დღეს ჩვენი მეტოქეები ირკვევა - ყველაფერი "ერთა ლიგის" წილისყრამდე

დღეს, 16 დეკემბერს, თბილისის დროით 21:00 საათზე, "ერთა ლიგის" წილისყრა გაიმართება. მოგეხსენებათ, საქართველოს ნაკრები მე-3 კალათაშია. ვილი სანიოლს, მის გუნდსა და ქართველ გულშემატკივრებს ამ ტურნირიდან ევროპის 2024 წლის ჩემპიონატზე მოხვედრა რეალურად ესახებათ. ეს თემა გარკვეულ ტკივილებს გვახსენებს, თუმცა ისევ თავად უნდა შევძლოთ და ფინალის წაგების უარყოფითი ემოციები გადავფაროთ.

რაც შეეხება გასულ "ერთა ლიგას" - ჩრდ. მაკედონიასთან ფინალის მოლოდინში, ვლადიმირ ვაისმა ხშირ როტაციას მიმართა და საბოლოოდ, B ლიგის საგზური სომხეთის ნაკრებს დავუთმეთ. ამას თავისი დადებითი შედეგი აქვს - ევროპის ჩემპიონატზე ფიქრი დღევანდელი მდგომარეობითა და სავარაუდო მეტოქეებით მეტად შესაძლებელია.

პირველი კალათა

C ლიგის მთავარი გუნდები ის ნაკრებები არიან, რომლებიც გასულ გათამაშებაში ერთი დონით მაღლა იყვნენ და დაქვეითდნენ - თურქეთი, სლოვაკეთი, ბულგარეთი, ჩრდ. ირლანდია.

სავარაუდო მეტოქეების არჩევა რთულია, თუმცა ის, რომ ბულგარეთთან დაპირისპირება არ გვსურს, ლოგიკურია. ამ ქვეყნის ნაკრებს ჩვენს კარში გოლების გატანა, სამწუხაროდ, კარგად გამოსდის. ბულგარელებმა რამდენიმე თვის წინ, ამხანაგურ შეხვედრაში (4:1) დაგვამარცხეს და მათ შესაძლებლობებზე საკმაოდ ბევრი ვიცით. ბერბატოვის პერიოდის გუნდისგან 6 გოლი ორჯერ გავუშვით, თავად დიმიტარმა კი ჩვენი კარი 5-ჯერ აიღო. 1995 წელს ძალიან ძლიერი ბულგარელები ხრისტო სტოიჩკოვის ლიდერობით დავამარცხეთ, შემდეგ კი მხოლოდ ერთ ნულოვან ფრეს გამოვრჩით.



სხვა მხრივ, პოტენციური მეტოქეები დაახლოებით თანაბარი დონის არიან, თუმცა სიძლიერით გარკვეული უპირატესობა მაინც თურქეთის ნაკრებს უნდა მივანიჭოთ, რომელიც მოახლოებული მსოფლიო ჩემპიონატის პლეი-ოფში იასპარეზებს. გიუნეშის გაშვების შემდეგ მათ გერმანელი კუნცი წვრთნის.

პირველი კალათიდან რომელი მეტოქეც უნდა დაგვიპირისპირდეს, ისინი ჯგუფის ლიდერობისთვის იბრძოლებენ. ჩრდ. ირლანდიამ შესარჩევის უკანასკნელ ტურში ქულები იტალიას დააკარგვინა (0:0) და მუნდიალისკენ სავალი გზა გაურთულა. სლოვაკებიც მაქსიმალურად დიდხანს ებრძოდნენ ხორვატიასა და რუსეთს, საბოლოოდ კი მათ საკმაოდ ჩამორჩნენ და ჯგუფში მესამეობას დასჯერდნენ. სლოვაკეთის ნაკრებმა უკანასკნელ ტურში მალტას 6 უპასუხო გოლი გაუტანა. "კიოლნის" ნახევარმცველი დუდა ჰეთ-თრიკით გამოირჩა. რაც შეეხება ვლადიმირ ვაის-უმცროსს -  ნაკრების მაისურით ბოლოს სექტემბერში ითამაშა.

მთავარია, საქართველოს ნაკრებმა სტაბილურობას მიაღწიოს, თორემ ჩამოთვლილი ნაკრებები შვედებთან ახლოს ვერ მიდიან, თუმცა იბრაჰიმოვიჩისა და მისი თანაგუნდელების დამარცხება კი მოვახერხეთ.

