გორის "დილა" შოკშია. ჩემპიონობის ერთ-ერთმა პრეტენდენტმა ამას წინათ, თბილისში "დინამოს" ფრე ეთამაშა და კონკურენტთან ჩამორჩენის გასაბათილებლად გორის შეხვედრისთვის ემზადებოდა.როგორც ჩანს, ვალდას ივანაუსკასის გუნდი შეცდომაში სწორედ "დინამოზე" სწორებამ შეიყვანა - გორელებს გამორჩათ, რომ გია გეგუჩაძის "ტორპედოც" არ არის საჩუქარი და საკუთარ სტადიონზე მტკივნეული მარცხი იწვნიეს - 1:2.
გიორგი ბერიაშვილის დუბლს "დილამ" მხოლოდ ირაკლი მოდებაძის გოლით უპასუხა, რაც მატჩის გადასარჩენად საკმარისი არ აღმოჩნდა.
ახლა გორელები 60-ქულიან "დინამოს" მთელი ოთხი ქულით ჩამორჩებიან და მათი საჩემპიონო ამბიციებიც საკმაოდ საეჭვო გახდა.
"დილას" ერთ-ერთ ლიდერს,
"ვერ ვიტყვი, რომ სეზონის ერთ-ერთი უმნიშვნელოვანესი შეხვედრის მნიშვნელობა ვერ გავაცნობიერეთ, მაგრამ ჩვენი უშუალო კონკურენტი "დინამოა" და შესაძლოა, ამის გამო ქუთაისელებთან სრული მობილიზება ამიტომ ვერ შევძელით, მეტოქე სათანადოდ არ შევაფასეთ და ფსიქოლოგიურად კარგად ვერ მოვემზადეთ.
კონცენტრაცია დასაწყისშივე დავკარგეთ, რითაც "ტორპედომ" ისარგებლა და ორი ბურთი გაგვიტანა.
ამ წაგებაზე ჩვენი წილი პასუხისმგებლობა უნდა ავიღოთ. ვფიქრობ, მომხდარს ჩვენი მწვრთნელიც კარგად გააანალიზებს და მოთამაშეებიც საკუთარ შეცდომებს გადავხედავთ.
საჩემპიონო შანსები ჯერ არ დაგვიკარგავს. "დინამოს" 4 ქულით ჩამოვრჩებით, დარჩენილ 6 ტურში კი დაწევა შესაძლებელია. მთავარია, დარჩენილ შეხვედრებს მთელი სერიოზულობით მოვეკიდოთ.
ახლა "დილას" ქულის დაკარგვის უფლებაც არ აქვს. შევეცდებით, მომავალში იგივე აღარ განმეორდეს, თორემ კიდევ ერთი წაფორხილება ძალიან ძვირად დაგვიჯდება".
გამოცდილი მოთამაშე გორის "დილას" მომავალზეც ლაპარაკობს:
"ნებისმიერ შემთხვევაში, წელს "დილას" არსებობის ისტორიაში საუკეთესო სეზონი ჰქონდა. ყველაფერი ძალიან კარგად დაიწყო, უძლიერესი შემადგენლობა შეიკრიბა, რომელმაც საქართველოს თასი მოიგო, ახლა კი ჩემპიონობისთვის ვიბრძვით.
მაგრამ ჯერ ზუსტად არ ვიცით, მომავალ სეზონში "დილას" რა ბედი ელის - შევინარჩუნებთ შემადგენლობას თუ გუნდი ამბიციებს დაკარგავს.
"დილას" დასუსტება გულდასაწყვეტი იქნება. მიმაჩნია, რომ მთლიანად ქართული ფეხბურთისთვის იქნება მნიშვნელოვანი, თუ თბილისის "დინამოს" სერიოზული კონკურენტი ეყოლება. ერთგუნდიანი ჩემპიონატი ფეხბურთს არაფერს არგებს. ასე იყო ადრე და ძალიან არ მინდა, ახლაც იგივე განმეორდეს.
საამისოდ მომდევნო სეზონისთვის ფინანსური საკითხების გადაჭრაა საჭირო. სეზონის დასრულებამდე პრობლემები არ იქნება. საკითხავია - მერე რა მოხდება.
იმედია, გორის ხელმძღვანელობა "დილას" ძველებურად მიხედავს და პროგრესს არ შეაჩერებს. ეს გუნდი 2-3 წელიც რომ შეინარჩუნონ, დარწმუნებული იყავით - ქალაქსა და ქვეყანას ევროპაშიც არ შევარცხვენთ".
ყოველდღიური სპორტული გაზეთი "ლელო"
ასევე იხილეთ:
დილა-ტორპედო 1:2 - ოთხ წუთში წაგებული თამაში [VIDEO]
