადასხვა ქვეყნის 8-8 წარმომადგენელი ცდის ძალებს. ისინი ორ ჯგუფად არიან დაყოფილნი. მოსიძემ A ჯგუფში იასპარეზა. პირველ წრეში აშკარა უპირატესობით დაამარცხა ავსტრალიელი ჰარის ფაზლიჩი, მაგრამ მეორეში რუს აზამატბი აშნატლოვთან დათმო ორთაბრძოლა. მართალია, მესამე შეხვედრა ეკვადორელ იონი ფილაის მოუგო, მაგრამ ჯგუფში მეორე ადგილს ვერ გასცდა, რადგან რუსმა მოჭიდავემ სამივე პაექრობაში იმარჯვა, ფინალში მეორე ჯგუფის პირველადგილოსან ტაჯიკს ბახოდურ კადიროვს აჯობა და კვარცხლბეკის უმაღლეს საფეხურზე ავიდა. შუააზიელს, ცხადია, ვერცხლი ერგო. მესამე ადგილისთვის ბრძოლაში მოსიძემ ქულებით ამერიკელ ქვინტონ მარფის სძლია..

100 კილოგრამ წონით კატეგორიაში საქართველოს სპორტულ ღირსებას გენო პეტრიაშვილი იცავდა. ტურნირი მანაც წარმატებით დაიწყო _ სტარტზე იოლად სძლია ამერიკელ მანუოლეფოგა სულავაის. მეორე ბარიერი მისთვისაც გადაულახავი აღმოჩნდა _ აზერბაიჯანელ ალი მაგომედაბიროვთან წააგო. მესამე შეხვედრაში მონგოლი ოიონბოლდ ენქტუგზი დაჯაბნა, მაგრამ ბრინჯაოსთვის პაექრობა ინდოელ სატივარტ კადინთან დათმო და მეოთხე ადგილს დასჯერდა. ჩემპიონობა კუბელი რუან ოკონიედოს მძლეველ მაგომედაბიროვს ხვდა..
ქართველთაგან 21 აგვისტოს ძიუდოისტები _ ბექა ტუღუში და სოფიო ბერიძე გავლენ ტატამზე.