მეორე კალათა

აქ ბოლო პერიოდში ჩვენთვის კარგად ნაცნობი პოტენციური მეტოქეებია - ჩრდ. მაკედონია, ბელარუსი და საბერძნეთი. მათი შესაძლებლობები კარგად ვნახეთ და ისიც ვიცით, ნებისმიერი მათგანი რომ დავამარცხოთ, ფანტასტიკის სფეროს არ განეკუთვნება. კიდევ ერთი ვარიანტი ბოლო დროს პროგრესირებადი ლუქსემბურგია. მათ მსოფლიო ჩემპიონატის შესარჩევ ჯგუფში 9 ქულა დააგროვეს - ორჯერ აზერბაიჯანს და სტუმრად ირლანდიას სძლიეს.

საქართველოს ნაკრებთან ერთად, მესამე კალათაში კოსოვო, აზერბაიჯანი და ლიეტუვა არიან. შესაბამისად, ვილი სანიოლის გუნდი მათ ვერ დაუპირისპირდება.

რაც შეეხება ყველაზე სუსტ, მე-4 კალათას - ჯერჯერობით 2 სავარაუდო მეტოქეა გარკვეული - ფარერები და გიბრალტარი. ორივე ამ ნაკრებთან დადებითი ბალანსი გვაქვს, თუმცა ამის შემდეგ მათი პროგრესი აღსანიშნავია.

ფარერებს 2006 წელს სტუმრად 6:0 ვძლიეთ, განმეორებით შეხვედრაში კი თბილისში გაცილებით სერიოზული წინააღმდეგობა გაგვიწიეს (3:1 მოვიგეთ).

გიბრალტარი 2014 წელს, თემურ ქეცბაიას მწვრთნელობისას სტუმრად (3:0) დავამარცხეთ (დღევანდელი შემადგენლობიდან ჯაბა კანკავამ გაიტანა). განმეორებითი მატჩი უკვე კახა ცხადაძის ხელმძღვანელობით გაიმართა და 4:0 გავიმარჯვეთ (ვაწაძის დუბლი, ოქრიაშვილისა და ყაზაიშვილის გოლები).



რაც შეეხება ვლადიმირ ვაისის პერიოდს - გიბრალტარმა საკუთარ მოედანზე საკმაოდ დიდი წინააღმდეგობა გაგვიწია და 0:2-ის შემდეგ ანგარიშის გათანაბრება მოახერხა, თუმცა ბოლოს გიორგი ქვილითაიას გოლით მაინც დამარცხდა. თბილისში მეტოქე იოლად (3:0) დავამარცხეთ.

რაც შეეხება C ლიგის კიდევ ორ მონაწილეს - ისინი ყაზახეთი-მოლდოვისა და კვიპროსი-ესტონეთის წყვილებში გამარჯვებულები იქნებიან.



წარსული შედეგებით, საქართველოს ნაკრებისთვის ივნისი ნაკლებად წარმატებული თვეა. ახლა ამაზე ფიქრის დავიწყება მოგვიწევს, რადგან მომავალ "ერთა ლიგას" უცნაური ფორმატი აქვს - 2022 წლის ზაფხულის პირველ თვეში 4 ტური გაიმართება (2-დან 14 ივნისამდე), დარჩენილი 2 კი სექტემბერში (22-27) შედგება. მოგეხსენებათ, ყატარში მსოფლიო ჩემპიონატი განსხვავებულ დროს (22 ნოემბრიდან 18 დეკემბრამდე) იმართება და კალენდრის ცვლილებაც ამან განაპირობა.

თუკი სანიოლის გუნდი ჯგუფში გამარჯვებას მოახერხებს, ევროპის ჩემპიონატისთვის გამსვლელ ნახევარფინალს 2023 წლის 14 ან 15 ივნისს, მასში წარმატების შემთხვევაში კი ფინალურ დაპირისპირებას 18 ივნისს გამართავს.

შეგახსენებთ, ამის შემდეგ ევროპის ჩემპიონატის შესარჩევი ეტაპი გაიმართება და ტურნირზე მოხვედრის შანსი ნაკრებებს აქაც ექნებათ.

მთავარი პოზიტივი, საკადრო საკითხები და თავდაჯერებული სანიოლი

ფეხბურთელები და მთავარი მწვრთნელი - საქართველოს ნაკრების შეფასება

U21. თამამად, გულიანად - გულიაშვილის დუბლით და გოჩოლეიშვილის სუპერგოლით საქართველოს ნაკრებმა ინგლისს სძლია [VIDEO]