ქუთაისელი ქომაგები გიორგი დევდარიანს ემხრობიანო...

ქუთაისის "ტორპედო" გულშემატკივრებისთვის საინტერესო თემად იქცა. ხალხი სიახლეების მოლოდინშია. მიუხედავად იმისა, რომ რამაზ მუმლაძის ნაცვლად მთავარ მწვრთნელად გია გიგატაძე დაინიშნა, ქუთათურები მაინც სხვა მწვრთნელს ელიან და რამდენიმე კანდიდატურაც სახელდება. გიორგი დარასელიაზე უკვე მოგახსენეთ. როგორც გავიგეთ, გულშემატკივარს დარასელიას კანდიდატურა კი მოსწონს, მაგრამ ის ადარდებს, მთავარ მწვრთნელად რომ არ უმუშავია - მწვრთნელის შეფასების ეს ძალზე მნიშვნელოვანი კრიტერიუმიაო.

ქუთაისელ ქომაგთა ნაწილისთვის მნიშვნელოვანია მეორე კანდიდატურა - ჭაბუკთა (U 18) ნაკრების მთავარი მწვრთნელი გიორგი დევდარიანი. გაჟონა კულუარულმა ინფორმაციამ, თითქოს დევდარიანი "ტორპედოს" მწვრთნელობის მთავარი კანდიდატია.
გულშემატკივართა ნდობა ახალგაზრდა მწვრთნელის წარსულმა განაპირობა. იხსენებენ, რომ დევდარიანმა წარმატებით იმუშავა სხვადასხვა საფეხბურთო სკოლაში ("მთვარის გლობუსი", "ოლიმპი", "საბურთალო"), უმაღლესი ლიგასა ("თბილისი") და 17-წლამდელთა ნაკრებში.

არანაკლებ მნიშვნელოვანია, რომ ახალგაზრდა სპეციალისტი ყველგან აცოცხლებდა დავიწყებულ ქართულ ფეხბურთს, რაც ასე ხიბლავდა გულშემატკივარს. ეტყობა, მუშაობის სტილი და შედეგები ფანებისთვის მიმზიდველი აღმოჩნდა.

აქტუალური გახდა "ტორპედოს" მენეჯერის საკითხიც: ორი აზრი არ არის, რომ სერიოზულ მიზნებს შეჭიდებულ კლუბს საქმეში ჩახედული და თანამედროვედ მოაზროვნე მენეჯერი სჭირდება. უახლოეს პერიოდში ჭორ-მართალი გაირკვევა და გვეცოდინება, რა შეიცვლება ქუთაისის "ტორპედოში".


ყოველდღიური სპორტული გაზეთი
"ლელო"