საქართველოს ჩემპიონმა "ზესტაფონმა" მიმდინარე სეზონის სტარტი აშკარად ჩააგდო. "მეტალურგთან" და "ტორპედოსთან" ზედიზედ ორი მარცხის შემდეგ კლუბის ხელმძღვანელობამ გიორგი ჭიაბრიშვილი მთავარი მწვრთნელის პოსტიდან გადააყენა, ბათუმის "დინამოსთან" მატჩისთვის კი გუნდი მისმა ასისტენტმა გიორგი ყიფიანმა მოამზადა.
სატურნირო თვალსაზრისით, უკეთეს მდგომარეობაში სტუმრებიც არ იყვნენ. გია გურულის გუნდმა საწყის სამ ტურში მხოლოდ ერთი ქულა მოიპოვა და შედეგი მასაც გასაუმჯობესებელი ჰქონდა. ყოველივე ამის გათვალისწინებით, ჩემპიონისა და ლიგაში წლეულს აღზევებული ბათუმის "დინამოს" დაპირისპირება საკმაოდ პრინციპული და მნიშვნელოვანი იყო.
გიორგი ყიფიანმა გუნდის შემადგენლობაში, წინა მატჩისგან განსხვავებით, გარკვეული ცვლილებები
შეხვედრა მასპინძლების უპირატესობით დაიწყო და მათ დებიუტშივე შეეძლოთ გოლის გატანა: მუჯირის წამოწყებული იერიშის შემდეგ მილხრაუმმა ფლანგიდან ცარიელი კარის წინ მდგარ დავით რაჟამაშვილს ზუსტი გადაცემა გაუკეთა. ზესტაფონელთა ნახევარმცველს კარის დალაშქვრაში ხელს არავინ უშლიდა, მაგრამ როგორღაც "მოახერხა" და ბურთი ხარიხას გადააცილა.
ცოტა ხანში დავით მუჯირმა შესანიშნავი პასით სტუმართა მთელი დაცვა უქმად დატოვა და აფციაური მეკარესთან პირისპირ გაიყვანა, მაგრამ ზესტაფონელთა კაპიტნის დარტყმა მამინაშვილმა მოიგერია.
ფეროელები უპირატესობას ფლობდნენ და ტაიმის ბოლომდე რამდენიმე საგოლე მომენტიც შექმნეს. განსაკუთრებით აღსანიშნავი დავით მუჯირის დარტყმა იყო, რომლის შემდეგაც ფარტენაძემ ცარიელი კარიდან გამოიტანა ბურთი და საკუთარი გუნდი აშკარა გოლისგან იხსნა.
შემდეგ თორნიკე გრიგალაშვილსაც შეეძლო ანგარიშის გახსნა, მაგრამ მამინაშვილი ამჯერადაც საიმედოდ გაისარჯა.
რაც შეეხებათ სტუმრებს, პირველ ტაიმში ისინი საკუთარი კარის უსაფრთხოებაზე ზრუნავდნენ და კვასხვაძის კარის მიმართულებით მხოლოდ ორჯერ დაარტყეს. ამირან მუჯირის გასროლილი ბურთი ხარიხას გადასცდა, ჯორბენაძის დარტყმა კი როინ კვასხვაძის ნადავლი აღმოჩნდა.
მეორე ტაიმის შუაწელამდე საინტერესო არაფერი მომხდარა. მასპინძლები უტევდნენ, მაგრამ რეალურ საგოლე მომენტებამდე საქმე არ მიდიოდა. 62-ე წუთზე კი ისინი თავად გადაურჩნენ გაშვებულ გოლს.
ზესტაფონელთა შეცდომის შემდეგ დიასამიძე წინ გამოსულ კვასხვაძეს თავზე უგდებდა ბურთს, თუმცა ბურთმა უცნაური ტრაექტორია მოხაზა და ხარიხას ზემოდან მოხვდა.
ზესტაფონელებმა ტემპს მოუმატეს და თითქოს გოლიც "მომწიფდა", მაგრამ გატანას ვინ დაეძებს, კინაღამ საკუთარ კარში მიიღეს ბურთი: ბათუმელთაგან ერთ-ერთმა გამორჩეულმა ნიკა დიასამიძემ მარცხენა ფლანგზე იაქტიურა და მეკარის ბაქანთან ტიმჩიშინს შესანიშნავი პასი გაუკეთა. უკრაინელის დარტყმა, რომელიც კარიდან დაახლოებით 4 მეტრში იმყოფებოდა, კვასხვაძეს შემთხვევით ფეხზე მოხვდა და "ზესტაფონი" ისევ გადარჩა.
დარჩენილ დროში მასპინძლები ბევრს ეცადნენ, მაგრამ გოლის გატანის შანსი არ მისცემიათ. "ზესტაფონმა" საკუთარ არენაზე ქულების დაკარგვას მოუხშირა და გულშემატკივრებიც გულნატკენი დატოვა. სტუმრებისთვის კი ჩემპიონთან გასვლაზე მოპოვებული ქულა მისაღები შედეგი უნდა იყოს.
საქართველოს პრემიერლიგა. IV ტური
02.09.ზესტაფონი. დ. აბაშიძე. 1200 მაყურებელი
ზესტაფონი-დინამო(ბთ) 0:0
ზესტაფონი ბათუმი
4-2-3-1 4-2-3-1
ნ. კვასხვაძე მამინაშვილი
ღონღაძე ქორიძე
კობახიძე ზ. ლობჟანიძე
თედ. გრიგალაშვილი ხუხია
თორ. გრიგალაშვილი ფარტენაძე
გორგიაშვილი მახარაძე
შარიქაძე გოგიტაძე
რაჟამაშვილი თევდორაძე
აფციაური ა. მუჯირი
მილხრაუმი ტიმჩიშინი
დ. მუჯირი ჯორბენაძე
მწვრთნელები:
გ. ყიფიანი გ. გურული
ზესტაფონი
55.აფციაური-ბაბუნაშვილი
64. რაჟამაშვილი-ჭანტურიშვილი
81. შარიქაძე-ბენაშვილი
სათადარიგოები: მამალაძე, ელიავა, კაჭკაჭიშვილი, ღირდალაძე
ბათუმი
32. მუჯირი-დიასამიძე
64. ჯორბენაძე-აბუსელიძე
70.თევდორაძე-სიჭინავა
სათადარიგოები: პიცანი, ბაჯელიძე, კაკულია, ხუბუა
გაფრთხილება:
ფარტენაძე (45), ტიმჩიშინი (54), თედ. გრიგალაშვილი (56), ღონღაძე (81), ჭანტურიშვილი (90)
არბიტრი: ა. ნონიკაშვილი
ყოველდღიური სპორტული გაზეთი "ლელო"
