ფოთის "კოლხეთი" თურქული შეკრებიდან დაბრუნდა და საზონის განახლებისთვის მზადებას შინ აგრძელებს. თურქულ შთაბეჭდილებებზე და სხვა თემებზე "კოლხეთის" მთავარ მწვრთნელ დავით მახარაძეს ვესაუბრეთ.- თურქული შეკრებით კმაყოფილები ვართ, კარგი პირობებში ვიყავით და რიგიანად მოვემზადეთ, საქმე ისე მიგვყავდა, რომ 15 თებერვალს საქართველოს ჩემპიონატის მე-19 ტურისთვის სათანადოდ ვყოფილიყავით მზად და სამწუხაროა, რომ უამინდობის გამო ტური გადაიდო.
- ახლა სად ემზადება "კოლხეთი"?
- ჯერჯერობით ფოთში, მთავარი სტადიონის სათადარიგო მოედანზე, ჩვენთან შედარებით გამოიდარა, თუ ისევ დიდთოვლობა იქნა, სავარაუდოდ გრიგოლეთში წავალთ სავარჯიშოდ.
- მე-20 ტურში "ვიტ
- ფოთში ჩამოსულები იყვნენ საქართველოს ფეხბურთის ფედერაციიდან და მითითებები მოგვცეს სტადიონის თაობაზე. ალბათ იცით, რომ მინდორი იდეალურ მდგომარეობაშია, მაგრამ სტადიონის რეკონსტრუქციის სხვა სამუშაოები დამთავრებული არ არის. ტრიბუნა ჯერ არ აქვს სტადიონს, რაც შეეხება გასახდელს, ეს საკითხი იმ დონეზე უნდა მოგვარდეს, რომ ფოთში "ვიტ ჯორჯიას" სტუმრობა შესაძლებელი გახდეს. ალბათ, "ვიტ ჯორჯიაც" არ იტყვის უარს ასეთ მინდორზე რომ ითამაშოს. ფედერაციის წარმომადგენლები 14 თებერვალსაც ჩამოვლენ და იმედია, ნებას დაგვრთავენ რომ 19 თებერვალს "ვიტ ჯორჯიას" ფოთში ვეთამაშოთ.
- თურქეთში გამართულ საკონტროლო შეხვედრებში უფრო რომელ ტაქტიკურ სქემას ამუშავებდით?
- ძირითადად 4-3-3 სქემას, რადგან გვინდა, რომ აქცენტი შეტევაზე გავაკეთოთ - ასეთი იყო მწვრთნელის დავალება. რა თქმა უნდა, ყველა რგოლი დაბალანსებული უნდა იყოს და ამაზეც ვმუშაობთ. თურქულმა შეკრებამ კარგად დაგვანახა ჩვენი ხარვეზებიც.
- და რა იყო "კოლხეთის" მთავარი ხარვეზი?
- შეტევიდან დაცვაზე გადაწყობა გაგვიჭირდა, ბურთს როცა ვკარგავდით, მერე ბევრი სახიფათო მომენტი იქმნებოდა ჩვენს კართან. ცენტრალურმა მცველებმაც ცოტა არ იყოს, არადამაჯერებლად ითამაშეს.
- გუნდს თურქეთში არ გაჰყვა ახალწვეული, ცენტრალური მცველი ბოიმო ფრიდოლინი...
- ეს ფორმალური პრობლემის გამო მოხდა, საკონსულოში ვიზა არ ჩაურტყეს.
- დანარჩენ ახალწვეულებზე რას გვეტყოდით?
- წაბრია ფოთელია და მისი შესაძლებლობები მანამდეც კარგად ვიცოდი, თურქეთში მან ნორმალურად წარმოაჩინა თავი. ხუბუტია ჯერ ძალიან ახალგაზრდაა და მასზე აქცენტს ვერ გავაკეთებთ, მიქაბერიძეს ზედმეტი წონის პრობლემა აქვს და თუ ძირითადში სურს თამაში, კილოგრამები უნდა დაიკლოს. ფოფხაძის კმაყოფილი ვარ, ხატიაშვილმა კი უნდა მოუმატოს, იგივე ითქმის წურწუმიაზეც. გაბუნია და სიჭინავა რიგიანად გამოყურებოდნენ, პავლიაშვილის კმაყოფილი ვარ, მეტს ველი ტუღუშისგან...
- თურქული შეკრების ბოლო საკონტროლო შეხვედრაში სოფიის "სლავიას" 2:1 მოუგეთ, რომელიც ბულგარეთის ჩემპიონატში ამ დროისთვის მე-5 ადგილზეა...
- როგორც ვიცი, "სლავია" ძირითადი შემადგენლობით გვეთამაშა და აშკარად ვაჯობეთ. ეს მატჩი დიდი დატვირთვების ფონზე არ გვითამაშია, ანუ ამ შეხვედრამდე ისე მივედით, როგორც გუნდი კალენდარული მატჩისთვის ემზადება და აქცენტი შედეგზე გვქონდა გადატანილი. შესაძლოა, "სლავია" სხვა კონდიციაში იყო და დიდი დატვირთვების ფონზე გვეთამაშა - ამაზე ინფორმაციას არ ვფლობ.
- როგორ ატყობთ, "კოლხეთი" მზად არის რვა საუკეთესო გუნდში მოსახვედრად?
- პირველი ორი თამაში, "ვიტ ჯორჯიასთან" და "მერანთან", უნდა მოვიგოთ, კარგი დასაწყისი ძალიან მნიშვნელოვანი იქნება, დადებითი ემოციური მუხტის შექმნა აუცილებელია. ისიცაა, რომ რვა გუნდში მოხვდრა მხოლოდ ჩვენზე არ იქნება დამოკიდებული, ისიც ბევრს განაპირობებს, სხვა გუნდები როგორ ითამაშებენ...
ყოველდღიური სპორტული გაზეთი "ლელო"
