2022/23 წლების ჩემპიონთა ლიგის ჯგუფური ეტაპი 6 სექტემბერს დაიწყება. ევროპული კლუბები გაძლიერებას განაგრძობენ, რათა პრესტიჟულ ტურნირს მზადყოფნაში შეხვდნენ. ესპანური გამოცემა Marca ტურნირის შესახებ სტატიას აქვეყნებს და სავარაუდო ფავორიტებზე საუბრობს.
"ჩემპიონთა ლიგას დააკლდებიან ისეთი გუნდები, როგორებიც "მანჩესტერ იუნაიტედი", "რომა" და "არსენალი" არიან, თუმცა ტურნირი უდავოდ საინტერესო იქნება.
ჩემპიონთა ლიგის ფავორიტები
ამ მხრივ არაფერი შეცვლილა და ფავორიტები კვლავ კატალონიის "ბარსელონა", პსჟ, მიუნხენის "ბაიერნი", "მანჩესტერ სიტი", "ლივერპული" და მადრიდის "რეალი" იქნებიან. მაგრამ ხსენებული გუნდებიდან პსჟ და "მანჩესტერ სიტი" წარმატების მიღწევას უფრო მოწყურებულნი არიან,
რადგან გასულ სეზონში მძიმე მარცხი განიცადეს. ისინი ყველაფერს გააკეთებენ, რომ ტურნირის "მეფე" მადრიდის "რეალი" დაამარცხონ.
მხოლოდ ხუთი ჩემპიონი
მას შემდეგ, რაც ჟოზე მოურინიოს თაოსნობით "ინტერმა" 2010 წელს ჩემპიონთა ლიგა მოიგო, მხოლოდ ხუთმა გუნდმა შეძლო ჩემპიონობა: "ლივერპულმა" (ერთხელ), "ბარსელონამ", "ჩელსიმ" და "ბაიერნმა" (ორჯერ), მადრიდის "რეალმა" (ხუთჯერ). სხვა კლუბები მცდელობას აგრძელებენ. "ტოტენჰემის", მადრიდის "ატლეტიკოს", "მანჩესტერ სიტისა" და პსჟ-ის მაგალითიც ცხადყოფს, თუ რამდენად ძნელია ჩემპიონების ლიგაზე წარმატების მიღწევა.
"შეცვლილი და საინტერესო ფორმატი"
ჩემპიონთა ლიგის ახლანდელი ფორმატი გასულ სეზონებთან შედარებით უფრო კონკურენტულია, რადგან გამარჯვებისთვის 32 გუნდი იბრძვის, თუმცა 2024 წელს, შესაძლოა, ეს გადაწყვეტილება გადაიხედოს...
ესპანური გუნდები
წელს ტურნირს ესპანეთის 4 წარმომადგენელი ეყოლება: მადრიდის "რეალი", "ბარსელონა", "სევილია" და მადრიდის "ატლეტიკო". მართალია, "სევილია" და "ატლეტიკო" ფავორიტებად არ მიიჩნევიან, თუმცა დიეგო სიმეონესა და ჟულიენ ლოპეტეგის გუნდების ჩამოწერა უსამართლობა იქნება. ორივე კლუბი მეტოქეთათვის რთული დასამარცხებელი იქნება.
ფინალი სტამბოლში
ჩემპიონთა ლიგის ფინალი სტამბოლში, "ათათურქის" ოლიმპიურ სტადიონზე გაიმართება. არენა ლეგენდარულია, არა იმიტომ, რომ თურქეთის ნაკრები საშინაო მატჩებს ატარებს, არამედ 2005 წლის ფინალის გამო - სწორედ ამ მოედანზე დაუპირისპირდნენ ერთმანეთს "ლივერპული" და "მილანი" (3:3), სადაც "სქაუზერებმა" გულშემატკივარს დაუვიწყარი სანახაობა აჩუქეს. თურქეთის უდიდეს ქალაქში ფინალი 2020 წელსაც უნდა გამართულიყო, თუმცა პანდემიის გამო ის ქალაქ ლისაბონში" გაიმართა. იგივე განმეორდა მომდევნო წელსაც, ფინალური მატჩი თურქეთის ნაცვლად, ისევ პორტუგალიაში ჩატარდა. მიზეზი კვლავ კოვიდთან დაკავშირებული სიტუაცია აღმოჩნდა, ბრიტანეთის მთავრობამ თურქეთი "წითელ სიაში" შეიყვანა. საბოლოოდ 2023 წლის 10 ივნისს ფინალი სტამბოლში გაიმართება.
მომზადებულია Marca-ს მიხედვით
![ბელინგემს დიდებული გემოვნებაც ჰქონია - აი, ასეთი ლაურა ჰყავს ჯუდს [PHOTO]](/pictures/image7/e1989fba3aa72fc932e5745d76e1d573.jpg "ბელინგემს დიდებული გემოვნებაც ჰქონია - აი, ასეთი ლაურა ჰყავს ჯუდს [PHOTO]")
