21 სექტემბერს საქართველოს 17-წლამდელთა ნაკრები ევროპის ჩემპიონატის შესარჩევ ტურნირში ჩაერთვება და ფინალური ეტაპისკენ მიმავალ რთულ და გრძელ გზას დაადგება. ვასილ მაისურაძის გუნდი პირველ საკვალიფიკაციო ეტაპზე მოლდოვაში ითამაშებს და მასპინძელთა გარდა, მეტოქეებად ბულგარეთი და შვედეთი ეყოლება. პირველ რაუნდში 9 ჯგუფია, ყოველი ჯგუფიდან ელიტრაუნდში ორ-ორი საუკეთესო გუნდი გავა, რასაც ორი საუკეთესო მესამეადგილოსანი დაემატება.
ელიტრაუნდში შვიდი ოთხგუნდიანი ჯგუფი შეიქმნება, რომლის გამარჯვებულები ფინალურ რაუნდში მასპინძელ სლოვენიასთან ერთად ითამაშებენ.
უკვე ცნობილია საქართველოს ნაკრების განრიგიც. 21 სექტემბერს ჩვენი 17-წლამდელები ტირასპოლში ბულგარეთს შეხვდებიან, 23 სექტემბერს ვადულ ლუი
მაისურაძეს მოლდოვაში წასაყვანი 18-კაციანი შემადგენლობა ჯერ არ შეურჩევია, თუმცა 21-კაციანი გაფართოებული სია უკვე შეადგინა. სამწუხაროდ, დანაკლისს ვერ ავცდით - დაშავდა გუნდის ერთ-ერთი ლიდერი, რუსთავის "მეტალურგის" თავდამსხმელი ალეკო მზევაშვილი და მისი მოლდოვაში გამგზავრება გამოირიცხა.
ქართველი 17-წლამდელები დასკვნით შეკრებას, რომელიც 17 სექტემბრამდე გასტანს, ურეკში გადიან, 21-კაციანი შემადგენლობა კი ასეთია:
მეკარეები: ნიკა შერმადინი, ალექსანდრე ადამია (ორივე - "მეტალურგი", რუსთავი);
მცველები: გიორგი გაბაძე, ნიკა ჭანტურია, გიორგი გოროზია (სამივე - "ლოკომოტივი", თბილისი), ლაშა დვალი, ალეკო ჩაკვეტაძე, ცოტნე ქებურია (სამივე - "მეტალურგი", რუსთავი), ზურაბ მალანია ("ბაია", ზუგდიდი);
ნახევარმცველები: ჭიაბერ ჭეჭელაშვილი, ოთარ კაკაბაძე, გიორგი პაპუნაშვილი, თორნიკე მაჭავარიანი (ყველა - "დინამო", თბილისი), ნიკოლოზ ახვლედიანი ("ბაია", ზუგდიდი), მათე ცინცაძე ("ლოკომოტივი", თბილისი), გიორგი აბურჯანია, ბექა მელიქიძე (ორივე - "მეტალურგი", რუსთავი);
თავდამსხმელები: რომან ჭანტურია ("ლოკომოტივი", თბილისი), ილია კერძევაძე ("მეტალურგი", რუსთავი), დავით დარციმელია ("ლოკომოტივი", თბილისი), დავით მაკარაძე ("დინამო" თბილისი).
შეგახსენებთ, აგვისტოში საქართველოს ნაკრებმა საკმაოდ წარმატებით იასპარეზა პალანგის თასზე, სადაც მეორე ადგილი დაიკავა. მანამდე სხვა საერთაშორისო ტურნირებშიც მოსინჯა ძალები და სამწვრთნელო შტაბს ჰქონდა იმის საშუალება, რომ გუნდის პლუს-მინუსები პრაქტიკაში დაენახა, შესარჩევ ტურნირამდე იმის დროც იყო დარჩენილი, რომ ხარვეზები შეძლებისდაგვარად გამოსწორებულიყო.
