ბოლო 14 მატჩში 13 გამარჯვება, - ვერაფერს ვიტყვით, მართლაც ჩინებული შედეგია და ისიც უნდა ვთქვათ, რომ ყოველივე ამის შემოქმედი გორის "დილა" სრულიად დამსახურებულად არის ჩართული "საჩემპიონო რბოლაში". ყველაფერს თავი რომ დავანებოთ, უშუალო კონკურენტ "დინამოსთან" უმტკივნეულესი მარცხის (0:3) მერე გორელები არ გამტყდარან და ორ ძლიერ მეტოქესთან ("ზესტაფონი", "მეტალურგი") გაიმარჯვეს. თანაც, არ დაგვავიწყდეს, თუ როგორი სატურნირო მოტივაცია ჰქონდათ რუსთაველებსაც, სუბიექტურ თუ ობიექტურ მიზეზთა გამო ამჟამად ზედა ექვსეულს მიღმა რომ არიან დარჩენილნი.
თუმცა 1 დეკემბერს გამართულ მართლაც საინტერესო და დაძაბულ შეხვედრაში "დილამ" მორიგი
ამის მიზეზი კი "მეტალურგის" მართლაც ჩინებული თამაში იყო: რუსთაველებმა სეზონის საუკეთესო თამაში უჩვენეს პირველ 45 წუთში, ძლიერ მეტოქესთან ტერიტორიული უპირატესობაც მოიპოვეს და დროის უმეტესი ნაწილი მოწინააღმდეგის საჯარიმოს სიახლოვეში გაატარეს.
მასპინძლებმა მეტოქეს მატჩის დასაწყისიდანვე სწრაფი ტემპი შესთავაზეს, თუმცა ირაკლი მაისურაძისა და ირაკლი სიხარულიძის დარტყმები არაზუსტი აღმოჩნდა.
ამის შემდეგ თამაში ოდნავ გათანაბრდა და ერთ ეპიზოდში ნათან ჟუნიორმა იაქტიურა, თუმცა "დილას" ბრაზილიელი ცენტრფორვარდის მიერ წამოწყებული კომბინაცია ირაკლი კლიმიაშვილმა ვერ დააგვირგვინა.
აი, ამის შემდეგ კი "მეტალურგმა" ერთიმეორეზე უკეთესი მომენტები გაანიავა: ჯერ ის ეპიზოდი იყო, გიორგი თექთურმანიძის ფლანგურ პასს დიმიტრი ტატანაშვილი რომ "გამოეხმაურა" და მასპინძელთა მტკიცებით, ბურთი სტუმართა მცველს ხელზე მოხვდა! შემდეგ კი რუსთაველებმა გოლის გატანის 100-პროცენტიანი შანსი გაუშვეს ხელიდან: ისევ თექთურმანიძის ფლანგური გარღვევა, ზუსტი ჩაწოდება მეტოქის საჯარიმოში და ტატანაშვილის 3-4 მეტრიდან თავით დარტყმული ბურთი "დილას" კარს ზემოთ წავიდა.
მერე უკვე მარინ სკენდერის "ჯერიც" დადგა: "დილას" ხორვატმა მეკარემ ჯერ მაისურაძის შორეული დარტყმა მოიგერია, შემდეგ კი - ტატანაშვილის.
ტაიმის ბოლო წუთზე კი სკენდერიც უძლური იყო თავისი გუნდი გადაერჩინა, მაგრამ მიხეილ მახვილაძის თავური დარტყმის შემდეგ ბურთი "დილას" კარის ძელს მოხვდა.
აქვე, ისიც უნდა ვთქვათ, პირველ ტაიმშივე ტრავმა მიიღო სანდრო გურულმა, თუმცა ამ მატჩშიც დამტკიცდა, რომ დღესდღეობით ყველაზე კარგად დაკომპლექტებული გუნდი სწორედ გორის "დილაა". ანუ, იგივე "მეტალურგისაგან" განსხვავებით, "დილაში" ნებისმიერ პოზიციაზე ორი სრულფასოვანი ფეხბურთელია და ისიც ნიშანდობლივია, რომ მატჩის ბედი სწორედ შეცვლაზე შემოსულმა მოთამაშეებმა გადაწყვიტეს.
თუმცა ამაზე ქვემოთ; მანამდე კი ის ვთქვათ, რომ პირველ ტაიმში გოგიტა გოგუას აქტიურობის შემდეგ "დილამ" ერთი-ორჯერ მეტ-ნაკლები ხიფათი შექმნა მასპინძელთა კართან, მაგრამ ზურაბ ბათიაშვილი უშეცდომოდ თამაშობდა.
აი, შესვენების მერე კი აბსოლუტურად განსხვავებული სიტუაცია იყო მოედანზე: ფაქტია, რომ გიორგი დარასელიას ჩინებულად შეუძლია შეგირდების მოტივირება და საერთოდაც, ამ მწვრთნელის პროგრესი აშკარაა.
ალბათ, ადრევე უნდა გვეთქვა, რომ 1 დეკემბერს "დილა" ოდნავ განსხვავებული ტაქტიკით (მხოლოდ ერთი საყრდენით - გიგა ბეჭვაია) თამაშობდა, მერე შეცვლაზე შემოსულმა ფეხბურთელებმაც გამოიჩინეს თავი და ვინც რა უნდა თქვას, მიგვაჩნია, რომ სტუმრებმა აბსოლუტურად დამსახურებულად გაიმარჯვეს.
მასპინძელთათვის პირველი "სიგნალი" მეორე ტაიმის დასაწყისში მიხეილ გორელიშვილის სახიფათო დარტყმა იყო: "დილას" 19 წლის დებიუტანტი ირაკლი კლიმიაშვილის ჩინებულ გადაცემას "ერთი შეხებით" აგვირგვინებდა, მაგრამ ბურთი მიზანს მცირე მანძილით ასცდა.
