რას წარმოადგენს "ტორპედოს" მეტოქე? - 50 მილიონ ევროდ შეფასებული "ლუდოგორეცი"

ქუთაისის "ტორპედო" ევროპა ლიგის პლეი-ოფშია და მას მეტოქედ ბულგარული გრანდი, რაზგრადის "ლუდოგორეცი" ერგო.

პირველი შეხვედრა თბილისში, მიხეილ მესხის სახელობის სტადიონზე 23 აგვისტოს გაიმართება, საპასუხო დაპირისპირება კი 30 აგვისტოს რაზგრადში შედგება.

დღევანდელი "ლუდოგორეცი" 2001 წელს დაარსდა ალექსანდრ ალექსანდროვის და ვლადიმირ დიმიტროვის მიერ. 2002 წელს კლუბს "რაზგრადი 2000" უწოდეს, თუმცა კლუბი დაარსების თარიღად 1945 წელს ასახელებს, როდესაც ხუთი გუნდის გაერთიანებით "ლუდოგორეცი" ჩამოყალიბდა. თავდაპირველად, დაბალ დივიზიონებში გამოდიოდა. მაშინდელი კლუბის მაქსიმუმი მეორე დივიზიონი იყო. ბოლოს, წარუმატებლობის შედეგად, დაიშალა კიდეც.

2010 წელს ბულგარელმა ბიზნესმენმა კირილ დომუსშჩიევმა კლუბი შეიძინა და მიზნად უმაღლეს დივიზიონში აღზევება დაისახა.

პირველივე სეზონში კლუბმა ეს შეძლო და უმაღლესი დივიზიონის საგზური მოიპოვა, ისტორიაში პირველად. 2011-12 წლებში კლუბმა საკუთარ ქვეყანაში ყველა თასი მოიგო (ბულგარეთის ჩემპიონატი, თასი და სუპერთასი). 2012-13 წლების სეზონიც თითქმის ანალოგიური გამოდგა, კლუბმა მოიგო ჩემპიონატი და თასი, თუმცა სუპერთასზე "ბეროე სტარა ზაგორასთან" პენალტების სერიაში დამარცხდა.

2013-14 წლების ჩემპიონთა ლიგის სეზონი კლუბისთვის კარგად დაიწყო. გუნდმა ბრატისლავის "სლოვანისა" და ბელგრადის "პარტიზანის" დამარცხება შეძლო და ლიგის პლეი-ოფში გავიდა, თუმცა შვეიცარიულ "ბაზელთან" ვერაფერს გახდა და ევროპა ლიგაზე გადაინაცვლა. ევროპა ლიგის ჯგუფიდან, ყველასათვის მოულოდნელად, კლუბი ძალიან იოლად გავიდა. 1/16-ფინალში რომის "ლაციოს" შეხვდა და დრამატულ ბრძოლაში მერვედფინალის საგზურის მოპოვება მოახერხა, სადაც ესპანურ "ვალენსიასთან" დამარცხდა.

ამ პერიოდს უკავშირდება კიდევ ერთი საინტერესო ფაქტი - იტალიურმა რომის "ლაციომ" დამარცხების შემდეგ ბულგარულ კლუბს თილისმა აჩუქა, არწივი, სახელად "ფორტუნა".



2014-15 წლების ჩემპიონთა ლიგის სეზონი კვლავ წარმატებით დაიწყო და ლუქსემბურგის "დუდელანჟს" იოლად მოუგო. შემდეგ ბელგრადის "პარტიზანი" შეხვდა და ურთულეს ბრძოლაში პლეი-ოფის საგზური მოიპოვა. წილისყრამ "ლუდოგორეცს" ბუქარესტის "სტიაუა" არგუნა მეტოქედ. პირველი მატჩი რუმინელების გამარჯვებით დასრულდა. საპასუხო მატჩის 89-ე წუთზე რაზგრადელებმა გოლი გაიტანეს და თამაში დამატებით დროში გადაიყვანეს. 119-ე წუთზე "ლუდოგორეცის" მეკარე სტოიანოვმა საჯარიმოს გარეთ რუმინელი ფეხბურთელი მოჩეხა და წითელი ბარათი მიიღო. ბულგარელებს ყველა ცვლილება გამოყენებული ჰქონდათ, რის გამოც კარში ჩადგომა ცენტრალურ მცველს, კოსმინ მოცის მოუწია. პენალტების სერიის პირველი გოლი სწორედ მოციმ გაიტანა. შვიდი დარტყმული პენალტიდან მოციმ შეძლო და ორი მათგანი მოიგერია, რითაც კლუბს ისტორიული საგზური მოუპოვა ჩემპიონთა ლიგის ჯგუფურ ეტაპზე.

წინა სეზონში სოფიის ცსკა-ს აქტიური კონკურენციის მიუხედავად, "ლუდოგორეცმა" მაინც შეძლო ჩემპიონატის მოგება და ჩემპიონთა ლიგის საკვალიფიკაციო ეტაპზე ასპარეზობა გაინაღდა.

პირველ ეტაპზე ბულგარელებს ჩრდილოირლანდიური კლუბი "კრუსადერი" ერგო, რომელიც ორი შეხვედრის ჯამში 9:0 გაანადგურეს. მეორე ეტაპზე მათი მეტოქე უნგრული "ვიდი" იყო, რომელსაც შინ ფრედ, 0:0 ეთამაშნენ და სტუმრად 0:1 დამარცხდნენ. შესაბამისად, კლუბი ევროპა ლიგის საკვალიფიკაციოს მესამე ეტაპზე გადაერთო.

