თავის დროზე ჟოზე მოურინიო ამას არაფრისდიდებით დაუშვებდა: "ბარსელონასთან" მატჩის წინ საფეხბურთო ინგლისმა კატალონიური გრანდი ქებით ცაში აიყვანა. სხვანაირადაც შეგვეძლო გვეთქვა: მოურინიო "ჩელსის" მწვრთნელი რომ იყო, მაშინ ინგლისური მედია "ბარსას" ქებას ამ დონეზე და ამ მასშტაბით ვერც გაბედავდა...ლიონელ მესი შეუჩერებელიაო, თქვა ცნობილმა ფრანგმა ემანუელ პეტიმ, რომელსაც აქტიური სპორტული კარიერის დროს "ბარსელონაშიც" უთამაშია და "ჩელსიშიც".
ფრენკ ლემპარდმა აღიარა, რომ მესიმდე არასდროს უნახავს ასეთი შესაძლებლობების მქონე ფეხბურთელი და თამაშის ისეთი ხარისხი, რასაც არგენტინელი გვთავაზობს ხოლმე.
ავტორიტეტული ინგლისური გაზეთი "დეილი ტელეგრაფი" კი წერდა,
"ჩელსის" ფეხბურთელებს, მწვრთნელს, ხელმძღვანელებს (რომან აბრამოვიჩის გარდა) და გულშემატკივრებს კი აშკარად ეტყობათ, რომ ანდრე ვილაშ ბოაშის ხელში გამოვლილი სამარცხვინო პერიოდის შემდეგ ჩემპიონთა ლიგის ნახევარფინალში ყოფნითაც ბედნიერები არიან და რომ დღეს "ბარსელონასთან" თამაში მათთვის დიდი პატივია.
მაგრამ ეს იმას არ ნიშნავს, რომ "ჩელსი" ფინალში გასვლისთვის ყველაფერს არ გააკეთებს...
მაინც რა უნდა დაუპირისპიროს ლონდონურმა კლუბმა "ბარსას"? პირველ რიგში, თავდაუზოგავი ბრძოლაა საჭირო. უდიდესი მნიშვნელობა ექნება იმ ტაქტიკა-სტრატეგიასაც, რასაც რობერტო დი მატეო დღეს ან საპასუხო შეხვედრაში აირჩევს.
და, რა თქმა უნდა, "ჩელსის" "ბარსელონასთან" წარმატების მისაღწევად იღბალიც უნდა ჰქონდეს - თუმცა რაღა "ც", იღბალი ლონდონელებს ლამის პირველ რიგში სჭირდებათ.
დროგბა: შანსები თანაბარია
კატალონიელებმა იციან, რომ "სტემფორდ ბრიჯზე" იოლი გასეირნება არ ელით. "ჩელსიმ" დი მატეოს ხელში აშკარა პროგრესი განიცადა და მართალია, "არისტოკრატები" ინგლისის ჩემპიონატში ლიდერ "მანჩესტერ იუნაიტედს" მთელი 25 ქულით ჩამორჩებიან, მაგრამ ის მაინც მოახერხეს, რომ ჩემპიონთა ლიგის საგზურისთვის იბრძვიან და კარგი შანსი აქვთ, გაისადაც ევროპის ელიტაში იასპარეზონ.
"ჩელსისა" და "ბარსელონას" დუელი ბოლოს 2009 წელს შედგა და მაშინაც ნახევარფინალში. "ბარსამ" იმხანად გუს ჰიდინკის "ჩელსი" ძლივს დაამარცხა და ფინალში გავიდა - გეხსომებათ მსაჯ ტომ ჰენინგ ოვრებოს საეჭვო გადაწყვეტილებებიც, რამაც მაშინ "ჩელსის" ფეხბურთელები კინაღამ ჭკუიდან გადაიყვანა.
"შანსები 50:50-ზეა და ორი მატჩის ჯამში ყველაფერი შესაძლებელია", - ოპტიმისტურადაა განწყობილი ლონდონელთა თავდამსხმელი დიდიე დროგბა.
კატალონიელები კი დიპლომატიურად საუბრობენ. ანდრეს ინიესტამ რთულ მატჩზე ისაუბრა და თქვა, "სტემფორდ ბრიჯის" შესანიშნავი საფეხბურთო ატმოსფერო "ჩელსის" დღევანდელ მატჩში მცირე უპირატესობასაც კი ანიჭებსო.
"ჩელსი" ძალიან კარგი გუნდია და ამ მატჩს თითოეული ჩვენგანი სიფრთხილით უნდა მოეკიდოს. სხვა რამეზე ფიქრი დაუშვებელია", - დასძინა ინიესტამ.
ბარსა არ დანაყრებულა
ამას წინათ, ესპანეთის ჩემპიონატში "ბარსა" "რეალს" ათი ქულით რომ ჩამორჩა, ჩვენი ესპანელი კოლეგები წერდნენ, გვარდიოლას გუნდი დანაყრდაო, მაგრამ მერე გაირკვა, რომ მწარედ ცდებოდნენ, რადგან "ბარსელონა" ჩემპიონთა ლიგის ნახევარფინალში გავიდა, პრიმერადივიზიონში კი "რეალთან" ჩამორჩენა 4 ქულამდე შეამცირა.
