სერიები... "იბერია 1999"-მა, "ტორპედომ" და "გაგრამ" მოიგეს

საქართველოს ნაკრებმა ერთა ლიგაზე გაგვახარა, ორი მატჩი, ექვსი ქულა, მშვენიერი დასაწყისი... ახლა კი კრისტალბეთ ეროვნული ლიგა განახლდა. 24-ე ტურის სამი შეხვედრა გაიმართა: "იბერია 1999"-მა, "ტორპედომ" და "გაგრამ" გაიმარჯვეს.

თელავი 0:1 გაგრა

კონკურენტების დაპირისპირება... გაგრამ ექვსმატჩიანი მოუგებელი სერია დაასრულა, თელავში 1:0 იმარჯვა. ცხრილში ადგილები შეიცვალა: ახლა "გაგრაა" მერვეზე და "თელავი" მეცხრეზე.

ერთადერთი გოლი 51-ე წუთზე გიორგი პაპუაშვილმა გაიტანა ცაციით ძლიერი დარტყმით. ეს პაპუაშვილის მეოთხე გოლია სეზონში.

თელავში დებიუტი ჰქონდა ბერძენ მთავარ მწვრთნელს, ხარალამბუს ხრისტოდულუს.

ტორპედო 2:0 კოლხეთი 1913

წლეულს ქუთაისელთა და ფოთელთა მესამე დაპირისპირებაც იმერულმა გუნდმა მოიგო. 3:2, 5:2 და ამჯერად 2:0.

74-ე წუთამდე გოლი არ იყო გასული. ანგარიში კი ცოტნე ფაცაციამ გახსნა, რომელმაც ლაშა შერგელაშვილის-ფელიპე პირესის კომბინაცია დაასრულა ზუსტი დარტყმით. ბოლოს, მსაჯის მიერ დამატებულ წუთებზე კი ნორვეგიელმა ბიორნ იონსენმა გაიტანა. ეს იონსენის მე-14 გოლია მიმდინარე კრისტალბეთ ეროვნულ ლიგაში და ბომბარდირთა დავაშიც ლიდერია.

"ტორპედო" ზედა სამეულშია და ჩემპიონობისთვის იბრძვის, "კოლხეთი 1913" კი მეექვსე ადგილზეა.

იბერია 1999 3:0 დინამო ბთ

იბერიელებმა ზედიზედ მეოთხედ მოიგეს და თან ყველა შეხვედრაში 3 გოლი გაიტანეს: 3:0, 3:1, 3:0, 3:0... აი, "დინამო ბათუმს" კი ცუდი სერია აქვს, მოქმედ ჩემპიონს ზედიზედ რვა შეხვედრაა არ გაუმარჯვია. კრისტალბეთ ეროვნულ ლიგაში ბოლოს 23 მაისს მოიგეს: სტუმრად "დინამო თბილისთან".

პირველი ტაიმი სრულდებოდა, როცა მასპინძლებმა პირველი ბურთი გაიტანეს. ცოტნე კაპანაძემ ჩააწოდა, იური ტაბატაძემ მეკარის ბაქანთან შემოაბრუნა ბურთი და იქ შეიკნე სილამ ცარიელ კარში შეაგორა - 1:0.

მეორე გოლი კურიოზულ სიტუაციაში გავიდა. კუთხურის მერე არეულობა შეიქმნა, ბათუმელები თითქოს გადარჩნენ, მათი მცველი ნიკოლოზ მალი ბურთს იგერიებდა, მაგრამ მოარტყა დერეკ აგიაკვას და ასე ასხლეტით შევარდა კარში - 2:0. ეს აგიაკვას პირველი გოლია საქართველოში.