მუნდიალი 2018. ევროპა. IX ტური: ჰოლანდიამ პლეი-ოფში გასასვლელად შვედეთი 7-ბურთიანი სხვაობით უნდა დაამარცხოს [VIDEO]

A ჯგუფში შვედეთმა სახლში ლუქსემბურგი 8:0-ზე გაანადგურა. ამ შეხვედრაში 4 გოლი მარკუს ბერგმა გაიტანა. ჰოლანდიამ ბორისოვოში მხოლოდ მატჩის დასასრულს გატეხა ბელარუსები. როდესაც ანგარიში 1:1 იყო, არიენ რობენმა 84-ე წუთზე პენალტით დააწინაურა თავისი გუნდი, 93-ე წუთზე კი მემფის დეპაიმ დალაშქრა სლავების კარი. ფრანგებმა სოფიაში ბულგარელები 1:0-ზე დაამარცხეს. ბოლო ტურის წინ ფრანგებს 20 ქულა აქვთ, შვედებს 19, ჰოლანდიელებს კი - 16. ბოლო ტურში საფრანგეთი ბელარუსს მიიღებს, ამსტერდამში კი ჰოლანდია და შვედეთი

B ჯგუფში აუტსაიდერმა ლატვიამ გასვლაზე ვერ მოახერხა ფარერების დამარცხება (0:0). პორტუგალიის მწვრთნელმა ფერნანდუ სანტუშმა იფიქრა, ანდორას თავის 3 306-იან სტადიონზე კრიშტიანო რონალდოს გარეშე მოვუგებო, მაგრამ პირველ ტაიმში გოლი რომ ვერ გაიტანეს, ნაანტრაქტევს შეუშვა შეცვლაზე და 63-ე წუთზე კრიშტიანომ გახსნა ანგარიში, 86-ეზე კი ანდრე სილვამ მეორედ დაამწუხრა მასპინძლები. რონალდომ მიმდინარე შესარჩევ ციკლში მე-15 გოლი გაიტანა და საუკეთესო ბომბარდირს, პოლონელ რობერტ ლევანდოვსკის დაეწია.

შვეიცარიამ ბაზელში 5:2-ზე გაანადგურა უნგრეთი და 27 ქულით პირველ ადგილზეა, ხოლო პორტუგალიელები 24 ქულით მეორე პოზიციაზე დარჩნენ. 10 ოქტომბერს ეს გუნდები ერთმანეთს ლისაბონში დაუპირისპირდებიან.

H ჯგუფში ბელგიამ, რომელსაც უკვე მოპოვებული ქონდა მსოფლიოს ჩემპიონატის საგზური, სარაევოში ბოსნიას 4:3-ზე სძლია, ესტონეთმა კი გიბრალტარი გააბითურა (8:0). ესტონელმა იონას ტამმა ჰეთ-ტრიკი მიითვალა. საბერძნეთმა ნიქოზიაში კვიპროსს 2:1 ძლია და 16 ქულით მე-2 ადგილზეა, მესამეზე კი 14 ქულით ბოსნიაა. უკანასკნელ ტურში ბოსნია გასვლაზე ესტონეთს ხვდება, საბერძნეთი კი გიბრალტარს მასპინძლობს.

ბოსნია-ბელგია 3:4 (ვიდეო)

ბელარუსი-ჰოლანდია 1:3 (ვიდეო)

ანდორა-პორტუგალია 0:2 (ვიდეო)

შვედეთი-ლუქსემბურგი 8:0 (ვიდეო)