ჩემპიონთა ლიგა. ჯგუფური ეტაპი. III ტურის წინ: 43 VS 43 ანუ ჯგუფის ორი ფინალი

დღეს განახლდება ევროთასების გათამაშება - გუნდები ჩემპიონთა ლიგის I წრის ბოლო ტურის მატჩებს ითამაშებენ. დღის ერთი ცენტრალური მატჩის მაგივრად ორი გვაქვს - მანჩესტერსა და მადრიდში...

2017 წელს კრიშტიანო რონალდომ ყველა შეჯიბრებაში 43 გოლი გაიტანა, ამდენივე გოლი გაიტანა წლეულს ჰარი კეინმაც - დღეს ეს ორი სუპერფორვარდი ერთმანეთის პირისპირ დადგება.

რა თქმა უნდა, "ოქროს ბურთის" მფლობელის "აქციები" უფრო ფასობს თანამედროვე ფეხბურთში, მაგრამ ინგლისელმა წლეულს 43 გოლის გატანა 38 მატჩში მოახერხა, მაშინ, როცა პორტუგალიელს საამისოდ 46 მატჩი დასჭირდა.

ჩემპიონთა ლიგაზე კეინმა პირველ ორ ტურში ხუთი გოლის გატანა შეძლო და ახლა ბომბარდირთა დავას სათავეში უდგას.

მხოლოდ H ჯგუფში აქვს ორ გუნდს 6-6 ქულა. ეს ჩემპიონთა თასის ამჟამინდელმა მფლობელმა "რეალმა" და "ტოტენჰემმა" მოახერხეს. დღეს "სანტიაგო ბერნაბეუზე" "ლოს მერენგესი" "დეზებს" უმასპინძლებს.

ზინედინ ზიდანს ამ მატჩში არ ეყოლება დანი კარვახალი, რომელსაც გულის პრობლემა აღმოაჩნდა და შესაძლოა, კარგა ხნით ჩამოშორდეს ფეხბურთს. ვერ ითამაშებენ ვერც გარეთ ბეილი და მატეო კოვაჩიჩი. "ტოტენჰემს" მუსა დემბელე და ვიქტორ ვანიამა დააკლდებიან, დისკვალიფიკაცია აქვს დელე ალის, საეჭვოა ბენ დევისის, ჟორჟ-კევინ ნ"კუდუსა და დენი როუზის თამაში.

ეს გუნდები ერთმანეთს სულ 4-ჯერ შეხვდნენ და ესპანურ გრანდს დიდი უპირატესობა აქვს - 3 მოგება და 1 ფრე. მეტიც, "რეალს" ჯერ ბურთი არ გაუშვია "დეზებთან" დაპირისპირებაში, თავად კი 6-ჯერ გაიტანა.

ზინედინ ზიდანი (რეალი): "100 მატჩი "რეალის" მწვრთნელად - არ დავიწყებ თავის დაფასებას და ვიტყვი, რომ ამის გამო ძალიან ბედნიერი ვარ.

ჩემი ოცნება ყოველთვის ესპანეთში თამაში იყო, ახლაც აქ, მსოფლიოს საუკეთესო კლუბში ვარ და იმედი მაქვს, სულ მცირე, კიდევ 10 მატჩში ვუხელმძღვანელებ "რეალს". წინ "ტოტენჰემთან" ორი თამაშია.

ჩემი აზრით, ეს ამ ჯგუფის ორი ფინალური მატჩია და ხვალ პირველი ფინალი გვექნება. იმედი მაქვს, რომ ისეთ ფეხბურთს ვითამაშებთ, როგორიც ხალხს მოსწონს და თან სამ ქულას მოვიპოვებთ. კეინი "ტოტენჰემის" ფუნდამენტური მნიშვნელობის ფეხბურთელია. მას უამრავი გოლი გააქვს და მუდამ მოძრაობაშია, ყოველთვის ეძებს თავისუფალ სივრცეებს და სწრაფია. ის სრულყოფილი მოთამაშეა".

