6 მაისს მიმდინარე ჩემპიონატის ყველაზე მნიშვნელოვანი მატჩი გაიმართება: გალიდერებული "მეტალურგი" ერთადერთ კონკურენტს "ზესტაფონს" უმასპინძლებს. თამაშისთვის "მეტალურგი" განსაკუთრებული ჟინით ემზადება, რადგან მოგება ჩემპიონობის გაფორმების ტოლფასი იქნება. ამასთანავე, ეს იქნება საშუალება, რომ კონკურენტს თავისი უპირატესობა და პირველი ადგილზე ყოფნის საფუძვლიანობა დაუმტკიცოს.
მატჩის სამზადისზე რუსთაველთა მთავარ მწვრთნელს კობა ჟორჟიკაშვილს ვესაუბრეთ.
- ფაქტობრივად, "ზესტაფონთან" თქვენი შეხვედრა ჩემპიონატის ფინალია. მატჩისთვის როგორ ემზადებით?
- განსაკუთრებული მოტივაციით. "ზესტაფონს" 5 ქულით გავუსწარით, ჩემპიონი გუნდი კი ამას ვერ ეგუება და ცხადია,
- ამჟამად "მეტალურგი" აღმავლობის გზაზეა, "ზესტაფონმა" კი ბოლო ტურები ჩააგდო. თუმცა, ყველა დარწმუნებულია, რომ თქვენთან მოსაგებად ბოლომდე იბრძოლებს - საქმე პრესტიჟშია.
- ამაში მეც დარწმუნებული ვარ და ამიტომ, ფეხბურთელებს ვეუბნები, რომ არც ერთი წამითაც არ შეიძლება მოდუნება. გვყავს ძლიერი მეტოქე, რომელსაც ნიჭიერი ახალგაზრდა მწვრთნელი ავარჯიშებს, ძლიერი შემადგენლობით გამოირჩევა და მცირე შეცდომას არ გვაპატიებენ. ლიდერობის დაკარგვის გამო კი, ორმაგი მოტივაციით გვეთამაშებიან.
მაგრამ ვიმეორებ, შეხვედრა "მეტალურგისთვისაც" არანაკლებ პრინციპულია და ჩვენც არ გვაკლია ჟინი და მონდომება. ყველაფერს თავი რომ დავანებოთ, "ზესტაფონთან" მოგებით, ფაქტობრივად, ჩემპიონობისკენ მნიშვნელოვან ნაბიჯს გადავდგამთ.
- თქვენი აზრით, რა არის "ზესტაფონის" ის პლუსი, რომელსაც ყველაზე მეტად უნდა უფრთხოდეთ?
- ილია კოკაია "ზესტაფონს" გეგმაზომიერად ავითარდებდა. გუნდს ბევრი პლუსი აქვს და ყველას ვერც ჩამოვთვლი. მთავარი ისაა, რომ დღევანდელი შემადგენლობის ბირთვი 2008 წლიდან შეიკრიბა და ძალიან კარგად შეთამაშებული გუნდია. აქედან გამომდინარე, მისი დამარცხება ძნელი იქნება.
- მეტოქის მინუსებზე რას იტყვი?
- ამას ჩვენთვის დავიტოვებთ და შევეცდებით, გამოვიყენოთ.
- "ზესტაფონის" სერიოზული პრობლემები შეექმნა დაცვის ცენტრში: დაშავებულია კობახიძე, ექიმების პასუხს ელის ხიდეშელი და, რატომღაც, ონიანიც არ თამაშობს. ცხადია, მოწინააღმდეგის ამ პრობლემის გამოყენებას შეეცდებით.
- გულწრფელად გიპასუხებთ: "ზესტაფონში" სათადარიგოთა საკმაოდ გრძელი სკამია. ნებისმიერ ფეხბურთელს შეუძლია მოედანზე გასვლა და თამაშის გამწვავება თუ ძირითადის ფეხბურთელის სრულფასოვანი შეცვლა. მხოლოდ ონიანის უთამაშებლობის მიზეზი არ ვიცი.
- დღევანდელი "ზესტაფონი" გია გეგუჩაძის გუნდისგან რითი განსხვავდება?
- ყველა მწვრთნელს თავისებური ხედვა აქვს და თამაშსაც თავისებურად წარმართავს. ახლა გუნდს თავისი ხელი ჭიაბრიშვილმა დაატყო.
- თუმცა, ასეთი მოსაზრებაც არის, რომ 5-ქულიანი ჩამორჩენის გამო, "ზესტაფონმა" ჩემპიონობაზე ხელი ჩაიქნია.
- ამ აზრს კატეგორიულად ვერ დავეთანხმები. მარტო იმიტომ, რომ 4 ტურია დარჩენილი და შეუძლიათ, ჩვენი მცირე ჩავარდნითაც ისარგებლონ.
- თქვენ გუნდში ყველა ფეხბურთელი ჯანმრთელად არის?
- დანაკლისი გვაქვს: სამწუხაროდ, სევასტი თოდუა დაგვიშავდა, ლუკა რაზმაძემ კი დისკვალიფიკაციის გამო ვერ ითამაშებს. ეს ორი ფეხბურთელი ჩვენთვის დიდი დანაკლისია. მაგრამ გამოჯანმრთელდა ირაკლი მოდებაძე და ბოლო ტურში მარტვილში გაიტანა კიდეც.
"კობა ჟორჟიკაშვილი: მოგებით, ფაქტობრივად, ჩემპიონობას ვინაღდებთ" (იბეჭდება მცირე ცვლილებით)
ყოველდღიური სპორტული გაზეთი "ლელო"
