ყაზახური ინვესტიცია სამტრედიული ფეხბურთისთვის

სამტრედიის საფეხბურთო კლუბმა "სამტრედიამ" პირველი ლიგისთვის მოსამზადებელი ვარჯიშები დაიწყო. 

მაშ შემდეგ, რაც გუნდი ადგილობრივი დაფინანსების გარეშე დარჩა, ახალი ინვესტიცია მას ჰაერივით სჭირდებოდა.

გამოხმაურება კარგა ხანს არ ჩანდა, რომ არა ერთი კარგი, სამტრედიელი პიროვნება, ყოფილი ფეხბურთელი.

იგი საკრებულოს თავმჯდომარეს ემზარ შუბლაძეს დაუკავშირდა და ყაზახი ინვესტორის, მურატ სეიტოვის შესახებ ინფორმაცია მიაწოდა.

"ინვესტორი თავად დააფინანსებს კლუბს. ადგილობრივი თვითმმართველობა ხელს შეუწყობს იმ თვალსაზრისით, რომ ჩვენს მოედანს გამოიყენებს. მომავალში აპირებს, რომ იჯარით აიღოს ან იყიდოს ეს ფართი.

ყველაფერი იდეალურად იქნებაო, ამის თქმა ძალიან რთულია, მაგრამ

როდესაც ადამიანი ამხელა გზას გამოივლის და ამ თემაზე მოლაპარაკებებს გამართავს, ბუნებრივია ინტერესი დიდი აქვს. იმედია, რომ სამტრედიელები, აუცილებლად იზეიმებენ და საკუთარი თვალით ნახავენ დიდ ფეხბურთს," - აღნიშნა ემზარ შუბლაძემ.

გუნდს მწვრთნელთა შემადგენლობაც ახალი ჰყავს. 8 წლიანი გამოცდილების მქონე, თბილისელ, მთავარ მწვრთნელს უჩა სოსიაშვილს დადებითი მოლოდინები აქვს და ფიქრობს, რომ იმ მატერეალურ-ტექნიკური ბაზით, რომელიც "სამტრედიას" გააჩნია, წარმატების მიღწევა შესაძლებელია.

"ჩვენი მიზანი და სპონსორის პირველი დავალებაა, რომ წელს კარგი ახალგაზრდული გუნდი შევქმნათ, ვაჩვენოთ საუკეთესო შედეგი პირველ ლიგაში. მომავალ წელს კი, აუცილებლად, უნდა გადავიდეთ უმაღლეს ლიგაში.

ეს ჩემთვის არ არის მხოლოდ დავალება. მონდომებული ვარ, რადგან სამტრედიელ მაყურებელს ძალიან უყვარს ფეხბურთი და ჩვენგან შედეგებს ელის," - აღნიშნა მან სოსიაშვილმა.

თბილისის N35 სპორტული სკოლასთან, ქალთა ეროვნულ ნაკრებთან და "ავაზასთან" ერთად სამტრედიის "სამტრედია" ახალგაზრდა მწვრთნელის კარიერაში გამოცდილების კიდევ ერთი ეტაპია.

რაც შეეხება დამხმარე მწვრთნელებს, ესენი გახლავთ გიგა კუტივაძე, ლერი მეგენეიშვილი და მეკარეების მწვრთნელი, ირაკლი შენგელია.

გუნდის აღმასრულებელი დირექტორი პაატა მიქელთაძეა. მწვრთნელებთან ერთად მისი კანდიდატურა სწორედ ახალმა ინვესტორმა შეარჩია.

ახალი შემართებით შეუდგნენ ვარჯიშს კლუბის წევრებიც.

"მოლოდინები კარგი გვაქვს. ინვესტორი და მწვრთნელები ითხოვენ მუშაობას და შედეგს. ჩვენი სურვილიც იგივეა, რომ მაქსიმალურს მივაღწიოთ. იმედია ასეც იქნება," - განაცხადა გუნდის კაპიტანმა სპარტაკ გოგიამ.

საწვრთნელი ვარჯიშების შემდეგ, საფეხბურთო სეზონი ოფიციალურად გაიხსნება, სადაც "სამტრედია" პირველ ლიგაზე 16 ფეხბურთელით იასპარეზებს.

წყარო: samtredia.com.ge