მაურისიო პოჩეტინო (ტოტენჰემი): "ჰარი კეინმა ძალიან ემოციურად მიიღო, როცა ფრანჩესკო ტოტის "რომასთან" გამოთხოვება ნახა. ის კლუბის აკადემიის აღზრდილია და ვფიქრობ, კიდევ დიდხანს ითამაშებს "ტოტენჰემში".

ჩვენი სურვილია, მან აქვე დაასრულოს კარიერა. შარშან, თითქოს, ამაზე იოლ ჯგუფში ვიყავით, მაგრამ საბოლოოდ მესამე ადგილზე გავედით. ახლა მეტოქეებზე აღარ ვფიქრობთ, უბრალოდ, სიამოვნებას ვიღებთ საკუთარი თამაშით".

სავარაუდო შემადგენლობები
რეალი (4-4-2): კ. ნავასი - ნაჩო, ვარანი, ს. რამოსი, მარსელო - მოდრიჩი, კაზემირო, კროოსი, ისკო - ბენზემა, რონალდო

ტოტენჰემი (3-4-2-1): ლორისი - ალდერვეირელდი, დ. სანჩესი, ვერტონგენი - ორიე, ვინკსი, დაიერი, ტრიპიერი - ერიქსენი, საონი - კეინი

• ლუკა მოდრიჩი და გარეთ ბეილი სწორედ "ტოტენჰემიდან" გადავიდნენ "რეალში შესაბამისად, 2012 და 2013 წლებში.

• 2010/11 წლების ლიგის მეოთხედფინალში "რეალმა" "ტოტენჰემი" ორი მატჩის ჯამში 5:0 გამოთიშა გათამაშებას.

• კრიშტიანო რონალდო 109 გოლით ჩემპიონთა ლიგის ყველა დროის საუკეთესო ფორვარდია.

• "რეალს" უკვე 17 მატჩია, რაც ლიგაზე ერთი გოლი მაინც გააქვს. ბოლოს "სამეფო კლუბმა" ვერ გაუტანა "მანჩესტერ სიტის" (2015/16 წწ).

2011/12 წლების სეზონში ჩემპიონთა ლიგაზე "სიტის" დებიუტი შედგა. მაშინ ჯგუფურ ეტაპზე "ქალაქელები" სწორედ დღევანდელმა მეტოქემ, "ნაპოლიმ" ჩატოვა.

იტალიური კლუბის პრეზიდენტი აურელიო დე ლაურენტისი აცხადებს, რა დროს ლიგაა, როცა "ნაპოლის" "ინტერთან" მატჩი ელისო, ალბათ, დუბლებს ვათამაშებთო, მაგრამ მას სავარაუდოდ (იმედია) არ ეთანხმება მაურიციო სარი. წინააღმდეგ შემთხვევაში, კარგი ჯახი მოგვაკლდება.

ინგლისელებს არ ეყოლება ბენჟამინ მენდი, საეჭვოა ვენსან კომპანის თამაშიც. "ნაპოლის" მთავარი დანაკარგი კი პოლონელი ფორვარდი არკადიუშ მილიკია.

ორივე გუნდი სუპერფორმაშია - "ნაპოლი" ერთადერთი კლუბია ევროპის ტოპლიგებში, ვისაც ჩემპიონატში ქულა არ დაუკარგავს. იტალიელებმა ყველა შეჯიბრებაში ბოლო 32 შეხვედრიდან 26 მოიგეს და 4 ფრედ დაასრულეს. "სიტიმაც" მხოლოდ ორჯერ წააგო, ოღონდ, ბოლო 22 შეხვედრაში.

გუნდები სულ ორჯერ დაუპირისპირდნენ ერთმანეთს და "ნაპოლის" მოგება და ფრე აქვს, ბურთების უკეთესი შეფარდებით - 3:2.

ხოსეპ გვარდიოლა (სიტი): "იტალიურ და ინგლისურ ფეხბურთს დიდ პატივს ვცემ, მაგრამ ფაქტები თავისთავად მეტყველებს, რომ ფეხბურთში მოდას ესპანური კლუბები აკანონებენ - "ბარსელონა", "რეალი", "ატლეტიკო", "სევილია", "ვალენსია" და სხვები. "ნაპოლი" ძალიან ძლიერი მეტოქეა, რომელსაც ფეხბურთში ძალიან ბევრი გამოსდის. ეს არ არის გუნდი, რომელიც დაელოდება, რა მოხდება თამაშში.

