"დინამოს" თავი თითქმის ქუდში, უფრო ზუსტად კი, ევროპის ლიგის პლეი ოფში აქვს. ამისთვის საჭიროა, ალექს გარსიას გუნდი დღეს, 4 აგვისტოს ეროვნულ სტადიონზე ისლანდიურ "რეიკიავიკთან" სამი ან მეტი ბურთის სხვაობით არ დამარცხდეს, რაც, დაგვეთანხმებით, ფანტასტიკის სფეროს უფრო მიეკუთვნება. 4:1-ის შესანარჩუნებლად კი არა, "დინამო", დარწმუნებულები ვართ, მორიგი შთამბეჭდავი გამარჯვებისთვის იბრძოლებს, რაშიც, ცხადია, ქომაგის მხარდაჭერაც სჭირდება. ბილეთის ფასი ხელმისაწვდომია - 3 და 5 ლარი, თამაში კი, შეგახსენებთ, 21 საათზე დაიწყება. შინ დარჩენილებს მისი პირდაპირი ტელერეპორტაჟის ნახვა "საზოგადოებრივი მაუწყებლის" ეთერით შეეძლებათ. შეხვედრას პოლონელი არბიტრი
3 აგვისტოს კი "ბორის პაიჭაძეზე" ოთხივე მატჩამდელი ღონისძიება გაიმართა - მედიის წინაშე ორივე გუნდის მთავარი მწვრთნელები წარდგნენ, რის შემდეგაც ჟურნალისტებმა და გულშემატკივრებმა "დინამოსა" და "რეიკიავიკის" ღია ვარჯიშები იხილეს.
ყველაზე უხერხული მეტოქე მოედანია
პრესკონფერენციაზე მედიისა და ფეხბურთელების საერთო სატკივარზეც ითქვა - ვგულისხმობთ ეროვნული სტადიონის მოედნის საფრის საგანგაშო მდგომარეობას. გაზონი, თემურ ქეცბაიას თქმისა არ იყოს, ყანას უფრო ჰგავს, ვიდრე საფეხბურთო სარბიელს, არადა, უახლოეს პერიოდში "დინამო" და "ზესტაფონი" აქ საერთაშორისო მატჩებს ჩაატარებენ და, თუ საქმე ჯგუფურ ეტაპზე მიდგა, ევროპული მასშტაბითაც შევრცხვებით. ამას გარდა, წინაა ეროვნული ნაკრების შესარჩევი მატჩები და საქართველოს ჩემპიონატი...
მოკლედ, უახლოეს თვეებში ახალი საფრის დასაგებად დრო საერთოდ არ იქნება და საკითხავია, რატომ არავინ იზრუნა ამ პრობლემის მოგვარებაზე ივნისში, როცა "ბორის პაიჭაძეზე" არავინ თამაშობდა?
გარსიამ თქვა, რომ ამ საკითხს "დინამო" აუცილებლად დააყენებს.
პრესკონფერენციაზე მას გიორგი კახელიშვილი ახლდა, რომელსაც დარბაზმა შვილის შეძენა მიულოცა.
გარსია: იმის მიუხედავად, რომ საგარეო მატჩი სამბურთიანი უპირატესობით მოვიგეთ, სულაც არ მიმაჩნია, რომ პლეი ოფი უკვე განაღდებული გვაქვს. ვალდებულები ვართ, აქაც ბოლომდე ვიბრძოლოთ და გულშემატკივრები გავახაროთ. მოედანი კი მართლაც ძალიან ცუდ მდგომარეობაშია, რაც, უპირველესად, ჩვენნაირ ტექნიკურ გუნდებს უშლის ხელს.
- კაკუბავა და ხმალაძე გუნდს როდის დაუბრუნდებიან?
- ხმალაძე ჯერაც არ მომჯობინებულა, კაკუბავა კი უკვე დაგვიბრუნდა და "რეიკიავიკთან" 18-კაციან განაცხადშიც იქნება. არც ის არის გამორიცხული, ძირითად შემადგენლობაში ითამაშოს. როგორც იცით, ტრავმირებულია შოთა კაშიაც.
- "რეიკიავიკთან" შთამბეჭდავი გამარჯვების მიუხედავად, "დინამომ" დაცვაში კვლავ დაუშვა უხეში შეცდომები. ამ რგოლის გაძლიერებას არ აპირებთ?
- ახლა მთლიანად ამ მატჩზე ვართ კონცენტრირებულნი, როცა პლეი ოფში გავალთ, მერე ვიმსჯელებთ, გვჭირდება თუ არა ახალი ფეხბურთელები.
- გადმოდის თუ არა "დინამოში" გოგიტა გოგუა?
- ამ ფეხბურთელთან კლუბი მოლაპარაკებებს ნამდვილად აწარმოებდა, მაგრამ ამას შედეგი არ მოჰყოლია.
კახელიშვილი: ისლანდიაში გამარჯვება ძალიან მნიშვნელოვანი იყო, მაგრამ აქაც ბოლომდე უნდა დავიხარჯოთ. მეტოქე ხელწამოსაკრავი სულაც არ არის და მის წინააღმდეგ თბილისშიც სრული მობილიზებით თამაში გვმართებს.
"დინამოს" ვარჯიშში მონაწილეობა 22-მა ფეხბურთელმა მიიღო, რომელთა შორისაც იყვნენ ჩისკო, გიორგი რეხვიაშვილი და ნიკა კვეკვესკირი. შეგახსენებთ, ისლანდიაში მიღებული გაფრთხილებების გამო ისინი ამ შეხვედრას გამოტოვებენ, დღევანდელ 18-კაციან განაცხადს კი გარსია ამ 19 მოთამაშიდან შეარჩევს:
მეკარეები: გიორგი ლორია, სოსო გრიშიკაშვილი, გიორგი ნადირაძე;
მცველები: დავით ოდიკაძე, გულვერდ თომაშვილი, ირჟი ჰომოლა, ლევან კაკუბავა;
ნახევარმცველები: ალექსანდრე კოშკაძე, ჯამბულ ჯიღაური, გიორგი თექთურმანიძე, ირაკლი ლექვთაძე, ნიკა ფირცხალავა, გიორგი კახელიშვილი, გოგა ბერაია, კარლეს კოტო, რობერტინიო;
თავდამსხმელები: ალბერტო იაგუე, ლადო ახალაია, ვახტანგ ფანცხავა.
უფრო ზუსტად რომ ვთქვათ, "დინამოს" განაცხადში მინდვრის ყველა მოთამაშე მოხვდება, სამი მეკარიდან კი იქ ორი დარჩება.
ყოველდღიური სპორტული გაზეთი "ლელო"
