"დაუჯერებელია, რომ ასეთი მაღალი დონის მეკარე უგუნდოდაა" - Prosports.kz გიორგი ლორიას ყაზახეთში ეპატიჟება

ყაზახეთში ადგილობრივი ჩემპიონატის დონე ბოლო წლებში საგრძნობლად გაიზარდა. ამის მთავარი მიზეზი იმ ლეგიონერების დონეა, რომლებიც ამ ქვეყანაში სათამაშოდ ჩადიან.

განვლილი სეზონის შემდეგ საფეხბურთო კარიერა დაასრულა "კაირათის" რუსმა თავდამსხმელმა ანდრეი არშავინმა, რომელმაც მის უკანასკნელ სეზონში 9 გოლი და 13 საგოლე გადაცემა შეასრულა, "კაირათს" ტოვებს  ბრაზილიელი ისაელიც, რომელსაც კლუბთან კონტრაქტი დაუმთავრდა.

ადგილობრივი სპორტული გამოცემა Prosports.kz, სათაურით "ვინ შეცვლის არშავინს და ისაელს", სტატიას აქვეყნებს, სადაც 10 თავისუფალ აგენტზეა საუბარი, რომლებმაც, შესაძლოა, კარიერა ყაზახეთის ჩემპიონატში გააგრძელონ.

ერთ-ერთი მათგანი ქართველი მეკარე გიორგი ლორიაა. აი, რას წერს გამოცემა მის შესახებ:

"დაუჯერებლია, რომ ასეთი მაღალ დონის მეკარე, რომელმაც საქართველოს ნაკრების კარი ერთა ლიგაზე ყაზახეთის ნაკრებთან ორჯერ დაიცვა, 3 თვეზე მეტია უგუნდოდაა. მაგრამ რეალობა ასეთია, "ანჟის" დატოვების შემდეგ, რომელსაც სერიოზული ფინანსური პრობლემები აქვს, ქართველმა შესაბამისი გუნდი ვერ იპოვა. გიორგი ლორიას ნებისმიერ კონდიციასთან მარტივად ადაპტაცია შეუძლია, პრემიერლიგა კი ამ მხრივ გამონაკლისი არ იქნება. ორი მეკარე, გვარად ლორია ყაზახეთის ჩემპიონატში - შესანიშნავი იქნება!" - ვკითხულობთ Prosports.kz-ზე.

გიორგი ლორიამ სამარის "კრილია სოვეტოვი" გასულ ზაფხულს დატოვა, მას შემდეგ კი უგუნდოდაა. მან ერთა ლიგაზე საქართველოს ნაკრების ყველა მატჩში ძირითად შემადგენლობაში ითამაშა.

ცნობილი გახდა გიორგი ლორიას "კრილია სოვეტოვიდან" გაშვების მიზეზი