"სამტრედიას" პრეზიდენტი: "ყარაბაღთან" ვიომებთ

ჩემპიონთა ლიგის II საკვალიფიკაციო ეტაპზე საქართველოს ჩემპიონი "სამტრედია" "ყარაბაღს" ხვდება. ამიტომ გასაკვირი არ არის აზერბაიჯანული მედიის დაინტერესება ჩვენი გუნდით.

azerisport.comმა ინტერვიუ ჩამოართვა "სამტრედიას" პრეზიდენტ გია ომანაძეს. ინტერვიუდანაც კარგად ჩანს, რა თავდაჯერებულები არიან აზერბაიჯანელები.

- "სამტრედია" შეიძლება ზედიზედ მეორედ გააგდონ ევროთასებიდან აზერბაიჯანულმა კლუბებმა, წილისყრამ იმედი არ გაგიცრუათ?
- არა. ჩემპიონთა ლიგაზე იოლი მეტოქე არ არსებობს. არ იქნებოდა აზერბაიჯანის ჩემპიონი, შეგხვდებოდა რომელიმე სხვა ქვეყნის ჩემპიონი. ასე რომ, დიდი მნიშვნელობა არა აქვს ვის ვეთამაშებით.

- გასულ წელს აღნიშნეთ, რომ კლუბის ბიუჯეტი მილიონი დოლარიც არ არის, წლეულს როგორ არის ამ მხრივ საქმე?
- სტაბილური სიტუაციაა, ნელნელა ვვითარდებით. ვიყავით ვიცე-ჩემპიონები, გავხდით ჩემპიონები.

- "ყარაბაღის" ბიუჯეტი, რომ გაცილებით აღემატება თქვენი კლუბისას?
- ეს არ არის პანიკის მიზეზი. ზოგს მეტი ფული აქვს, ზოგს ნაკრები. მინდორზე ვიბრძოლებთ, რომ მერე არ თქვან, დაბალი ბიუჯეტი აქვთ და თამაში არ იციანო.

- რა შანსები გაქვთ იმის გათვალისწინებით, რომ "ყარაბაღი" კავკასიის საუკეთესო გუნდია?
- აი, შევხვდებით მას მოედანზე და ვნახოთ. დიახ, ძლიერი ჩემპიონი გყავთ, მაგრამ ჩვენ დანებებას არ ვაპირებთ და მოედანზე ვაპირებთ ამის დამტკიცებას.

- როგორ შეიცვალა თქვენი გუნდი მას შემდეგ, რაც "გაბალასთან" 1:5 წააგო?
- როგორც უკვე ვთქვი, ყოველწლიურად ვვითარდებით.

- ქართული ფეხბურთი ახლა სანაკრებო და საკლუბო დონეზეც მაგრად ჩამორჩა, რა მოხდა, რამდენიმე წლის წინათ ჩვენ თქვენგან ვიღებდით მაგალითს...
- ახლა სახელმწიფომ დაიწყო ფეხბურთის დახმარება, ჩემპიონატის დონეც გაიზარდა, მეტი კონკურენციაა. თქვენ ეს ყველაფერი უფრო ადრე განახორციელეთ.

- საქართველოში დიდი სომხური დიასპორაა, ხომ არ უნდა ველოდოთ პროვოკაციებს?
- არა. "გაბალა" გვესტუმრა შარშან და მსგავსი არაფერი ყოფილა. ჩვენ პროვოკაციებს არ დავუშვებთ.

- ვინმეს სომხეთის დროშით რომ მოუნდეს მოსვლა?
- ჩვენ არ დავუშვებთ პროვოკაციებს.

- ბაქოში თუ გამოგყვებიან ფანები?
- დიდი ალბათობით ფანების მცირე რაოდენობა გამოგვყვება.