32 წლის ნახევარმცველმა "დინამოსთან" კონტრაქტი დეკემბრამდე გააფორმა, თუმცა უფრო ხანგრძლივი ვადით დარჩენასაც არ გამორიცხავს...
- თბილისის "დინამოს" ძირითად შემადგენლობაში დიდი ხნის პაუზის
- ჯერ იმას ვიტყვი, რომ "ვიტ ჯორჯიასთან" გამარჯვებამ ძალიან გამახარა. ორმაგად ბედნიერი ვარ, თბილისის "დინამოს" ძირითადში თამაშით, რადგან თითქმის ერთწლიანი იძულებითი შესვენება მქონდა.
- "ვიტ ჯორჯიასთან" რამდენჯერმე გამოიჩინეთ თავი, მაგრამ საუკეთესო ფორმაში ჯერ ნამდვილად არ ხართ. უგუნდობის პერიოდში არ ვარჯიშობდი?
- გაჩერებული არ ვყოფილვარ, მაგრამ ამდენი ხნის განმავლობაში მხოლოდ ინდივიდუალური ვარჯიში საკმარისი არ არის. ბედნიერი ვარ, მთავარმა მწვრთნელმა "ვიტ ჯორჯიასთან" ძირითადში ჩემი დაყენება საჭიროდ რომ ჩათვალა. ვფიქრობ, გუნდის წარმატებაში წვლილი მეც შევიტანე. რა თქმა უნდა, იდეალური ფორმისგან შორს ვარ, მაგრამ ამ ეტაპზე ჩემი თამაში მაინც მაკმაყოფილებს. საქმე ისაა, რომ ფორმის აღსადგენად მცირე დრო მქონდა, თანაც, ეს თამაშისა და გუნდთან ერთად ვარჯიშის გარეშე წარმოუდგენელია. ალბათ, ძირითადში დაყენება ვარჯიშებისადმი ჩემი დამოკიდებულებითაც დავიმსახურე. მსურს, რაც შეიძლება მალე აღვიდგინო ფორმა. სამი კვირის განმავლობაში ამას "დინამოს" დუბლშემადგენლობაში ვცდილობდი... ვეცდები, უახლოეს მატჩებს უკეთეს მდგომარეობაში შევხვდე.
- "დინამო" თქვენთვის დროებითი გაჩერებაა?
- ვერ ვიტყვი, რომ აქ დროებით ვთამაშობ. "დინამოს" ხელმძღვანელობას შევხვდი და ამ თემაზე ველაპარაკე... 8 თვე გამიცდა და ამხელა შესვენების შემდეგ "დინამო" მესვეურები ჩემს შესაძლებლობებში უნდა დამერწმუნებინა. 2010 წელს საერთოდ არ მითამაშია და ფორმაში ვერანაირად ვერ ვიქნებოდი. "დინამოსთან" ხანმოკლე ხელშეკრულებაც იმიტომ გავაფორმე, რომ პირველ რიგში თავად დავრწმუნდე ჩემს შესაძლებლობებში. კლუბის ხელმძღვანელობას ამიტომაც განვუცხადე - წლის ბოლომდე უხელფასოდ ვითამაშებ-მეთქი.
- ეს თემა უყურადღებოდ დარჩა და აუცილებლად უნდა გკითხოთ - გასაგებია, რომ უხელფასოდ თამაში ერთგვარი ჟესტია, მაგრამ ფეხბურთელი ტაშისა და ფულისთვის თამაშობს...
- ცხადია, "დინამოს" ხელმძღვანელობამ გარკვეული ანაზღაურება შემომთავაზა, მაგრამ უხელფასოდ თამაში ჩემი ინიციატივა იყო. ნახავენ, რამდენად გამოვადგები "დინამოს" და თუ თანამშრომლობის გაგრძელება ორივესთვის მისაღები იქნება, შესაძლოა, იანვარში ახალ ხელშეკრულებაზეც დავილაპარაკოთ.
- უცხოეთში წასვლის იმედი დაკარგეთ?
- ამ ეტაპზე ვერაფერს გეტყვით. დასამალი არაფერი მაქვს, ბუბა ტყავაძესაც ვუთხარი, რომ არასაფეხბურთო ქვეყნებიდან შეთავაზებები მქონდა, მაგრამ არ წავედი და არც წავალ.
- ალბათ, აზერბაიჯანში გიწვევდნენ...
- კი, ისევე, როგორც სხვა პოსტსაბჭოურ ქვეყანაში, მაგრამ მაინც საქართველოს ჩემპიონატში უხელფასოდ თამაში ვამჯობინე. რაღაც პრინციპები ხომ არსებობს? ტყავაძეს ვუთხარი - თუ საინტერესო მიწვევა მექნა, ჩემი წასვლა საწყენი არ უნდა იყოს-მეთქი. დარწმუნებული ვარ, ამას გაგებით მოეკიდებიან. თუმცა იმას შევპირდი, რომ "დინამოდან" არასაფეხბურთო ქვეყანაში არ წავალ.
- კიდევ რომელ პოსტსაბჭოურ ქვეყანაში გიწვევდნენ?
- მენეჯერები მთავაზობდნენ, ბელარუსში თუ წახვალო, მოლდოვაში შენზე ვეტყვითო და ასე შემდეგ... რუსეთის პირველი ლიგის კლუბიდანაც დამიკავშირდნენ, მაგრამ მე ასეთ ლიგებში წასვლა არ მსურდა. დღეს ეს სიტუაციაა, მაგრამ რა იქნება ზამთარში, ვერაფერს გეტყვით. კვლავ ანალოგიური შემოთავაზებები თუ იქნა, რა თქმა უნდა, არჩევანს ისევ "დინამოს" სასარგებლოდ გავაკეთებ.
ყოველდღიური სპორტული გაზეთი
"ლელო"
