ძიუდოს საერთაშორისო ფედერაციამ წესებში რადიკალური ცვლილებები შეიტანა

• IJF-მ მორიგი ცვლილებები შეიტანა ძიუდოს წესებში.

• ორი ვაზარი ამიერიდან ისევ იპონის ტოლფასი იქნება.

• დამატებით დროში გაფრთხილება აღარ იქნება შეხვედრის შეწყვეტის მიზეზი.

• ძიუდოისტებს ფეხში ხელის მოვლებისთვის დისკვალიფიკაციას აღარ მისცემენ, გაფრთხილებას აკმარებენ.

ძიუდოს საერთაშორისო ფედერაციამ (IJF) წესებში მორიგი რადიკალური ცვლილებები შეიტანა, თუმცა მათი უმეტესობა "კარგად დავიწყებული ძველია".

ძიუდოს ქომაგთ კარგად მოეხსენებათ, რომ ეს წესები წინა ოლიმპიურ ციკლშიც არსებობდა და მერე შეცვალეს.

თავისთავად, ცვლილება და სიახლის ძიება კარგია, მაგრამ ნამდვილად ვერ მოვიწონებთ ასეთ ტემპს. ვფიქრობთ, არაა კარგის ნიშანი, ძიუდოს საერთაშორისო ფედერაციას ასე ხშირად რომ უწევს რელსებიდან რელსებზე გადარბენა და ხშირად უკან დაბრუნებაც.

წესების ხშირი ცვლილება აბნევს ქომაგს, რომელსაც მისთვის კარგად ნაცნობი მყარად ჩამოყალიბებული სისტემა ურჩევნია. თან, საკითხავია, მოცემული ცვლილებები რამდენად წაადგება ძიუდოს განვითარებას, რამდენად გაზრდის სანახაობრივ მხარეს.

ვფიქრობთ, "ორი ვაზარის წესის" დაბრუნება ნამდვილად კარგია. როცა ერთი ფალავანი რამდენიმე ილეთს აკეთებს, მეორე კი - ვერაფერს, ესე იგი, ძალთა უთანასწორობის შემთხვევაა, მაგრამ იპონზე თუ ვერ დააგდებდი მეტოქეს, მაინც ბოლომდე უნდა გებრძოლა. ახალი წესით ასე აღარ იქნება, მაგრამ ცუდ ფაქტად მიგვაჩნია ის, რომ ქულათა შეფასების სისტემა უცვლელი დარჩა, ანუ იუკო არ აღადგინეს და კვლავაც ორი შეფასება - ვაზარი და იპონი დატოვეს.

არა მგონია, ყველა სინჯის გდების ერთ ილეთად - ვაზარად გაერთიანებაც სწორი იყოს, ახლა კი რა გამოდის - შეიძლება ორი მარტივი გდებით, ანუ იუკოთი მოიპოვო იპონი!

ამასთან, ახალი დეფინიცია შემოდის ვაზარის განმარტებაშიც: თუ ადრე ზურგით ტატამზე შეხება მიიჩნეოდა ვაზარად, ახლა "ვაზარისთვის ზურგის დადებასა და გდებას შორის არანაირი წყვეტა და პაუზა არ უნდა იყოს". თან, თურმე, გდების დროს ტატამზე იდაყვების და ხელების დადებაც კი ვაზარად შეფასდება.

* * *
გაფრთხილება დამატებით დროში მხოლოდ იმ შემთხვევაში ხდება არსებითი, თუ ის რომელიმესთვის მესამეა - ძიუდოისტებს ძირითადში მიღებული გაფრთხილებები დამატებითშიც გადაჰყვებათ, მესამის მიღების შემთხვევაში კი ძველი წესი უცვლელად რჩება - ასეთი ათლეტი მოიხსნება იმ კონკრეტული ორთაბრძოლიდან.

ერთი მხრივ, ძალიან კარგია, რომ ქულა დაფასდა და მოსაგებად გაფრთხილების ნაცვლად აუცილებელი ხდება ილეთის გაკეთება - სავარაუდოდ, ამან სანახაობრივი მხარე უნდა აამაღლოს და ეს წესი სწორედ ამ მიზნით შემოიღეს, მაგრამ ცუდია, რომ დამატებითი დრო არაა შეზღუდული.

არის საშიშროება, შეხვედრა მოსაწყენად დიდხანს გაგრძელდეს. ეს არბიტრებსაც დაუტოვებს მიკერძოების გვარიან ბერკეტს - საშუალება ექნებათ, პიროვნული სიმპათიით ან რაღაც ამგვარი მანკიერი მომენტით ისარგებლონ.

მართალია, მსაჯებსაც ამოწმებენ და საქმეში ვიდეოტექნიკაც ერთვება, მაგრამ ვიყოთ გულახდილები და ბოლო ხანებში ძიუდოში მსაჯობა კრიტიკას ვერ უძლებს, ამ პირობებში კი მიკერძოებაც ბევრია.

* * *
ცოტა საკამათოა, რომ გაუქმდა დისკვალიფიკაცია ხელის მოვლებაზე. ამ "მკვეთრი" წესის უარყოფით მხარეს "ზევით" მალევე მიხვდნენ და გამონაკლისი დაუშვეს - პირველ ჯერზე აფრთხილებდნენ, მხოლოდ განმეორებით შემთხვევაზე ხსნიდნენ, ახლა კი მსგავსი ფაქტი ნებისმიერ ვითარებაში გაფრთხილებით დაისჯება.

ეგ კარგი, მაგრამ ეს წესი თავის დროზე სწორედ ფეხებში "მოძრომიალე" ძიუდოს სკოლების (მაგალითად, აზერბაიჯანული) წინააღმდეგ შემოიღეს და მისი დაბრუნება ხომ არ დაუკარგავს ძიუდოს ავთენტურ სტილს, ანუ ისევ ხომ არ "მოხრის წელში"? თავის დროზე მის წინააღმდეგ იმიტომაც გაილაშქრეს, რომ ძიუდო თანდათან "წაიხარა" და სულ უფრო მოდური გახდა ფეხში ხელით შესვლები.

* * *
დასახელებულთა გარდა, არის სხვა ცვლილებებიც. მაგალითად, იცვლება შებოჭვისა და "ხიდის" წესებიც, დაყოვნება ჩავლებისას - მაშინვე უნდა შეუტიოს, თორემ გააფრთხილებენ, მახრჩობელა ილეთის შესრულების ტექნიკა და სხვა...

(იბეჭდება მცირე ცვლილებით)
ყოველდღიური სპორტული გაზეთი "ლელო"