საქართველოს ჩემპიონატის დაწყებამდე თვეზე ოდნავ მეტი დარჩა და ამ პერიოდის განმავლობაში ჩვეულებისამებრ მოგაწვდით ცნობებს უმაღლესლიგელთა მზადების შესახებ. ამაზე უფრო მნიშვნელოვანი კი ის არის, როგორი ფინანსური რესურსებით შეხვდებიან კლუბები ახალ სეზონს.რამდენიმე დღის წინ ამ თემას უკვე შევეხეთ და დავინტერესდით, მზად არიან თუ არა უმაღლესლიგელები ჩემპიონატში სამონაწილეო თანხის, 60 ათასი ლარის (40 ათასი უმაღლესი ლიგისთვის, 20 ათასი დუბლებისა და ჭაბუკთა ლიგისთვის) გადასახდელად. კლუბების უმრავლესობისგან დადებითი პასუხი მივიღეთ, რამდენიმე უმაღლესლიგელს კი ისეთი გაურკვეველი ვითარება ჰქონდა, მათთვის ამ შეკითხვის დასმა ნამდვილად უადგილო იქნებოდა.
"ზესტაფონს", "დინამოს", "მეტალურგს, "გაგრას", "ტორპედოს", "ვიტ ჯორჯიასა" და "სპარტაკს" სტაბილური ბიუჯეტი აქვთ და სეზონისთვისაც მეტ-ნაკლებად სრულყოფილად ემზადებიან, სადღეისო მონაცემებით, არასოლიდური, თუმცა სტაბილური დაფინანსება აქვთ უმაღლეს ლიგაში გადმოსულ მარტვილის "მერანსა" და გორის "დილას" და იმედია, მათ პრობლემებზე წერაც არ მოგვიწევს, აი, დანარჩენი სამის ამბავი კი უფრო რთულადაა, თუმცა პრობლემები აქაც სხვადასხვა სიმძიმისაა.
ამ სამი კლუბის მდგომარეობა სათითაოდ განვიხილოთ და მათი ბოლოდროინდელი გასაჭირის მცირე ქრონიკაც აღვიდგინოთ.
ბაია
თუ ცნობილმა იტალიურმა კომპანია "ფერერომ" დანაპირები შეასრულა და "ბაიასთან" კონტრაქტი გააფორმა, ხელმოკლე უმაღლესლიგელთა სია ერთით შემცირდება. იმედი დავიტოვოთ, რომ ზუგდიდელთა პრობლემებზე "ლელოს" დღევანდელ ნომერში უკანასკნელად ვმსჯელობთ და "ბაიას" სატკივარს ამიერიდან მხოლოდ წარსულ დროში ვახსენებთ ხოლმე. ზუგდიდური კლუბის დაფინანსების საკითხს ნათელი, წესით, დღეისთვის უნდა მოეფინოს.
შარშან ზაფხულს "ბაია" სეზონისთვის დიდი ამბიციებით ემზადებოდა, შემადგენლობაც სოლიდური შეკრიბა, რომლის შენარჩუნების შემთხვევაშიც უმაღლეს ლიგაში დასარჩენად ბრძოლას ნამდვილად არ დასჯერდებოდა.
"ბაიამ" სეზონი მძლავრად დაიწყო, მაგრამ ფინანსურმა პრობლემებმა მალე იჩინა თავი და უხელფასობით გაწამებულმა არაერთმა ფეხბურთელმა გუნდი ჩემპიონატის პირველი ეტაპის დასრულებამდე დატოვა და "ბაია" ადგილობრივი ახალგაზრდების იმედად დარჩა. კლუბში ვითარება კარდინალურად შეიცვალა და ცოტა ხნის წინ წელგამართულ "ბაიას" არა მხოლოდ სახელფასო, სამგზავრო და კვების ფულის შოვნა გაუჭირდა.
ამდენი თავსატეხის მიუხედავად, ზუგდიდელმა ჭაბუკებმა და სამწვრთნელო შტაბმა სეზონი მართლაც რომ გმირულად ჩაამთავრეს და ჩემპიონატი მე-6 ადგილზე დაასრულეს.
ზაფხული "ბაიასთვის" სრული უიმედობით დაიწყო, მაგრამ გვირაბის ბოლოს სინათლე გამოჩნდა და იმედია, ამ გვირაბს ზუგდიდელები აღარდაუბრუნდებიან.
