მატჩის შესახებ თხრობა აუცილებლად იმ მომენტის გახსენებით უნდა დავიწყოთ, რომელიც 68-ე წუთზე მოხდა. “ვიტ ჯორჯიას” მეკარე არდალიონ მიქაბერიძემ თანაგუნდელისგან ფეხით მიღებული ბურთი ხელით დაიჭირა და როგორც ასეთ შემთხვევებში ხდება ხოლმე, არბიტრმა თავისუფალი დარტყმა დანიშნა.ბურთიდან კარამდე ხუთი-ექვსი მეტრი იყო და, შესაბამისად, “ზესტაფონს” გოლის გატანის შესანიშნავი შანსი ჰქონდა. ცოცხალ კედელში მთელი “ვიტ ჯორჯია” ჩადგა, კახა ალადაშვილმა კი ბურთი მიზანში მოარტყა და სტუმრებმა გოლი იზეიმეს. თუმცა ამ ზეიმმა სულ რამდენიმე წამს გასტანა. ლაშა სილაგავამ დარტყმის გამეორება მოითხოვა და “ზესტაფონმა” მეორე შანსი ვეღარ
სადავო მომენტის ვიდეოგამეორებისას აშკარად ჩანს, რომ “ზესტაფონს” გოლი მსაჯის სასტვენის შემდეგ გააქვს. ამაზე არანაკლებ საინტერესო ისაა, რომ ალადაშვილის დარტყმამდე სილაგავამ მეორედაც ჩასტვინა და ვიტელთა ცოცხალი კედლის მოსაწესრიგებლად დაიძრა...
ამ დანაკარგის მიუხედავად, “ზესტაფონმა” ლიდერობა შეინარჩუნა, რადგან მისმა ერთმა მდევარმა მარცხი იწვნია, მეორე კი ფრეს დასჯერდა. მოკლედ, ლიდერთა სამეულისთვის მძიმე ტური გამოდგა.
თემქაზე გამართული შეხვედრა სანახაობრივი და შინაარსიანი გამოდგა. ასეთი დონის მატჩი ტურში ერთი მაინც რომ იმართებოდეს, ჩვენი უმაღლესი ლიგით უთუოდ მეტი ქომაგი დაინტერესდებოდა.
“ზესტაფონმა” იმ დონის ფეხბურთი გვიჩვენა, მისი შემადგენლობისა და პირობების გუნდს რომ ეკადრება, მაგრამ მასპინძელთა ახალგაზრდული გუნდის სასახელოდ უნდა ითქვას, რომ გაცილებით გამოცდილი და მრავლისმნახველი ფეხბურთელებით დაკომპლექტებულ მეტოქეს ტოლი არაფერში დაუდო. სათამაშო უპირატესობას უმეტეს დროს “ზესტაფონი” ფლობდა, მაგრამ დროდადრო “ვიტ ჯორჯიაც” თამამად უტევდა და სწრაფი კონტრიერიშებით ფეროელებს თავსატეხს უქმნიდა.
“ვიტ ჯორჯიადან” კვლავ მისი კაპიტანი გიგა ბეჭვაია გამოირჩეოდა, რომელსაც მხარს კარგად უბამდა გიორგი ჯანელიძე. თუმცა მატჩის გმირი მაინც მასპინძელთა კარის დარაჯი მიქაბერიძე იყო, რომელმაც თავისი გუნდის კარი რამდენიმეჯერ იხსნა.
ანგარიში ეფექტური გოლით გაიხსნა. ბეჭვაიამ გურამ გურეშიძის ფლანგური გადაცემა მიიღო, ორი მეურვე ჩამოიცილა და თავისიანები დააწინაურა. მალე ბესიკ ჩიმაკაძემ ხელსაყრელი პოზიციიდან ააცილა, რისთვისაც მისი გუნდი ორიოდე წუთში დაისაჯა. ზაალ ელიავამ ბურთი საჯარიმოში ჩაჰკიდა, სადაც ყველას გელაშვილმა დაასწრო და თავურით წონასწორობა აღადგინა.
