იტალიურ ტურნირზე ქართველი გამოარჩიეს - ინტერვიუ ნიკა ქორიძესთან

სულ ცოტა ხნის წინ 21 წლის ცენტრალური ნახევარმცველი ნიკა ქორიძე იტალიური ტურნირის, CAVAZZOLI-ს საუკეთესო ფეხბურთელი გახდა.

CAVAZZOLI 21-წლამდელთა ტურნირია, რომელიც ემილია-რომანიას მხარეში ჩატარდა. მასში 32 გუნდი მონაწილეობდა და ქორიძის "ფოლგორე რუბიერამ" ვერცხლის მედლები მოიპოვა.

სამი წლის წინ ნიკა ქორიძე იტალიური "რეჯანას" ფეხბურთელი გახდა. მას ძირითადი შემადგენლობისთვისაც ამზადებდნენ, თუმცა კლუბიდან ხელმძღვანელობა და მწვრთნელი წავიდა, რის შემდეგაც ახალმა გუნდმა მისი განათხოვრება გადაწყვიტა.

ნიკა ქორიძეს საქართველოს 17 და 19-წლამდელთა ნაკრებებშიც უთამაშია. ბოლოს მას ახალგაზრდულ ნაკრებში გია გეგუჩაძემ უხმო, თუმცა ჯანმრთელობის პრობლემების გამო ნაკრებს ვერ დაეხმარა.

ახალგაზრდა ფეხბურთელს იტალიაში დავუკავშირდით და მის მომავალზე ვესაუბრეთ.

- მინდა მოგილოცო წარმატება CAVAZZOLI-ს ტურნირზე. გვითხარი, რა სახის ტურნირია ეს და რას ნიშნავს ამ ტურნირში წარმატების მიღწევა?
- დიდი მადლობა. ეს არის იტალიაში ერთ-ერთი ყველაზე პრესტიჟული ახალგაზრდული ტურნირი, რომელიც ტარდება ყოველი წლის ბოლოს. ეს არის მთელი წლის შემაჯამებელი ტურნირი და ასე ვთქვათ, ემსახურება ახალი ტალანტების და ნიჭიერი ფეხბურთელების აღმოჩენას.

- როგორც ვიცით, ახალ კლუბთან აწარმოებ მოლაპარაკებებს. სად შეიძლება გიხილოთ მომავალ სეზონში?
- კონკრეტული გუნდის დასახელებისგან თავს შევიკავებ. მიდის საუბარი სერია "დ"-ს გუნდთან. სხვა ქვეყნებში არ ვიცი, მაგრამ იტალიაში ძალიან დიდი მნიშვნელობა ენიჭება, თუ რომელ ასაკში რა დივიზიონს ითამაშებ. სწორედ ამის მიხედვით ეწყობა შემდეგ ფეხბურთელის კარიერა. ჩემი ასაკიდან გამომდინარე, ვთვლი, რომ ძალიან კარგი იქნება, თუ ერთ სეზონს ამ დივიზიონში ვითამაშებ და ასე ვთქვათ, ტრამპლინად გამოვიყენებ უფრო მაღალი საფეხურებისთვის.

- "რეჯანასთან" საბოლოოდ გაწყდა კონტაქტი? რატომ ვერ აეწყო თქვენი ურთიერთობა?
- არა, რა თქმა უნდა. მე მათი მეთვალყურეობის ქვეშ ვარ და მაქვს კიდევაც კონტაქტი, უბრალოდ, კონტრაქტი არ მაკავშირებს.

- დღეის გადმოსახედიდან, შეცდომად მიიჩნევ "რეჯანაში" გადასვლას?
- არა, რა თქმა უნდა. ვთვლი, რომ ძალიან დიდი გამოცდილება მივიღე ჩემი აქ ყოფნით. უბრალოდ, ზუსტად იმ წელს, როცა ჩემი "რეჯანას" უმაღლესში დაწინაურება თითქმის გადაწყვეტილი იყო - პრეზიდენტი, სპორტული დირექტორი და მთლიანად სამწვრთნელო შტაბი შეიცვალა. ამის შემდეგ ყველაფერი აირია.

- შემოთავაზების შემთხვევაში საქართველოს ეროვნულ ლიგაში ითამაშებდი? და როგორ შეაფასებდი იტალიური პერსპექტივიდან ქართულ ლიგას?
- ძალიან მინდა კარიერის საქართველოში დასრულება და ალბათ, მომავალში არც დავფიქრდები, ისე ვითამაშებ. უკვე 4 წელია აქ ვიზრდები, გამოცდილებას ვიღებ და ძალიან მინდა, რომ იტალიის დონეზე ჩემს მაქსიმუმს მივაღწიო. ასე რომ, ამ ეტაპზე ჩემი კარიერული წინსვლისთვის ვფიქრობ, აქეთ დარჩენა უკეთესია.

- საქართველოს ასაკობრივ ნაკრებებში გითამაშია, 17 და 19-წლამდელებში. თუმცა ეს წლების წინ იყო. მას შემდეგ შეგხმიანებია ვინმე?
- გია გეგუჩაძემ გამომიძახა 21-წლამდელთა ნაკრებში. თუმცა, რომ ჩამოვედი, ჯანმრთელობის პრობლემების გამო ვერ შევძელი თავის წარმოჩენა და სულ 2 ვარჯიშში მივიღე მონაწილეობა.

- სექტემბერში საქართველოს ახალგაზრდული ნაკრები ლიეტუვას უპირისპირდება. ფიქრობ, რომ ამ წარმატების შემდეგ კვლავ გიხმობენ ჩვენს ნაკრებში?
- ჩემთვის ყოველთვის ძალიან დიდი პატივი იყო საქართველოს დროშის ქვეშ თამაში. ყოველთვის ვცდილობდი, ჩემი მაქსიმუმი დამედო სტადიონზე, იყო ეს 17-წლამდელთა ნაკრებში თუ 19-წლამდელებში. არც ახლა შეცვლილა ჩემი დამოკიდებულება ნაკრების მიმართ და ვხვდები, რამხელა პასუხისმგებლობაა ამ ფორმით სტადიონზე გასვლა. თუ ისევ მომიწევს საქართველოს ნაკრების ფორმის მორგება, ყველანაირად ვეცდები, დავეხმარო.