კოლხეთი
ფოთელთა საქმე კი გაცილებით უარესადაა. რამდენიმე დღის წინ გუნდის მთავარი მწვრთნელი სოსო ფილია იმედს გამოთქვამდა, რომ "კოლხეთს" სერიოზული ინვესტორები გამოუჩნდებოდნენ, მაგრამ ჯერჯერობით დაფინანსება არც ქალაქის პორტისგან ჩანს და არც სხვა სპონსორი უნახავს ვინმეს.
არადა, დრო აღარ ითმენს. დაფინანსება რომც მიიღოს, შეკრებაგაუვლელ "კოლხეთს" სეზონის მაღალ დონეზე ჩატარება გაუჭირდება. ყოველივე ეს საუკეთესო შემთხვევაში თუ მოხდება, თორემ კლუბის წევრებს დღეს ესეც სანატრელი აქვთ.
მოკლედ, ფოთელები იმედს არ კარგავენ, მაგრამ სხვა საქმეა, აქვს თუ არა ამ იმედს რაიმე საფუძველი. კარგია, რომ საქართველოს ფეხბურთის ფედერაციის ძალისხმევით ფოთის სტადიონს რეკონსტრუქცია უტარდება და იმედი დავიტოვოთ, რომ "კოლხეთი" ქალაქის საფეხბურთო ინფრასტრუქტურის მსგავსად განვითარდება.
რაც შეეხება შარშანდელ სეზონს, "კოლხეთს" სოლიდური სახსრები არასდროს ჰქონია, თუმცა სეზონის დასაწყისში მეტ-ნაკლებად სტაბილური ბიუჯეტი ჰქონდა და რამდენიმე გამოცდილი ფეხბურთელიც დაიმატა. თუმცა, "ბაიას" მსგავსად, არაადგილობრივთა შენარჩუნება ვერც "კოლხეთმა" შეძლო, ამას მთავარი მწვრთნელის თანამდებობიდან ბესიკ შეროზიას, ხოლო პრეზიდენტობიდან თემურ ბარქაიას გადადგომა მოჰყვა და კლუბი თითქოს განწირული იყო, მაგრამ გამოცდილი ფილიას ხელმძღვანელობით უმაღლეს ლიგაში დარჩენა მაინც მოხერხდა.
ვნახოთ, ახლა მაინც თუ დაადგება "კოლხეთს" საშველი...
სიონი
ბოლო სეზონებში "სიონს" ქართული საზომებით სოლიდური ბიუჯეტი ჰქონდა, მაგრამ 2006 წლის შემდეგ, როცა ბოლნისელები საქართველოს ჩემპიონები გახდნენ, ხელშესახები წარმატებისთვის აღარ მიუღწევიათ. ამის მიზეზები კლუბის ხელმძღვანელობამ უნდა ეძებოს, ჩვენი აზრით კი, "სიონის" საშუალო დონის გუნდობა, უპირველესად, არაეფექტური საკადრო პოლიტიკის ბრალი იყო.
ვერ გეტყვით, "სიონის" პერმანენტული წარუმატებლობები მობეზრდა კლუბის სპონსორ "მადნეულს" თუ სხვა მიზეზია, მაგრამ ფაქტია, რომ ახალი სეზონისთვის "სიონს" ჯერ თეთრიც არ მიუღია და, შესაბამისად, არც შეკრება დაწყებულა და არც ის არის ცნობილი, რომელი მწვრთნელები და ფეხბურთელები დაიწყებენ ახალ სეზონს.
ითქვა ის ვერსიაც, რომ თითქოს "მადნეული" "სიონის" ნაცვლად ბათუმური კლუბის დაფინანსებას აპირებდა, მაგრამ ბოლო დროს აღარც ამაზე ლაპარაკობენ. "სიონის" წევრებს თავი მხოლოდ იმით შეუძლიათ დაიმშვიდონ, რომ "მადნეული" კლუბს წინა ზაფხულებშიც ბოლო მომენტში უმტკიცებდა ბიუჯეტს, შარშან კი გუნდი მზადებას სულაც სეზონის დაწყებამდე ერთი კვირით ადრე შეუდგა.
ასეთ პირობებში კი სოლიდურ მიზნებზე ლაპარაკი უადგილოა, "სიონის" საკითხი დადებითად რომც გადაწყდეს, მისი სახით ამბიციურ კლუბს, ალბათ, არც ახალ სეზონში უნდა ველოდოთ.
ყოველდღიური სპორტული გაზეთი "ლელო"
