მატჩისა და "ნაპოლის" ჩემპიონობის დღე? - ჯერ "ლაციოს" უნდა ვუყუროთ!..

ხვიჩა კვარაცხელიასა და მისი თანაგუნდელების მიერ იტალიის ჩემპიონობის მოპოვება შესაძლოა, რამდენიმე საათში ვნახოთ. სერია "ა"-ს 32-ე ტურის კალენდარში ცვლილება შევიდა და ლიდერი "ნაპოლის" მატჩი 24 საათით გადაიწია. ლუჩანო სპალეტის ფეხბურთელები "სალერნიტანას" დღეს, 30 აპრილს, თბილისის დროით 17:00 საათზე უმასპინძლებს.



როცა "დიეგო მარადონაზე" შეხვედრა დაიწყება, ამ დროს "ინტერისა" და "ლაციოს" დაპირისპირება  დასრულებული იქნება. ჯერ ამ შეხვედრას (14:30 სთ-ზე) უნდა ჩავუსხდეთ!.. ამის შემდეგ, ნეაპოლელებს უკვე ეცოდინებათ, ჩემპიონობასთან ერთი გამარჯვება თუ დააკავშირებთ (ამისთვის ჯერ "ლაციომ" ვერ უნდა მოიგოს). სერია "ა"-ს გამარჯვებულის ვინაობა უკვე კარგა ხანია, ცნობილია, თუმცა მის გაოფიციალურებას ველით. ახლა ყველაფერი ისე გადალაგდა, ნეაპოლი სრულ სამზადისშია და 33-წლიანი ლოდინის დასასრულებლად წამებს ითვლის. ჯერ ისინი მეორეადგილოსანი "ლაციოს" შედეგს უნდა დაელოდონ, შემდეგ კი "სალერნიტანასთან" დაპირისპირებამ ერთგვარი ფინალის სახე მიიღოს. პასუხისმგებლობა და ნერვიულობა მოიმატებს, რადგან ზეიმის გადადება უკვე აღარ გამოვა. ეს სულ მესამე სკუდეტო იქნება - პირველად დიეგო მარადონას შემდეგ!..



ერთ დროს აუტსაიდერობისთვის განწირული "სალერნიტანა" კი უკვე დიდი ხანია, არ აგებს, უკანასკნელ 8 მატჩში 2 გამარჯვება და 6 ფრე აქვს, მათ შორის, "მილანთან" და "ინტერთან" (ორივე 1:1). ამაში თავისი დიდი წვლილი 37 წლის მექსიკელმა მეკარემ, გილერმო ოჩოამ შეიტანა, რომელიც ზამთრის სატრანსფერო პასუზისას გადაიბირეს. ირვინგ ლოსანოს თანამემამულესთან დაპირისპირება ელის.

ამ გუნდების პირველი მატჩი იანვარში შედგა, რომელიც ხვიჩა კვარაცხელიამ გაციების გამო გამოტოვა. მაშინ სტუმრებმა დი ლორენცოსა და ოსიმენის გოლებით (2:0) გაიმარჯვეს. 1945 წლიდან მოყოლებული, ისინი ერთმანეთს 27-ჯერ შეხვდნენ და "სალერნიტანამ" მხოლოდ სამჯერ მოიგო. ბოლო შეხვედრებში მათ ნეაპოლელების კარში გოლის გატანაც უჭირთ.



ლუჩანო სპალეტის გუნდს ჩემპიონატში საუკეთესო შეტევა (67 გოლი გაიტანეს) ჰყავს, ხოლო საკუთარ კარში იმდენივე გოლი მიიღეს (21), რამდენიც მეორეადგილოსანმა "ლაციომ." უკანასკნელ მატჩებში "ნაპოლი" საკუთარ თავს არ ჰგავს, "მილანთან" გოლის გატანა ხომ გაუჭირდა და საკუთარ მოედანზე ვერც "ვერონას" კარი (0:0) აიღო.

ათწლეულები გავა, მონატრებულ სკუდეტოზე კი პირველ რიგში, ხვიჩა კვარაცხელიასა და ვიქტორ ოსიმენს გაიხსენებენ. მათ ჩვეულ თამაშს, რაც ბოლო პერიოდში ძველებურად ვეღარ ვნახეთ, "სალერნიტანასთანაც" ველით. რადგანაც საქმე საჩემპიონო მატჩთან გვაქვს, სპალეტის ბიჭების მხრიდან შესაბამის განწყობასა და ოპტიმალურ შემადგებლობას ველით, ვინც საჩემპიონო სეზონის ძირითადი შემოქმედი იყო. გუნდს რუი და პოლიტანო აკლია: მერეტი - დი ლორენცო (კაპ), რაჰმანი, კიმი, ოლივერა - ლობოტკა, ანგისა, ზელინსკი - ლოსანო, ოსიმენი, კვარაცხელია.

შეხვედრას მარჩენარო განსჯის, რომელიც ნეაპოლელებს ბოლოს აგვისტოში, "ლეჩესთან" მოუგებელ (1:1) მატჩში მოემსახურა.

"ნაპოლის" მატჩი გადაიტანეს - ხვიჩასა და მის თანაგუნდელებს სრულფასოვანი ზეიმის საშუალებას აძლევენ...

"ნაპოლის" რიგებიდან მხოლოდ ხვიჩამ შეძლო - სპალეტის გუნდი წინა წელს ამ სტატისტიკაში პირველი იყო, დღეს ბოლოა

სულ გაგიჟდნენ - ნეაპოლში მეტოქე გუნდებს სასაფლაო მოუწყვეს