მერე იყო დავით კვირკველიას ჩინებული სოლო-რეიდი მარცხენა ფლანგზე, ასევე გამჭოლი გადაცემა რომ მოჰყვა, თუმცა ბეჭვაიას დარტყმაც მცირეოდენ არაზუსტი აღმოჩნდა.
საბოლოოდ სტუმრებს მონდომება დაუფასდათ: კვლავაც კლიმიაშვილმა იაქტიურა მარჯვენა ფლანგზე და მის მიერ ჩაწოდებულ ბურთს გორელიშვილმა ეფექტური თავური დარტყმა მოაყოლა.
გაშვებული გოლის მერე "მეტალურგმა" რამდენჯერმე გაიბრძოლა, მაგრამ სიხარულიძის, მახვილაძის და ტატანაშვილის მცდელობებს შედეგი არ მოჰყოლია. სამაგიეროდ, სტუმრებმა კიდევ ერთი ეფექტური გოლი გაიტანეს: მოედანზე დიდი ხნის პაუზის მერე გამოჩენილმა კახა ალადაშვილმა ჩინებულად შეასრულა საჯარიმო დარტყმა და თამაშიც, ფაქტობრივად, აქ მორჩა.
სამწუხაროდ, მატჩში ერთი ინციდენტი მაინც მოხდა: გოგიტა გოგუასა და ალექსანდრე ინწკირველის კინკლაობა "გუნდი-გუნდზე" ჩხუბში არ გადაზრდილა, თუმცა არც არაფერი აკლდა.
საბოლოოდ სტუმრები კაცნაკლულნი დარჩნენ, მაგრამ "ფოლადზე" მყოფთაგან, ალბათ, არავის ეპარებოდა ეჭვი, რომ "დილა" მორიგ გამარჯვებას მოიპოვებდა.
მატჩის შემდეგ
გიორგი დარასელია ("დილა"):
"ვიცოდით, რომ ხელოვნურ მოედანზე რთული მატჩი გველოდებოდა. საბედნიეროდ, მეორე ტაიმში ჩემი გუნდის ფეხბურთელებმა ყველაფერი გააკეთეს გამარჯვების მოსაპოვებლად. გორელიშვილი ამ მატჩში რომ ითამაშებდა, ეს გადაწყვეტილება წინა დღესვე ვიცოდი; რაც შეეხება გოგუას გაძევებას, ვფიქრობ, რომ არბიტრს შეეძლო მეორე ყვითელი ბარათი არ მიეცა".
გიორგი ყიფიანი ("მეტალურგი"):
"რთული მატჩი იყო და მართლაც ღირსეულ მეტოქესთან, ჩემპიონობის ერთ-ერთ კანდიდატთან წავაგეთ. პირველი ტაიმი კარგად ვითამაშეთ, უპირატესობაც გვქონდა. როგორც დავინახე, პენალტიც გვეკუთვნოდა. მეორე ტაიმში კი პოზიციური შეცდომის გამო გოლი გავუშვით.
სამწუხაროდ, მეორე გოლი იმ ჯარიმას მოჰყვა, რომელიც არ უნდა დანიშნულიყო. საერთოდაც, სამსაჯო საკითხი მისახედია: თითოეულ მატჩზე არბიტრების რაოდენობის გაზრდას ხარისხის მომატება სჯობია. თუმცა, ისე არ გამიგოთ, თითქოს დღევანდელ წაგებას მხოლოდ და მხოლოდ მსაჯებს ვაბრალებდე. იმასაც ვიტყვი, რომ ვიდრე თეორიული შანსი გვაქვს, ზედა ექვსეულში მოსახვედრად ბოლომდე ვიბრძოლებთ!"
საქართველოს ჩემპიონატი. უმაღლესი ლიგა. XVIII ტური
02. 12. რუსთავი. "ფოლადი". 500 მაყურებელი
მეტალურგი-დილა 0:2
გოლები: 0:1 გორელიშვილი (63, კლიმიაშვილის პასით), 0:2 ალადაშვილი (73)
Video
მეტალურგი - დილა 0:2
მეტალურგი - დილა 0:2
მეტალურგი დილა
4-1-3-2 4-1-4-1
ბათიაშვილი სკენდერი
ჯაფარიძე შაშიაშვილი
მახვილაძე სალუქვაძე
ინწკირველი გ. ონიანი
სუხიაშვილი კვირკველია
რაზმაძე ბეჭვაია
თექთურმანიძე ახალკაცი
ი. მაისურაძე კლიმიაშვილი
გ. მიქაბერიძე გოგუა
ტატანაშვილი ს. გურული
სიხარულიძე ჟუნიორი
მწვრთნელები:
გ. ყიფიანი გ. დარასელია
მეტალურგი
71. მიქაბერიძე - ხაბელაშვილი
81. თექთურმანიძე - დობროვოლსკი
87. რაზმაძე - დ. ჯანელიძე
სათადარიგოები: ბედიაშვილი, გავაშელიშვილი, ქავთარაძე, ხიდეშელი
დილა
19. გურული - გორელიშვილი
68. ახალკაცი - ალადაშვილი
79. ონიანი - თომაშვილი
სათადარიგოები: შეყრილაძე, აბურჯანია, მოდებაძე, გვალია.
გაფრთხილება: გოგუა (75), გოგუა (84), ინწკირველი (84)
გაძევება: გოგუა (84)
არბიტრი: თ. გვანცელაძე
ყოველდღიური სპორტული გაზეთი "ლელო"
