პირველ წრეში "ტორპედო" ფოთს ლიდერის რანგში ეწვია და დაკარგული ქულების გამო (1:1) პირველი ადგილიდან ჩამოქვეითდა. ქუთათურებს 1 დეკემბერს გამართულ შეხვედრაშიც ძალიან გაუჭირდათ. მართალია, დაგეგმილი სამი ქულა მოიპოვეს, მაგრამ ეს დიდი ნერვების ფასად დაუჯდათ. ფოთელებმა, რომლებსაც ჯერ ჩემპიონატში მოგება არა აქვთ, მეტოქეს დიდი წინააღმდეგობა გაუწიეს და დამაგვირგვინებელ ფაზაში რომ ეყოჩაღათ, ფრე კი არა, იქნებ სანატრელი გამარჯვებისთვისაც გამოეკრათ ხელი.
შეხვედრა მასპინძლებისთვის მძიმედ
გაშვებული გოლის შემდეგ გია გეგუჩაძის შეგირდები გონს კარგა ხანს ვერ მოვიდნენ. მათ სტუმართა ხუთკაციანი დაცვის მიერ აღმართული "ზღუდეების" გარღვევა ძალიან უჭირდათ. ზღვისპირელებს კი კვლავ მართებდათ ქუთაისელთა დასჯა, მაგრამ დათუნაიშვილის პასით მეკარესთან პირისპირ გასულ ილია პავლიაშვილს მიზანმა უმტყუნა და რეალური მომენტი ვერ გამოიყენა.
ტაიმის შუიდან ქუთაისელებიც გააქტიურდნენ. მათგან განსაკუთრებით ელგუჯა გრიგალაშვილი გამოირჩეოდა, რომელმაც ორჯერ სახიფათო შეტევით აანერვიულა ფოთელები, მესამე ცდაზე კი შესანიშნავი დარტყმით ანგარიშიც გაათანაბრა.
პირველი ტაიმის დარჩენილ დროში ორივე გუნდს შეეძლო ანგარიშის გაზრდა. სტუმართაგან ჯემალ გაბუნიამ ვერ გამოიყენა შესანიშნავი ეპიზოდი, ქუთაისელთაგან კი გრიგალაშვილსა და ლაშა შერგელაშვილს შეეძლოთ გატანა. განსაკუთრებით ამ უკანასკნელის საჯარიმო დარტყმა უნდა გავიხსენოთ, როცა "ტორპედოს" ახალგაზრდა მცველმა დაახლოებით 35 მეტრიდან "კოლხეთის" კარის ხარიხა შეაზანზარა.
მატჩის მეორე ნახევრის დებიუტში კოლხებმა ზედიზედ ორი საგოლე ეპიზოდი შექმნეს და რომ არა ომარ მიგინეიშვილის შესანიშნავი თამაში, დაწინაურდებოდნენ კიდეც.
ქუთაისელთა მეკარემ ჯერ პავლე დათუნაიშვილის ურთულესი "მაკრატელა" მოიგერია, შემდეგ კი მასთან პირისპირ შეყრილ შალვა კვანტალიანსაც აჯობა და დამატებაზე დათუნაიშვილსაც არ გაატანინა.
ამასობაში ფეხბურთის დაუწერელი კანონი: "ვერ გაიტან, გაგიტანენ" ამოქმედდა. შეტევის გასაძლიერებლად შეცვლაზე შესულმა ნიკა საბანაძემ მისია კარგად შეასრულა. მან გრიგალაშვილის გამოზომილი პასი გამოიყენა და ქუთაისელები დააწინაურა.
საბანაძეს მალევე დუბლის გაფორმებაც შეეძლო, მაგრამ მისი დარტყმის შემდეგ გიორგი კილასონიამ ზედ კარის ხაზიდან მოიგერია ბურთი.
დარჩენილ დროში "კოლხეთმა" "ტორპედო" კარს მიაჯაჭვა, მაგრამ შექმნილი მომენტები ვერ გამოიყენა და მორიგი მარცხი განიცადა.
მსაჯის სასტვენთან ერთად ტორპედოელებმაც ამოისუნთქეს. მათი თამაშით სტადიონზე მყოფი მცირერიცხოვანი გულშემატკივარი უკმაყოფილო დარჩა.
საქართველოს ჩემპიონატი. უმაღლესი ლიგა. XVIII ტური
02.12. ქუთაისი. ცენტრალური, 1500 მაყურებელი
ტორპედო-კოლხეთი 2:1
გოლები: 0:1 გოგონაია (6. დათუნაიშვილის პასით), 1:1 ე. გრიგალაშვილი (32), 2:1 საბანაძე (64. გრიგალაშვილის პასით)
Video
ტორპედო - კოლხეთი 2:1
ტორპედო - კოლხეთი 2:1
ტორპედო კოლხეთი
4-4-2 5-4-1
მიგინეიშვილი ბუბუტეიშვილი
რიგვავა გ. კილასონია
ზ. ჭელიძე ცხვიტარია
გ. გურული ტყეშელაშვილი
შერგელაშვილი ფარულავა
დოლიძე გაბუნია
გ. დათუნაიშვილი კრასოვსკი
კუხიანიძე გოგონაია
ე. გრიგალაშვილი პ. დათუნაიშვილი
ბერიაშვილი პავლიაშვილი
ტუღუში კვანტალიანი
მწვრთნელები:
გ. გეგუჩაძე ს.ფილია
ტორპედო
54. კუხიანიძე - საბანაძე
69. ტუღუში - გიგაური
78. დოლიძე - ვ. ბოლქვაძე
სათადარიგოები: ქვილითაია, ტაბატაძე, გოგიჩაიშვილი, ფირცხალავა
კოლხეთი
83. გოგონაია - ზ. ჩხეტიანი
87. ფარულავა - ბუხაიძე
სათადარიგოები: ხარშილაძე, მოსიაშვილი, კობერიძე, ბარამიძე.
არბიტრი: დ. ხარიტონაშვილი
გაფრთხილება: ბერიაშვილი (48), გაბუნია (59)
ყოველდღიური სპორტული გაზეთი "ლელო"