შაბათს კი "ნოუ კამპზე" "ელ კლასიკო" გაიმართება და თუ "ბარსა" "რეალს" მოუგებს, მადრიდულ გრანდს სულაც ერთი ქულის დისტანციაზე მიუახლოვდება.
ყოველ შემთხვევაში, "ბარსელონას" დღემდე დანაყრებული გუნდისა არაფერი ეტყობა, რადგან გვარდიოლას ბიჭები ესპანეთის თასის ფინალში არიან, ლა ლიგაში "რეალს" სათოფეზე მიუახლოვდნენ, ჩემპიონთა ლიგაში კი მიუნხენის ფინალამდე ერთი ნაბიჯი, "ჩელსისთან" ორრაუნდიანი დუელის თავიანთ სასარგებლოდ გადაწყვეტაღა აშორებთ. თანაც, ფინალში შეიძლება "რეალს" შეხვდნენ და აი, იქ კი ნამდვილად აღარ უნდა ელოდონ ამდენ ქებას.
ჩელსის დაცვაში უჭირს
სტატისტიკით თუ ვიმსჯელებთ, დღეს "ჩელსი" კარგ მდგომარეობაშია: ლონდონელებმა ჩემპიონთა ლიგაში ყველა საშინაო მატჩი მოიგეს, გაიტანეს 16 და გაუშვეს მხოლოდ 2 გოლი. გასულ უქმეებზე კი დი მატეოს გუნდმა ასოციაციის თასზე "ტოტენჰემი" 5:1 გაანადგურა. თუმცა იტალიელ მწვრთნელს დაცვაში საკადრო პრობლემები აქვს: დავიდ ლუისის და გარი კეჰილის თამაში საეჭვოა.
ჯონ ტერის ტრავმა ბოლომდე ჯერ კიდევ არ მოუშუშებია, მაგრამ "ბარსელონასთან" მატჩში მოედანზე მაინც გავა. თავდასხმაში კი კითხვა ასე უნდა დაისვას: ფერნანდო ტორესი თუ დიდიე დროგბა? ფაქტია, რომ "ტოტენჰემთან" დროგბამ ითამაშა და თანაც, შესანიშნავად.
გვარდიოლას საკადრო პრობლემები არ აქვს: დანი ალვეში, ჟერარდ პიკე, სეიდუ კეიტა და იბრაჰიმ აფელაი ბრუნდებიან. დაცვის ცენტრში პეპი, სავარაუდოდ, ისევ მასკერანოსა და პიკეს დუეტს დაეყრდნობა. სხვათა შორის, მასკერანოს საპასუხო მატჩისთვის დისკვალიფიკაციის საფრთხე ემუქრება - ისევე, როგორც პუიოლს.
მატა: ბარსელონას გაგდება შეგვიძლია!
"ბარსასთან" წარმატების მიღწევა ძალიან ძნელია, მაგრამ შეუძლებელი არ არის, - თქვა "ჩელსის" ესპანელმა ფორვარდმა ხუან მატამ, - ფაქტია, რომ მაგრად შემოგვიტევენ და გვაიძულებენ, დაცვაში ჩავდგეთ, მაგრამ ჩვენ გვაქვს საკმარისი პოტენციალი იმისათვის, რომ "ბარსელონას" ზეწოლას გავუძლოთ და ვალდესის კართან საგოლე მომენტები შევქმნათ.
ჩვენ ვიცით, რომ სტადიონი, სადაც "ბარსელონას" ყველაზე მეტად უნდა გაუჭირდეს თავისი ფეხბურთის თამაში, სწორედ ჩვენი "სტემფორდ ბრიჯია".
"ჩელსის" ფეხბურთელები 2009 წელს გამართულ მატჩებს იხსენებდნენ - რომ არა ოვრებო და მისი "ოინები", "ბარსელონას" ნაცვლად ფინალში ჩვენ გავიდოდით და მერე ფინალსაც მოვიგებდითო.
კატალონიელთა მარჯვენა მცველი დანი ალვეში ამ მოსაზრებებს, რა თქმა უნდა, არ ეთანხმება:
"მოედანზე ჩვენზე მეტნი იყვნენ და 1:0-ს იგებდნენ, რაც იმას ნიშნავს, რომ უნდა შემოეტიათ. ამის ნაცვლად, შეშინებულები ჩანდნენ და დაცვაში იდგნენ. სწორედ ამიტომ დაისაჯა მაშინ "ჩელსი", - უთხრა 28 წლის ბრაზილიელმა "გარდიანს".
მაშინ "ბარსა" ფინალში ინიესტამ გაიყვანა, რომელიც ამბობს: "იმ მომენტს, როცა "ჩელსის" გოლი გავუტანე, ყოველთვის უდიდესი სიამოვნებით ვიხსენებ ხოლმე, მაგრამ ეს უკვე წარსულია და ამჯერად ყველაფერი ნულიდან იწყება".
სავარაუდო შემადგენლობები
ჩელსი (4-2-3-1): ჩეხი - ივანოვიჩი, ტერი, კეჰილი, კოული - მიკელი, ლემპარდი - რამირესი, მატა, კალუ - დროგბა.
ბარსელონა (4-3-3): ვალდესი - დანი ალვეში, პიკე, მასკერანო, პუიოლი - ჩავი, ბუსკეტსი, ინიესტა - სანჩესი, მესი, პედრო.
არბიტრი: ფელიქს ბრიხი (გერმანია)
ყოველდღიური სპორტული გაზეთი "ლელო"
