<p>"ჩელსის" ნახევარმცველი ამბობს, რომ ინგლისის ნაკრებს 22 წლის დენიელ სტარიჯის იმედი უნდა ჰქონდეს <br> "ჩელსის" ნახევარმცველი, ვეტერანი ფრენკ ლემპარდი, რომელიც გასულ ზაფხულს უკვე 33 წლისა მოიყარა, ამბობს, რომ ინგლისის ნაკრებს ევრო-2012-ის დღეებში მისი ახალგაზრდა თანაგუნდელის, 22 წლის დენიელ სტარიჯის იმედი უნდა ჰქონდეს - მოგეხსენებათ, უეინ რუნის მიერ ჩერნოგორიასთან შეხვედრაში მიღებულმა წითელმა ბარათმა ინგლისში ერთგვარი პანიკა გამოიწვია.</p><p>თუ ფიფა რუნის ავტომატურ ერთმატჩიან დისკვალიფიკაციას კიდევ ერთ ან ორ თამაშს დაამატებს, "მანჩესტერ იუნაიტედის" კაპიტანს პოლონეთსა და უკრაინაში, დასაწყისში მაინც, სათადარიგოთა სკამზე მოუწევს ჯდომა, რაც იმას ნიშნავს, რომ ფაბიო კაპელომ მის ნაცვლად ვინმე სხვა უნდა ათამაშოს.</p><p>ინგლისის ნაკრებს, ნოემბერში, მსოფლიოს ჩემპიონ ესპანეთთან აქვს ამხანაგური მატჩი დაგეგმილი და, სავარაუდოდ, სტარიჯს იქ მიეცემა თავის გამოჩენის შესაძლებლობა. ჩერნოგორიასთან შეხვედრაში კაპელოს "ჩელსის" თავდამსხმელი შეკრებაზე გამოძახებული ჰყავდა, მაგრამ უშუალოდ შეხვედრის განაცხადში აღარ შეიყვანა.</p><p>თუ ინგლისელთა იტალიელი მწვრთნელი ევროპის ჩემპიონატამდე დარჩენილ ამხანაგურ შეხვედრებს ახალგაზრდა ფეხბურთელების შემოწმებისა და თავის ტაქტიკასთან შეჩვევისთვის გამოიყენებს, მაშინ, შესაძლოა სტარიჯის შანსი კიდევ უფრო გაიზარდოს. ასეა თუ ისე, ისეთი გამოცდილი ფიგურა, როგორიც ლემპარდია, უმცროს თანაგუნდელს ბოლომდე ენდობა და დიდ მომავალს უწინასწარმეტყველებს:</p><p>"იმაში, რომ დენიელი დიდ სანაკრებო ფეხბურთს ითამაშებს, ეჭვი არ მეპარება, ჩემთვის, უბრალოდ, საინტერესოა, როდის მოხდება ეს. გარწმუნებთ, მას ყველა მონაცემი აქვს "ჩელსისა" და ეროვნული გუნდის ნამდვილი ვარსკვლავი რომ გახდეს. სტარიჯი ტექნიკურია, მეტად სწრაფი, მეურვისგან დასხლტომისა და გოლის გატანის განსაკუთრებული უნარი აქვს. მას შეუძლია არაფრისგან შექმნას მომენტი, რაც გულშემატკივარს აღაფრთოვანებს".</p><p>სტარიჯმა ლურჯი მაისურით წინა მწვრთნელის, კარლო ანჩელოტის ხელმძღვანელობითაც ითამაშა, მაგრამ მაშინ ის ხუთი თვით "ბოლტონს" მიაქირავეს. გასულ ზაფხულს "ჩელსიში", მოგეხსენებათ, ახალი მწვრთნელი, პორტუგალიელი ანდრე ვილაშ-ბოაში მივიდა, რომელსაც "ბოლტონიდან" დაბრუნებული ფორვარდი ძალიან მოეწონა და მეტად ენდო, ვიდრე ანჩელოტი ენდობოდა.</p><p>ისევ ლემპარდი: "ბოლტონში გატარებულმა დრომ სტარიჯს საკუთარი შესაძლებლობების რწმენა შესძინა. ეს სწორედ ის თვისებაა, რომელიც პრემიერლიგაში თამაშს სჭირდება. ყველაფერი ძალიან კარგად აეწყო. "სტემფორდ ბრიჯზე" მას თამაშის საშუალება არ ჰქონდა, ამიტომაც გადავიდა ისეთ გუნდში, სადაც ათამაშეს, გოლების გატანას გემო გაუგო და სულ სხვა ფეხბურთელად დაგვიბრუნდა. მწვრთნელმაც დააფასა - პირდაპირ ძირითადი შემადგენლობის ფეხბურთელად აქცია".</p><p><strong>ყოველდღიური სპორტული გაზეთი "ლელო"</strong></p>
"ვან დეიკის გოლი უნდა ჩათვლილიყო" - რუნი მსაჯების გადაწყვეტილებას არ ეთანხმება
ტენ ჰაგი პრემიერ ლიგაში არ დაბრუნდება - ვულვზმა მწვრთნელად სხვა დამრიგებელი აირჩია
4-გოლიანი თრილერი - 10-კაციანმა "მანჩესტერ იუნაიტედმა" "ტოტენჰემს" დაუქამბექა
[ეროვნული ლიგა] ...ეს იქნება სწორი გადაწყვეტილება! ანუ, გვჭირდება თუ არა "გაზაფხული-შემოდგომის" სისტემა?
U21 | საბერძნეთი V საქართველო - პირველი ვარჯიში ათენში
16-წლამდელებმა ნოემბრის შეკრება გამარჯვებით დაასრულეს
ლევანდოვსკიმ შეიძლება კარიერა დაასრულოს
18 წ. | ჩეხეთისთვის 26 შეირჩა
დე ლა ფუენტეს იამალის ნაცვლად თბილისში 28 წლის თავდამსხმელი მოჰყავს
"მილანი" მოდრიჩთან კონტრაქტის გაგრძელებას აპირებს
"ბარსელონამ" მწვრთნელი გაათავისუფლა - პასკუალის დაბრუნება?
“ა” ლიგის საკვალიფიკაციო ტურნირისთვის რეგისტრაცია დაიწყო
"ჩვენ ერთად თამაშიც შეგვიძლია" - ეკიტიკემ ისაკის შესახებ ისაუბრა
[VIDEO] გამარჯვების მომტანი ორქულიანი 00.4 წამში - "მაიამი ჰიტმა" ოვერტაიმში გაიმარჯვა
"პრემიერლიგის სეზონის საუკეთესო ტრანსფერია" - უეინ რუნიმ "სანდერლენდის" ფეხბურთელი გამოარჩია
[VIDEO] ბითაძის 18 წუთი - "ორლანდო მეჯიქმა" "პორტლენდ ტრეილ ბლეიზერსი" დაამარცხა
კომისარ-მსაჯები განაწილდნენ: რატიშვილი სკოპიეში, თვაური და შალამბერიძე – ბაქოში
საქართველო 10:1 ესტონეთი
საქართველოს ნაკრებმა ნოემბრის მატჩებისთვის მზადება დაიწყო
[VIDEO] შეიძლებოდა, გოლი ეგოიანისთვისაც ჩაეთვალათ, მაგრამ შერჩა... საგოლე პასი
უჭირს - ფრანგული მედია ზაბარნის თამაშს უარყოფითად აფასებს
[VIDEO] აშორტიას გოლი, გაფრინდაშვილის საგოლე პასი...
"ბორჯღალოსნები" | ნამატით კანადასთან