უმაღლესი ლიგა: "დინამომ" "ჩიხურა" გაანადგურა

2 დეკემბერს საქართველოს ჩემპიონატის მე-18 ტურის სამი მატჩი გაიმართა.

საქართველოს მოქმედმა ჩემპიონმა "ზესტაფონმა" საკუთარ მოედანზე "ვიტ ჯორჯიასთან" ანგარიშით 1:2 წააგო. ელგუჯა ლობჟანიძემ 34-ე წუთზე სტუმრები დააწინაურა, ხოლო ზურაბ მენთეშაშვილმა 5 წუთში შეძლო ანგარიშის გათანაბრება. საბოლოო ანგარიში კი გიორგი კორიფაძემ 67-ე წუთზე დააფიქსირა.

ზესტაფონელთაგან განსხვავებით საშინაო მატჩი მოიგო ქუთაისის "ტორპედომ", რომელმაც ფოთის "კოლხეთს" უმასპინძლა. ანგარიში მატჩში ომარ გოგონაიამ 6-ე წუთზე გახსნა. 34-ე წუთზე კი ელგუჯა გრიგალაშვილმა ანგარიშის გათანაბრება შეძლო. გამარჯვების გოლის ავტორი 64-ე წუთზე ნიკა საბანაძე გახდა - 2:1.

ტურის ცენტრალური მატჩი უხვგოლიანი გამოდგა. თბილისის "დინამო" "დინამო არენაზე" საჩხერის "ჩიხურა" ანგარიშით 5:2 დაამარცხა. პირველი გოლი შეხვედრაში 5-ე წუთზე სტუმართა ფეხბურთელმა ჩიკვაიძემ გაიტანა. სულ რაღაც ორ წუთში ანგარიში ჩისკომ გაათანაბრა. 35-ე წუთზე კი ესპანელმა ლეგიონერმა დუბლის გაფორმება შეძლო.

შესვენებამდე სამი წუთით ადრე "ჩიხურამ" მაინც მოახერხა სხვაობის აღმოფხვრა. გოლი საკუთარ ანგარიშზე დავით კირკიტაძემ ჩაიწერა.

55-ე წუთზე "დინამოს" მხსნელად ისევ ესპანელი ფეხბურთელი ჩისკო მოევლინა, რომელმაც მესამე გოლის გატანა შეძლო და კვლავ დააწინაურა საკუთარი გუნდი. 72-ე წუთზე "დინამოს" მხრიდან თავი ისევ ლეგიონერმა გამოიჩინა. ამჯერად გოლი ალვარომ გაიტანა. 91--ე წუთზე ანგარიშში სხვაობა სამამდე ჯაბა დვალმა გაზარდა. საბოლოოდ "დინამომ" ანგარიშით 5:2 მოიგო.

ასევე იხილეთ:
უმაღლესი ლიგა: "დილამ" "მეტალურგი" დაამარცხა