26 წლის გიორგი დათუნაიშვილი ქუთაისის "ტორპედოს" ერთ-ერთი საკვანძო ფეხბურთელია. ის ცენტრალური ნახევარმცველია, ჩამშლელიც არის და, თუ საქმეს დასჭირდა, წინ წასვლასა და გოლის გატანასაც ახერხებს.დათუნაიშვილი საკმაოდ გამოცდილი ფეხბურთელია და ტიტულებიც მოუხვეჭავს - საქართველოს ჩემპიონობაც მოუგია, თასიც და სუპერთასიც, "ტორპედოში" კი ჯერ უტიტულოდაა.
"ტორპედომ" სეზონის პირველი ეტაპი მეორე ადგილით ჩაამთავრა და, ცხადია, მაღალი მიზნებისთვის იბრძვის. ქუთაისელებმა პირველი ეტაპი სტაბილურად ვერ ითამაშეს, არცთუ ცოტა გაუთვალისწინებელი ქულა დაკარგეს.
დათუნაიშვილს "ტორპედოზე", მიმდინარე სეზონზე, პროგნოზებსა და აქეთურ-იქითურზე ვესაუბრეთ.
- "ტორპედომ" პირველ ეტაპზე სტაბილურად ვერ ითამაშა, უამისოდ
- სეზონი მართლაც ცუდად დავიწყეთ, მაგრამ ფაქტია, მერე ყველაფერი გამოვასწორეთ. საერთოდ კი, მონაგარი დადებითად უნდა შეფასდეს - მეორე ადგილზე ვართ და გვაქვს შანსი, კიდევ წავიწიოთ. ამის თქმის საფუძველს ის მაძლევს, რომ გუნდში ახალი მწვრთნელის მოსვლის შემდეგ თამაშის ხარისხიც გაუმჯობესდა და შედეგიც.
- "ტორპედოში" გია გეგუჩაძის მოსვლამდე გუნდს გიორგი კიკნაძე და ზაზა ზამთარაძე წვრთნიდნენ - რა მოხდა, ამ მწვრთნელების ხელში რატომ ვერ ახერხებდით უკეთესი შედეგის მიღწევას?
- მაშინ "ტორპედო" ჯერ კიდევ არ იყო შეკრული გუნდი, მერე კი ყველაფერი გამოსწორდა.
- თქვი, წინსვლის შანსი გვაქვსო, თუმცა რამდენიმე მატჩში გამოჩნდა, რომ "ტორპედოს" სრულყოფილებამდე ჯერ ბევრი უკლია - "დინამოსთან" სტუმრად 0:2 დამარცხდა, თასზე "ზესტაფონთან" წააგო.
- "დინამოსთან" სტუმრად მართლა ვერ ვითამაშეთ კარგად, მაგრამ ეს მხოლოდ ერთ მატჩში მოხდა. რაც შეეხება "ზესტაფონთან" სათასო დაპირისპირებას, მეტოქემ ბოლო ოთხ წუთში გვაჯობა, ორივე გოლი რიკოშეტით გავიდა - ზესტაფონელებთან მარცხს უიღბლობას ვაბრალებ. ლიდერებთან კარგი და წარმატებული შეხვედრებიც გვქონდა - "დინამოს" შინ მოვუგეთ, "ზესტაფონს" - სტუმრად, "მეტალურგიც" დავამარცხეთ.
- რა არის ის ძირითადი ასპექტები, რაც გეგუჩაძემ შეიტანა "ტორპედოში"?
- საკუთარი ხედვა, ტაქტიკა და ზოგადი დამოკიდებულება ფეხბურთისადმი - ამის შემდეგ "ტორპედო" უკეთ შეიკრა და, ასე ვთქვათ, უფრო ფეხბურთს ვთამაშობთ.
- ასეთ კონტექსტში რა ფუნქცია დაგეკისრა? გარედან ისე ჩანს, რომ შენი მთავარი საქმე ზონების შევსებაა.
- ასე ვთამაშობთ: ყველა უტევს, ყველა თავს იცავს, ანუ თავდაცვა თავდამსხმელებისგან იწყება, შეტევა კი - მეკარისგან. რა თქმა უნდა, მე ზონების გადაკეტვაც მევალება, თუმცა არა მხოლოდ - შეტევაშიც დროულად უნდა ჩავერთო.
- "ტორპედომდე" ვიტჯორჯიელი იყავი, გოლის ალღო არ დაგეწუნებოდა და ყოფილ გუნდში არაერთი გადამწყვეტი ბურთი შეგიგდია, მაგალითად, გოლი გაგიტანია სუპერთასზე, თასის ფინალში... "ტორპედოში" კი ლიდერებთან გადამწყვეტი გოლები ჯერ არ გაგიტანია.
- "ვიტ ჯორჯიაში" ხუთი სეზონი ვითამაშე, "ტორპედოში" კი ჯერ მხოლოდ მეორეს ვთამაშობ და ვფიქრობ, ყველაფერი წინ არის, ამ სეზონის გადამწყვეტი მატჩებიც.
- ჩემპიონობა ამ სეზონში - ეს "ტორპედოში" კატეგორიული მოთხოვნაა?
- არა, ასე კატეგორიულად არ დგას საკითხი, მოთხოვნა სწორი თამაში და ევროსარბიელზე გასვლაა. მოსამზადებელ პერიოდში არაერთი ნიჭიერი ფეხბურთელი დავიმატეთ, აქცენტი ახალგაზრდებზე კეთდება. შესაძლოა, უცებ ვერ მივიღოთ შედეგი, მაგრამ გუნდის შეკვრითა და შენებით შედეგი აუცილებლად იქნება.
- სხვა მოწინავე გუნდებმა მართლაც ხმაურიანი ტრანსფერები გაჩარხეს, გოგიტა გოგუა და გიორგი მერებაშვილი "დინამოში", დავით მუჯირი - "ზესტაფონში"...
- ეს ხელს შეუწყობს საქართველოს ჩემპიონატის დონის ამაღლებას და იმედია, მაყურებელიც მეტი გვეყოლება. კარგია, რომ "დილაშიც" გაჩნდა ინვესტიციები და ლაშა სალუქვაძისა და გოჩა ხოჯავას მიწვევა სურთ - ეს იმას ნიშნავს, რომ კლუბი სერიოზული წინსვლისთვის ემზადება.
- "დინამომაც" და "ზესტაფონმაც", ასე ვთქვათ, თამაშის გამკეთებელი ფეხბურთელები დაიმატეს - როგორ ფიქრობ, "ტორპედოს" ამბიციას ეს ხელს არ შეუშლის?
- მხოლოდ ხმაურიანი ტრანსფერები ჩემპიონობისთვის საკმარისი ვერ იქნება. თქმა რად უნდა, ასეთი ფეხბურთელების დამატებით ეს გუნდები გაძლიერდებიან, მაგრამ ყველაფერს დრო სჭირდება, საქართველოში დაბრუნებული ფეხბურთელების ადაპტაციასაც.
ყოველდღიური სპორტული გაზეთი "ლელო"