ევროპა ლიგის საკვალიფიკაციოს მესამე ეტაპზე კლუბის მეტოქე ბოსნია-ჰერცეგოვინის "ზრინსკი" იყო, რომელიც შინ 1:0 დაამარცხეს და გასვლაზე ფრე, 1:1 ითამაშეს.

კლუბმა მიმდინარე ჩემპიონატი აქტიურად ვერ დაიწყო. ოთხი ტურის შემდეგ მათ 7 ქულა აქვთ და მეოთხე ადგილზე არიან. "ტორპედოსთან" შეხვედრამდე კი კლუბს, 19 აგვისტოს მნიშვნელოვანი დაპირისპირება ელის ჩემპიონატში ერთ-ერთ მთავარ კონკურენტ სოფიის ცსკა-სთან.

კლუბი ბულგარეთის პატარა ქალაქ რაზგრადში თამაშობს, რომლის მოსახლეობა 33 416 ადამიანს შეადგენს. კლუბის სტადიონი, სახელად "ლუდოგორეც არენა" 11 000-იანი ტევადობისაა.



"ტრანსფერმარკეტის" მიხედვით, კლუბის ფეხბურთელების სატრანსფერო ღირებულება 50.55 მილიონ ევროს შეადგენს, როცა საპირისპიროდ, ქუთაისური კლუბის ღირებულება 5.33 მილიონი ევროა.

კლუბში 17 ლეგიონერია და ამავდროულად, "ლუდოგორეცში" 9 ისეთი ფეხბურთელია, რომლებსაც ნაკრებშიც იძახებენ.

კლუბის ყველაზე ძვირად ღირებული ფეხბურთელი ჰოლანდიელი ვურა არის, რომლის ღირებულება 5 მილიონ ევროს შეადგენს. ის პოზიციით მარცხენა ფლანგზე თამაშობს და საკმაოდ სახიფათო შემტევია. მიმდინარე სეზონში მის ანგარიშზე 8 შეხვედრაში 1 გოლია.

ზოგადად, კლუბს მარცხენა ფლანგი ძალიან ძლიერი ჰყავს, სადაც ბრაზილიელი მცველი ნათალენლი ჰყავს, რომელმაც ბულგარეთის მოქალაქეობა მიიღო. მისი ღირებულება "ტრანსფერმარკეტზე" 4. 25 მილიონი ევროა.

წინა სეზონში კლუბის მთავარი ბომბარდირი რუმინელი კლაუდიო კეშერუ იყო, რომელმაც 26 გოლის გატანა მოახერხა. მიმდინარე სეზონში, ყველა ტურნირზე მის ანგარიშზე 8 შეხვედრაში 3 გოლია. ღირებულება - 3.50 მილიონი ევრო.

კლუბს ბულგარელი მეკარე, 31 წლის ვლადისლავ სტოიანოვი ჰყავს, რომელიც "ლუდოგორეცის" ღირსებას 2013 წლიდან იცავს. მისი სატრანსფერო ღირებულება 3.50 მილიონი ევროა.

გუნდის ყველაზე სუსტი წერტილი მთავარი მწვრთნელი პაულო აუტუორია, რომლის მოყვანითაც და ნაჩვენები შედეგითაც ადგილობრივი ქომაგი უკმაყოფილოა. 61 წლის სპეციალისტმა კლუბი 1-ელ ივლისს ჩაიბარა და 2020 წლამდე აქვს კონტრაქტი. ბრაზილიელ მწვრთნელს დაახლოებით 35 კლუბი გაუწვრთნია და მათი დიდი ნაწილი ბრაზილიის ჩემპიონატში მოასპარეზე კლუბებია. ამ მწვრთნელის წარმატებები ბრაზილიაში დაახლოებით 13 წლის წინ იყო. მას შემდეგ ბარგი ჩალაგებული აქვს და კლუბიდან კლუბში დადის.

"ტორპედოს" შანსები საკმაოდ მცირეა. თუ აქამდე არსებული მეტოქეები მათ გარკვეულ შეცდომებს პატიობდნენ, "ლუდოგორეცი" ამას სათავისოდ გამოიყენებს.

თუმცა მწვრთნელზე იმიტომ გავამახვილეთ ყურადღება, რომ მისი გადაწყვეტილებებით ქომაგი უკმაყოფილოა და მას "ვიდთან" გამოვარდნას ვერ პატიობენ. გუნდს ამ ეტაპზე ჩამოყალიბებული სტრატეგია არ გააჩნია და მწვრთნელი რთულად გადის ადაპტაციას კლუბთან.

ქუთაისელებს არაფერი აქვთ დასაკარგი. მათ, პირველ რიგში, საკუთარ თავზე უნდა იმუშაონ, გააცნობიერონ, თუ რა შედეგი მოჰყვება მათ ევროპა ლიგაზე გასვლას. ამ ეტაპამდე ევროტურნირებზე ქართული კლუბის არცერთ ფეხბურთელს არ უთამაშია და ეს მათი შანსია.

გამდიდრების შანსი! - ქუთაისის "ტორპედოს" ფინანსები და სარეიტინგო ქულები

რა ხდებოდა "ტორპედოს" ავტობუსში "კუკეშთან" თამაშის შემდეგ [VIDEO]

"ტორპედო" "კუკეშთან" მატჩის მსაჯობას უეფაში გაასაჩივრებს [VIDEO]