ტორპედოელები ცხინვალის "სპარტაკთან" თამაშამდე

ქუთაისის "ტორპედო" XXIII ეროვნული ჩემპიონატის მე-9 ტურის მატჩს, საკუთარი მაყურებლის წინაშე 16 ოქტომბერს გამართავს.

"ტორპედოს" მორიგი მეტოქე ცხინვალის "სპარტაკი" იქნება, რომელიც მიმდინარე გათამაშების სატურნირო ცხრილში X ადგილზე იმყოფება.
იმასაც შეგახსენებთ, რომ ცხინვალელებმა სეზონის პირველი გამარჯვება, ჩემპიონატის ბოლო ტურში მოიპოვეს, როცა თბილისის "ვიტ ჯორჯია" 2:1 დაამარცხეს.

"სპარტაკთან" მატჩამდე ერთ-ერთი ბოლო ვარჯიშის წინ, "ტორპედოს" რამდენიმე ფეხბურთელს გავესაუბრეთ, რომლებმაც კარგად გადმოგვცეს გუნდში არსებული ატმოსფერო.

დავით დიღმელაშვილი: "განწყობა, როგორც ყველა თამაშზე - საბრძოლო და მოსაგებია. მეტი სერიოზულობით ვემზადებით "სპარტაკთან" თამაშისთვის და მწვრთნელიც ცდილობს, იმ მოკლე ხანში რაც ის გუნდშია მოსული, მისი წვლილი შეიტანოს ჩვენს წარმატებაში. ხელმძღვანელობის მხრიდან ყველა პირობაა შექმნილი, რომ თავდაჯერებულები ვიყოთ და ისე ვიგრძნოთ თავი, როგორც ფეხბურთელებმა".

ომარ მიგინეიშვილი: "ამინდიც გამოვიდა, როგორც იქნა აცივდა ცოტა და ვფიქრობ, კარგი თამაში იქნება. ხელოვნური განათება, კარგი მინდორი, ტრიბუნებზე ბევრი მაყურებელი და მეტი რა უნდა ინატრო ფეხბურთელმა შედეგის ჩვენებისთვის".

გრიგოლ დოლიძე: "სპარტაკთან" ისევე როგორც ყველა მეტოქესთან, მოსაგებად გავდივართ მინდორზე. დარწმუნებული ვარ, ჩვენგან არავინ არაფერს დაიშურებს, რომ მაყურებელი კიდევ ერთხელ გავახაროთ".

"სპარტაკთან" შეხვედრა 18 საათზე დაიწყება. მასზე ფედერაციის მიერ მოვლენილია მსაჯთა ბრიგადა თორნიკე გვანცელაძის ხელმძღვანელობით, რომელსაც დაეხმარებიან ლაინსმენები გურამ ჩიგოგიძე და ზაზა ფიფია. მეოთხე მსაჯის ფუნქციას ჯენერი ხორავა შეასრულებს.

ეროვნული ჩემპიონატების ჩატარების დღიდან, ქუთაისის "ტორპედო" (პირველ სამ ჩემპიონატში ჩვენი გუნდის სახელი "ქუთაისი" იყო) ცხინვალელთა სახელით მოთამაშე 3 გუნდსაა შენახვედრი. გაგაცნობთ ამ გუნდებთან შეხვედრებში ქუთათურთა მიერ ნაჩვენებ შედეგებს (ქრონოლოგიური მიმდევრობით) და მათგან გატანილი გოლების ავტორთა ვინაობას.

I ჩემპიონატი
25.06.1990. "ქუთაისი"-"ლიახვი" 6:0 - გრიგოლ თევზაძე (2), თემურ ფაიქიძე, იასონ ბზიკაძე, როსტომ თორღაშვილი, გიორგი დარასელია.
08.11.1990. "ლიახვი" არ გამოცხადდა.

XVII ჩემპიონატი
30.10.2005. "ცხინვალი"-"ტორპედო" 0:0
19.04.2006. "ტორპედო"-"ცხინვალი" 4:1 - ლევან კორღალიძე, გიორგი ყიფიანი, რევაზ კვერნაძე, მამუკა ღონღაძე.

თასის XVIII გათამაშება
03.10.2007. "ტორპედო"-"სპარტაკი" 0:2
05.11.2007. "სპარტაკი"-"ტორპედო" 4:0

XXII ჩემპიონატი
29.09.2010. "სპარტაკი"-"ტორპედო" 1:2 - ლაშა კემუხტაშვილი (2).
05.12.2010. "ტორპედო"-"სპარტაკი" 1:0 - თენგიზ ჩიკვილაძე.
20.03.2011. "სპარტაკი"-"ტორპედო" 2:2 - ნიკა საბანაძე (2).
18.05.2011. "ტორპედო"-"სპარტაკი" 1:0 - თენგიზ ჩიკვილაძე.

fctorpedo.ge