ტოტენჰემი-რეალი 0:1 (0:4)
მაშ ასე: ფეხბურთის გულშემატკივრებმა ჩემპიონთა ლიგის ნახევარფინალში საოცნებო წყვილი მივიღეთ: „რეალი“ „ბარსელონას“ წინააღმდეგ! მადრიდელებს „ტოტენჰემი“ საკუთარ მოედანზე 4:0 ჰყავდათ დამარცხებული და ინგლისური კლუბი „უაით ჰართ ლეინზეც“ (მართალია, მოკრძალებული ანგარიშით, 1:0, მაგრამ მაინც) დაამარცხეს.
ეს კი იმას ნიშნავს, რომ 2003 წლის შემდეგ, „სამეფო გუნდი“ პირველად გავიდა ჩემპიონთა ლიგის ნახევარფინალში. იმასაც გაგახსენებთ, რომ მაშინ „რეალს“ ფინალისკენ მიმავალი გზა ტურინის „იუვენტუსმა“ გადაუკეტა.
მატჩის წინ
„ტოტენჰემის“ თავკაც ჰარი რედნაპს ტაქტიკა არ შეუცვლია და გუნდი ისევ 4-4-1-1-ით ათამაშა. დისკვალიფიცირებული პიტერ კრაუჩის ნაცვლად, ძირითად
მადრიდელთა მწვრთნელი ჟოზე მოურინიო კი უდიდეს რისკზე წავიდა, როცა კარვალიოს, რამოსისა და ალბიოლის სახით, სასტარტოში სამი ისეთი ფეხბურთელი ათამაშა, რომლებსაც უკვე მიღებული ჰქონდათ გაფრთხილებები და ყვითელი ბარათები გუშინწინაც რომ დაემსახურებინათ, „ბარსელონასთან“ პირველ შეხვედრაში დისკვალიფიცირებულები იქნებოდნენ. სამიდან მხოლოდ კარვალიოს არ გაუმართლა, რომელიც „ბარსელონასთან“ პირველ მატჩს გამოტოვებს.
აი, პეპემ კი, სწორედ ამ შევხედრით მოიხადა დისკვალიფიკაცია და „ბარსასთან“ მოედანზე გასვლა შეეძლება. რაც შეეხება ანხელ დი მარიას - ჟოზემ არგენტინელი
სკამზე დატოვა და ამის ნაცვლად, მარცხენა ნახევარმცველის პოზიციაზე მარსელო ათამაშა.
რეაქციები
ჟოზე მოურინიო („რეალის“ მწვრთნელი): „მე ყველა თამაშის მოგება მინდა და ფეხბურთელებსაც ვუთხარი, მიუხედავად იმისა, რომ სამბურთიანი სხვაობით წაგებაც არაფერს გვავნებს, „ტოტენჰემს“ სტუმრადაც უნდა მოვუგოთ-მეთქი. ჩვენ ვერავის ვერაფერს ვაჩუქებთ, მათ შორის, „ტოტენჰემსაც“. ახლა, „ბარსელონასთან“ ოთხი უმძაფრესი ბრძოლა გველის. „ბარსა“ გენიალური გუნდია და ხშირად მაშინაც იგებს, როცა ცუდად თამაშობს. ფინალში გვინდა, „ბარსელონა“ უნდა გავაგდოთ!“
სამი ხედირა (რეალი): „ბარსელონასთან“ ზედიზედ ოთხი დუელი უდიდესი გამოწვევაა - ჩვენც სწორედ ეს გვინდოდა. ესპანეთის ჩემპიონობის შანსი ფაქტობრივად აღარ გვაქვს. ამიტომაც, ჩემპიონთა ლიგა და ესპანეთის თასი აუცილებლად უნდა მოვიგოთ.“
Top ფეხბურთელი
ჩაბი ალონსო (რეალი)
მსოფლიოს ჩემპიონმა ამ მატჩშიც დაამტკიცა, რომ „რეალისთვის“ უმნიშვნელოვანესი ფეხბურთელია. ჩაბო ალონსომ მოედნის ცენტრში ყველა ხვრელი იდეალურად გადაკეტა და ხშირად, მესამე ცენტრალური მცველის რანგში გვევლინებოდა, განსაკუთრებით კი მოდრიჩი გაამწარა. ესპანელი საყრდენს იდეალურად ახასიათებს მე-60 წუთზე დაფიქსირებული მომენტი: ჰადლსტოუნმა მას უნებურად სახეში მოარტყა და ალონსოს ტუჩიდან სისხლი წამოუვიდა, მიუხედავად ამისა, მან ბოლომდე იბრძოლა, ბეილს ფეხებში სუფთად ჩაუვარდა და ბურთი აართვა.
Flop ფეხბურთელი
გომეში (ტოტენჰემი)
ვერ ვიტყვით, რომ „ტოტენჰემის“ მეკარეს ბევრი საქმე ჰქონდა, მაგრამ კრიშტიანო რონალდოს გოლის მომენტში ისეთი შეცდომა დაუშვა, ეს საკმარისი გახდა, რომ მატჩის Flop ფეხბურთელად დაგვესახელებინა. „ტოტენჰემს“ მასზე უკეთესი მეკარე რომ ჰყოლოდა, ნახევარფინალში მაინც ვერ გავიდოდა, მაგრამ გომეშმა ამ მატჩს უმცირესი ინტრიგაც მოუსპო.
მსაჯი
იტალიელმა ნიკოლა რიცოლიმ ძალიან კარგად იმსაჯა, მისი ყველა გადაწყვეტილება მართებული გახლდათ.
ანალიზი
შეხვედრის წინ მხოლოდ „ტოტენჰემის“ უკიდურესად ოპტიმისტ ფანებს ჰქონდათ იმის იმედი, რომ ინგლისური კლუბი „რეალის“ ბარიერს მაინც გადალახავდა, მაგრამ მოურინიოს გუნდმა მათ იმედის ნაპერწკალი პირველივე წუთებში ჩაუქრო. „რეალმა“ ძალიან კარგად დაიწყო, „ტოტენჰემს“ კი, აზრზე მოსასვლელად დაახლოებით ათი წუთი დასჭირდა. მადრიდელებმა ტემპს უკლეს და მხოლოდ იმაზე დაიწყეს ზრუნვა, რომ ინგლისელები მათ საჯარიმოს ვერ მიახლოვებოდნენ. რედნაპის გუნდი თავის შანსს მეტწილად ფლანგებიდან ეძებდა, სადაც ბეილი და ლენონი აქტიურობდნენ.
მაგრამ „ტოტენჰემს“ ცენტრში კრეატიულობა აკლდა - მოდრიჩი ალონსოს სახით „საიმედო ხელში“ იყო და ვან დერ ვაარტიც არ ჩანდა. მადრიდელები თამაშს აკონტროლებდნენ.
მეორე ტაიმში რედნაპმა ლენონის ნაცვლად მოედანზე დეფო შეუშვა და 4-4-2-ზე გადაერთო, მაგრამ „ტოტენჰემმა“ მაინც ვერაფერი გააწყო - თუ არ ჩავთვლით რამდენიმე შორეულ დარტყმას. თამამად შეიძლება ითქვას, რომ „მილანის“ გამგდებმა „ტოტენჰემმა“ „რეალს“ წინააღმდეგობა ვერ გაუწია.
