ზაზა ჭელიძე: "ტორპოდოც" და "ზესტაფონიც" შემტევ ფეხბურთს თამაშობს

24 ნოემბერს ეროვნული ჩემპიონატის ტურის ერთ-ერთ ყველაზე საინტერესო შეხვედრა ქუთაისში უნდა გაიმართოს, სადაც "ტორპედო" "ზესტაფონს" უმასპინძლებს.

ჟერარ სარაგოსას ხელმძღვანელობით მოთამაშე, გაახალგაზრდავებულმა "ტორპედომ" სეზონი რიხით დაიწყო, თუმცა ბოლო შეხვედრებში ვეღარ იჩაუქა.

შეგახსენებთ, რომ "ზესტაფონის" ამჟამინდელი თავკაცი გია გეგუჩაძე ბოლოს სწორედ ქუთაისურ გუნდს წვრთნიდა.

"ტორპედოს" ერთ-ერთი საკვანძო ფეხბურთელი, მცველი ზაზა ჭელიძე მომავალ მატჩზე საუბრობს.

- ძალიან დიდი იმედით ველით "ზესტაფონთან" შეხვედრას. ბოლო სამი მატჩი წავაგეთ და ახლა ყველანაირად ვეცდებით, წარმატებას მივაღწიოთ.

"ტორპედო" ახალგაზრდული გუნდია, "დინამოსთან" წაგების შემდეგ, ცოტა არ იყოს, ავირიეთ, რაც გამოუცდელობის ბრალი უნდა იყოს.

- "დინამოსთან" რიცხობრივი უპირატესობა გქონდათ, თუმცა 1:2 დამარცხდით. რა იყო ამის მიზეზი?
- გამოცდილება დაგვაკლდა, არადა, ისეთი თამაში იყო, ფრედ რომ გვეთამაშა, მაინც დაგვწყდებოდა გული.

- დაცვიდან ბურთის დიაგონალზე გადატანა - ამ სეზონში "ტორპედო" ხშირად მიმართავდა ამ ხერხს და წარმატებითაც. "ზესტაფონს" რაიმე სიახლეს შესთავაზებთ?
- ვფიქრობ, სხვა სტილის შეთავაზებაც შეგვიძლია. ჩვენც და "ზესტაფონიც" შემტევ ფეხბურთს ვთამაშობთ და, წესით, საინტერესო თამაში უნდა გამოვიდეს.

- "ზესტაფონს" თქვენი ყოფილი მწვრთნელი თავკაცობს და, რა თქმა უნდა, კარგად ეყოლებით შესწავლილი. როგორ ფიქრობთ, ეს "ზესტაფონს" გაუადვილებს ქუთაისში თამაშს?
- გეგუჩაძე მაღალი დონის სპეციალისტია, "ზესტაფონში" ახალი მისულია, თუმცა 2-3 კვირაც საკმარისია, გუნდს ხელი რომ დაატყოს. ჩვენი ფეხბურთი უნდა ვითამაშოთ და ყველანაირად ვეცადოთ, რომ "ზესტაფონი" დავამარცხოთ.

- წინა ტურის "ზესტაფონი"-"დინამოს", ალბათ, უყურეთ. რა შთაბეჭდილება დაგრჩათ?
- "ზესტაფონმა" კარგი შთაბეჭდილება დატოვა, ისე ითამაშა, ალბათ, ყველას გული დასწყდა, რომ წააგო - ათი კაცით კი დარჩნენ, მაგრამ მაინც მოახერხეს ანგარიშის გათანაბრება.

ვფიქრობ, "ზესტაფონს" "დინამოსთან", უბრალოდ, არ გაუმართლა.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
უმაღლესი ლიგის XIII ტურის წინ: ისტორიულად სასურველი...