მეტოქეს სამი ძალზე დინამიკური ფეხბურთელი ჰყავს - კალეხონი, ჟორჟინიო და მერტენსი. მიმუშავია პეპე რეინასთან ერთად და იგი ნამდვილი ლიდერია. აგუერო მზადაა, მან გუშინ უპრობლემოდ ივარჯიშა".

მაურიციო სარი (ნაპოლი): "მადლობა მინდა გადავუხადო პეპს ჩვენი შექებისთვის. მან ძალიან კარგი სიტყვებით ილაპარაკა "ნაპოლიზე". მისი კომპლიმენტი ბევრს ნიშნავს, რადგან ამჟამად იგი მსოფლიოს საუკეთესო მწვრთნელია. 25 წლის წინათ ფეხბურთი არიგო საკიმ შეცვალა და მალე გამოჩნდება, რომ ბოლო წლებში იგივე გააკეთა გვარდიოლამაც".

სიტი (4-3-3): ედერსონი - უოკერი, სტოუნსი, ოტამენდი, დელფი - დე ბრუინი, ფერნანდინიო, დ. სილვა - სტერლინგი, ჟეზუში, სანე

ნაპოლი (4-3-3): რეინა - ჰისაი, ალბიოლი, კულიბალი, გულამი - ალანი, დიავარა, ჰამშიკი - კალეხონი, მერტენსი, ინსინიე

• "სიტის" ჯგუფში ზედიზედ მესამე გამარჯვების შანსი აქვს.

• "ნაპოლი" ერთადერთხელ ეთამაშა "სიტის" სტუმრად და 1:1 დაუზავდა (2011 წ).

• "სიტის" იტალიურ კლუბებთან ძალიან უჭირს - ბოლო 8 დაპირისპირებიდან მხოლოდ ერთი მოიგო.

• მარეკ ჰამშიკს მხოლოდ ერთი გოლი რჩება დიეგო მარადონას რეკორდის გამეორებამდე "ნაპოლიში" - მარადონას 115 გოლი აქვს იტალიური კლუბის მაისურით გატანილი.

• მოსკოვის "სპარტაკმა" ევროთასებზე ესპანურ კლუბებთან 26 დაპირისპირებიდან 13 დათმო.

• "სპარტაკი" და "სევილია" ერთმანეთს პირველად ეთამაშებიან.

• "მარიბორს" ინგლისურ კლუბებთან 8 დაპირისპირებაში მხოლოდ ერთი გამარჯვება აქვს მოპოვებული.

• დონეცკის "შახტარს" ევროთასებზე ჰოლანდიურ კლუბებთან 2005 წლის მერე არ უთამაშია.

• "მონაკო" და "ბეშიქთაში" ერთმანეთს პირველად ხვდებიან.

• "დორტმუნდს" ევროთასებზე კვიპროსულ კლუბებთან აქამდე არასოდეს უთამაშია.

• აპოელ-მა გერმანულ კლუბებთან 16 დაპირისპირებიდან 14 დათმო და მხოლოდ ერთი მოიგო.

• ჩემპიონთა ლიგის დებიუტანტ "ლაიპციგს" ჯერ გამარჯვება არ მოუპოვებია.

• აპოელ-მა ჯგუფური ეტაპის ბოლო 10 მატჩში მხოლოდ 1 გოლი გაიტანა.

სამშაბათი, 17 ოქტომბერი
E ჯგუფი
მარიბორი-ლივერპული 22:45
სპარტაკი-სევილია 22:45

F ჯგუფი
ფეიენოორდი-შახტარი 22:45
მანჩესტერ სიტი-ნაპოლი 22:45

G ჯგუფი
ლაიპციგი-პორტუ 22:45
მონაკო-ბეშიქთაში 22:45

H ჯგუფი
აპოელ-დორტმუნდი 22:45
რეალი-ტოტენჰემი 22:45

(იბეჭდება მცირე ცვლილებით)
ყოველდღიური სპორტული გაზეთი "ლელო"