თამაში ორმხრივი შეტევებით გაგრძელდა, მაგრამ მიქაბერიძეს როინ კვასხვაძეზე მეტი საქმე ჰქონდა. შესვენებამდე “ზესტაფონის” კიპერი ჩიმაკაძის დარტყმას გაუმკლავდა, მიქაბერიძემ კი სამი ბრწყინვალე “სეივი” შეასრულა – ჯერ ხიდეშელის თავური მოიგერია, მერე პირისპირ გასულ გელაშვილს არ გაატანინა, ბოლოს კი ჯაბა დვალის ორიოდე მეტრიდან შესრულებულ დარტყმას გადაეღობა.
იქმნებოდა შთაბეჭდილება, რომ “ზესტაფონი” მეორე ტაიმში მეტოქეზე ზეწოლას გააგრძელებდა და გამარჯვების გოლს მაინც გაიტანდა, მაგრამ მეორე ნახევარში ვიტელები კიდევ უფრო ყოჩაღად გამოიყურებოდნენ,ფიზიკურ მომზადებაში სტუმრებს არ ჩამოუვარდებოდნენ და ბოლოსღა დაიწყეს ფრის შესანარჩუნებლად თამაში. მასპინძელთაგან ისევ ჩიმაკაძემ დაარტყა არაზუსტად, შეხვედრის დასკვნით ნაწილში კი ყველაზე შესამჩნევი შეცვლაზე შესული რატი წინამძღვრიშვილი იყო, რომლის სამივე თავური ძალიან სახიფათო, მაგრამ სამივე ოდნავ არაზუსტი გამოდგა.
ნამატჩევ ვნებათაღელვაზე მიმოხილვის შესავალში გიამბეთ. მატჩის შედეგმა გული ზესტაფონელებს დასწყვიტა, მაგრამ ვეჭვობთ, “ვიტ ჯორჯიასთან” ჩემპიონობის სხვა პრეტენდენტებმა გაილაღონ. ასე რომ, თემქაზე მოპოვებულ ქულას სულაც არ ადევს იმ ქულების ფასი, “ზესტაფონი” შინ “კოლხეთსა” და “სიონთან” რომ დასჯერდა.
02.04. თბილისი. შატილი. 600 მაყურებელი
ვიტ ჯორჯია-ზესტაფონი 1:1
1:0 ბეჭვაია (15. გურ. გურეშიძის პასით), 1:1 გელაშვილი (23. ელიავას პასით)
ვიტ ჯორჯია ზესტაფონი
4-2-3-1 4-4-2
ა. მიქაბერიძე რ. კვასხვაძე
ხურცილავა ალადაშვილი
ადამაძე ხიდეშელი
კასრაძე გ. ონიანი
ღანიაშვილი ელიავა
ვასაძე დაუშვილი
გურ. გურეშიძე ბაბუნაშვილი
ბეჭვაია ძარია
ჯანელიძე გრიგალაშვილი
კორიფაძე დვალი
ჩიმაკაძე გელაშვილი
მწვრთნელი მწვრთნელი
მ. კოჭლაშვილი გ. გეგუჩაძე
ვიტ ჯორჯია
81. კორიფაძე – გოგიაშვილი
82. ბეჭვაია – მაისაშვილი
83. ჩიმაკაძე – როსტიაშვილი
სათადარიგოები: ძაძამია, ჭანკვეტაძე, გიორგი გურეშიძე, ზაქრაძე
ზესტაფონი
59. გრიგალაშვილი – გორგიაშვილი
75. დვალი – წინამძღვრიშვილი
77. ბაბუნაშვილი – ბენაშვილი
სათადარიგოები: მამალაძე, მ. კობახიძე, გრუიცა, ფოფხაძე
გაფრთხილება: ელიავა (33), ბაბუნაშვილი (40), ღანიაშვილი (44), დვალი (68), დაუშვილი (70)
გაძევება: გელაშვილი (მატჩის შემდეგ)
არბიტრი: ლ. სილაგავა
