ლა ლიგა. XXV ტურის წინ: ვისთვის ომის და ვისთვის სეირნობის შემდეგ

მადრიდის "რეალმა" გამოტოვებული მატჩი მოუგო "ლეგანესს" და ერთბაშად სამი კურდღელი დაიჭირა - ჯერ ერთი, მადრიდულ დერბიში გაიმარჯვა, მეორეც "ლეგანესზე" შური იძია და "ვალენსიას" გადაასწრო, და მესამე ადგილზე გადავიდა.

ახლა ყოველ გუნდს 24-24 თამაში აქვს ჩატარებული და უკეთ ჩანს, ვინ რას უმიზნებს.

ჩემპიონატის დასრულებამდე 14 ტურით ადრე "ბარსელონა" "რეალს" 14 ქულით უსწრებს, ეს, რა თქმა უნდა, განაჩენია - "სამეფო კლუბი", თუ კატალონიელთა თავს რამე უბედურება არ დატრიალდა, ტიტულს ვეღარ შეინარჩუნებს.

შედარებით უკეთესი შანსი რჩება დიეგო სიმეონეს გუნდს, რომელიც, რა თქმა უნდა, ბოლომდე იბრძოლებს. "ატლეტიკო" 7 ქულით ჩამორჩება "ბარსას" და კვირას ტურის ცენტრალურ მატჩში "სევილიას" სტუმრობს. კი, ანდალუსიელებმა ერთი დღით მეტი დაისვენეს, მაგრამ "ატლეტიკოს" ევროპალიგაზე სასეირნო თამაში ჰქონდა, მაშინ, როცა ვინჩენცო მონტელას "სევილიამ" "მანჩესტერ იუნაიტედთან" (უფრო ზუსტად - დავიდ დე ხეასთან) ნამდვილი ომი გადაიტანა.

ერნესტო ვალვერდეს გუნდს კატალონიური დერბი აქვს "ჟირონასთან", რომელშიც აშკარა ფავორიტია. მადრიდის "რეალი", რომელმაც "ლეგანესთან" კრიშტიანო რონალდოს გარეშე შეძლო წარმატების მიღწევა, ბასკურ "ალავესს" მასპინძლობს. მე-4 ადგილზე დაქვეითებული "ვალენსია" ასევე ბასკებს ხვდება, "მესტალიაზე" "რეალ სოსიედადი" ჩადის.

ლა ლიგა. XXV ტური
პარასკევი, 23 თებერვალი
დეპორტივო-ესპანიოლი 23:59

შაბათი, 24 თებერვალი
სელტა-ეიბარი 16:00
რეალი-ალავესი 19:15
ლეგანესი-ლას პალმასი 21:30
ბარსელონა-ჟირონა 23:45

კვირა, 25 თებერვალი
ვილიარეალი-ხეტაფე 15:00
ბილბაო-მალაგა 19:15
ვალენსია- სოსიედადი 21:30
სევილია-ატლეტიკო 23:45

ორშაბათი, 26 თებერვალი
ლევანტე-ბეტისი 23:59

ბომბარდირები: 20 - ლიონელ მესი (ბარსელონა); 17 - ლუის სუარესი (ბარსელონა); 15 - იაგო ასპასი (სელტა); 13 - კრისტიან სტუანი (ჟირონა); 12 - მაქსი გომესი (სელტა), კრიშტიანო რონალდო (რეალი).

(იბეჭდება მცირე ცვლილებით)
ყოველდღიური სპორტული გაზეთი "ლელო"