მწვრთნელები ყველაზე დიდ ნაკლად ფიზიკურ მომზადებას მიიჩნევდნენ, რამაც საერთაშორისო ტურნირებში ყველაზე თვალნათლივ იჩინა თვალი. შეკრებებზე ერთ-ერთი ძირითადი აქცენტი სწორედ ამ კომპონენტის გაუმჯობესებაზე კეთდება და იმედია, ყველაზე მნიშვნელოვან მომენტში ფიზიკური მომზადებით არავის ჩამოვრჩებით.
დამაკმაყოფილებელი არ იყო ფეხბურთელთა ტექნიკურ-ტაქტიკური მომზადების დონეც და პრაქტიკული თუ თეორიული საფეხბურთო ცოდნის გაღრმავება ბიჭებს პირდაპირ ნაკრებში უწევდათ.
მაისურაძე "ლელოსთან" შარშანდელ ინტერვიუში საერთაშორისო გამოცდილების აუცილებლობაზეც საუბრობდა. ფეხბურთელთა უმრავლესობა საზღვარგარეთ ნაკრებთან ერთად პირველად გავიდა და საკმაო დრო გახდა საჭირო იმისთვის, რომ ჩვენს 17-წლამდელებს სახელიანი მეტოქეების წინააღმდეგ მღელვარების გარეშე ეთამაშათ. ნაკრებმა, როგორც აღვნიშნეთ, არაერთი უცხოური ტურნირი თუ შეკრება მოიარა და ეს შედეგებზეც აისახა. სხვა რომ არაფერი ვახსენოთ, ბაქოში გამართულ "კასპიის თასზე" ესპანეთის ნაკრებთან მიღწეული ფრეც კმარა.
მოუგვარებელ პრობლემად კი საკმაოდ მწირი კონკურენცია და საკადრო არჩევანი რჩება. იმ ქვეყნებს, რომლებიც ევროპის ჩემპიონატის ფინალურ ეტაპზე მოხვედრის ამბიცია აქვთ, ნებისმიერ ასაკობრივ ნაკრებში ყველა პოზიციაზე რამდენიმე ძლიერი ფეხბურთელი ჰყავთ, ჩვენთან კი კონკურენცია დაბალია და ზოგ პოზიციაზე ორი სრულფასოვანი მოთამაშეც არ მოგვეძებნება.
სამწუხაროა ისიც, რომ 17-წლამდელთა ამ ფორმაციის ნაკრებში რეგიონებიდან სულ რამდენიმე ფეხბურთელია წარმოდგენილი და ნაკრების წევრთა აბსოლუტური უმრავლესობა დედაქალაქელია, რაც კიდევ ერთხელ მიუთითებს რეგიონებში ბავშვთა ფეხბურთში არსებულ მწვავე პრობლემებზე.
თუმცა მაისურაძე მიიჩნევს, რომ არც ეს თაობაა ხელწამოსაკრავი და სწორი მუშაობისა და განვითარების შემთხვევაში, ამ ფეხბურთელებსაც ბევრის მიღწევა შეუძლიათ. ქართველ ბავშვებს საფეხბურთო ნიჭი აშკარად აქვთ და ტალანტებისა და პოტენციური ვარსკვლავების აღმოჩენა ნებისმიერ ასაკშია შესაძლებელი.
რაც შეეხება ჩვენს უახლოეს მეტოქეებს, ბრძოლა სამივესთან რთული გველის, თუმცა ელიტრაუნდში გასვლის სერიოზული შანსი გვაქვს. სამწვრთნელო შტაბმა მოწინააღმდეგეთა მატჩების ვიდეოჩანაწერები მოიპოვა, გააანალიზა და სათანადო დასკვნებიც გამოიტანა.
შეგახსენებთ, ბოლო წლებში საქართველოს 17-წლამდელთა ნაკრები ყოველთვის ახერხებს პირველი შესარჩევი ბარიერის გადალახვას და იმედია, ეს გუნდი ამ სასიამოვნო ტრადიციას გააგრძელებს.
ყოველდღიური სპორტული გაზეთი "ლელო"
