უკვე გაცნობეთ, რომ ზუგდიდის "ბაიას" დაფინანსება თხილის ბიზნესით დაკავებულ იტალიურ კომპანიას აქვს გადაწყვეტილი. თუ არაფერი შეიცვლება, სამეგრელოში დასაქმებული ეს ფირმა კლუბის სპონსორობას საბოლოოდ დათანხმდება, ხელშეკრულების გაფორმება 27 ივნისისთვის იგეგმება. "ბაიას" ახალი სპონსორის სახელსაც, ალბათ, სწორედ ამ დღეს შევიტყობთ.უახლოესი დღეებისთვისაა ნავარაუდევი "ბაიას" ფეხბურთელთა, მწვრთნელთა და პერსონალის სახელფასო დავალიანების გასტუმრებაც. გუნდმა კი ახალი სეზონისთვის მზადება უკვე დაიწყო. ელგუჯა ქომეთიანი გუნდს ჯერჯერობით ზუგდიდში ავარჯიშებს. ფეხბურთელები ჯერ ფიზიკური კონდიციების გაუმჯობესებაზე მუშაობენ, საკონტროლო მატჩები კი მოგვიანებით გაიმართება. რამდენიმე დღეში, წესით, ბაკურიანული შეკრება უნდა დაიწყოს.
ყოველდღიური სპორტული გაზეთი "ლელო"
