ფრენკი დე იონგი: "ბარსელონაში" ქაოსი მესის გადაწყვეტილებამ გამოიწვია...

"ბარსელონას" ნიდერლანდელმა ნახევარმცველმა ფრენკი დე იონგმა აღიარა, რომ "ბლაუგრანაში" ქაოტური მდგომარეობაა, რაზეც ყველაზე დიდი გავლენა მესის მოთხოვნამ იქონია, რადგან ლეოს ასეთ გადაწყვეტილებას არავინ ელოდა.

მას შემდეგ, რაც კატალონიური გრანდი "ბაიერნთან" ანგარიშით 2:8 განადგურდა, გუნდი მთლიანად მოიშალა, "ბარსას" მთავარი მწვრთნელი კიკე სეტიენი დაითხოვეს და მის ადგილას ნიდერლანდელი ექსთავკაცი და კატალონიელთა ლეგენდა რონალდ კუმანი დანიშნეს. მიუხედავად ამისა, "კულეები" ძალიან გაბრაზებულები არიან და კლუბიდან პრეზიდენტის, ხოსეპ მარია ბარტომეუს წასვლას ითხოვენ.

"ამჟამად გუნდში არეულობაა: ქაოტური მდგომარეობა და გაურკვევლობა. მე მესისთან ტრანსფერის შესახებ არ მისაუბრია, ასე რომ, მისი მდგომარეობის შესახებ ინფორმაციას არ ვფლობ. თუ ლეო "ბარსელონას" დატოვებს, ეს ჩვენთვის უდიდესი დარტყმა იქნება. სანაკრებო მატჩების შემდეგ გუნდში დავბრუნდები და აქ არსებულ მდგომარეობას მერე შევაფასებ", - განაცხადა დე იონგმა.

ახალგაზრდა ფეხბურთელმა ასევე აღნიშნა, რომ დიდი სურვილი აქვს, სანაკრებო პაუზიდან დაბრუნების შემდეგ მესი ისევ გუნდში დახვდეს, თუმცა არგენტინელთან ამ თემაზე არ უსაუბრია.

აღსანიშნავია, რომ დე იონგი იმ ფეხბურთელთა სიაშია, რომლებიც "ბარსელონაში" ხელშეუხებელნი არიან. უკვე ცნობილია, რომ "ბარსელონამ" ტრანსფერზე 17 მოთამაშე დააყენა, მაგრამ ნიდერლანდელი კატალონიელთა რიგებში რჩება და რონალდ კუმანის გუნდში ძალიან დიდი როლი ექნება.

ფრენკიმ მედიას განუცხადა, რომ მწვრთნელთან მხოლოდ სატელეფონო საუბარი ჰქონდა და ჯერ პირადად არ შეხვედრია. ისინი ერთმანეთის საფეხბურთო ფილოსოფიას კარგად იცნობენ, რადგან კუმანი ფეხბურთელს ჰოლანდიის ნაკრებში წვრთნიდა.

sportall.ge-სთვის მოამზადა ირაკლი ბლიაძემ

მომზადებულია 90min.com-ის მიხედვით

უდიდესი ღალატი ფეხბურთის ისტორიაში - ესპანელმა ჟურნალისტმა მესის საქციელი შეაფასა

ფრენკი დე იონგი: "ბარსელონაში" ყველა ფეხბურთელი ჩემი კერპია