"სამტრედიაში" ქართველი გულშემატკივრისთვის კარგად ნაცნობი ორი ახალი ფეხბურთელი ჩაირიცხა – მიხეილ კაკალაძე და ლაშა ქებაძე. თავდამსხმელი კაკალაძე "სამტრედიაში" შარშანაც თამაშობდა – იგი იმერული კლუბის ღირსებას გასულ სეზონში იცავდა და გუნდი სეზონის მსვლელობისას დატოვა. ბოლოს კაკალაძე პირველი ლიგის ბინადარ "ბათუმში" ასპარეზობდა. შეგახსენებთ, ყველაზე წარმატებულად იგი თბილისის "დინამოში" თამაშობდა, როცა გია გეგუჩაძის გუნდის წამყვანი ფორვარდი იყო და 2004 წელს მნიშვნელოვანი როლი ითამაშა დედაქალაქური კლუბის უეფას თასის ჯგუფურ ეტაპზე მოხვედრაში.
რაც შეეხება საყრდენ ნახევარმცველ ქებაძეს, ბოლო წლებში იგი თბილისის "ლოკომოტივის" შემადგენლობაში სტაბილური თამაშით
გამოირჩეოდა და გუნდის ერთ-ერთი ლიდერი იყო. წესით, ორივე ახალწვეულმა "სამტრედიას" დიდი სამსახური უნდა გაუწიოს. ორივე მათგანი კლუბმა უკვე შეიყვანა განაცხადში, კაკალაძემ კი გუშინწინ საქართველოს თასის მეთექვსმეტედფინალში "ჭიათურას" კარში გოლის გატანაც მოასწრო.
სავარაუდოდ, კაკალაძესაც და ქებაძესაც "სამტრედიას" შემადგენლობაში ეროვნული ჩემპიონატის უახლოეს ტურშივე ვიხილავთ. 29 აგვისტოს გელა სანაიას გუნდი რუსთავში "ვიტ ჯორჯიას" სტუმრობს.
