მოკლედ, მკითხველის სამსჯავროზე გელა გომელაურთან ინტერვიუა...
თუმცა, სანამ ინტერვიუზე გადავიდოდეთ, მოკლედ შეგახსენებთ, რომ "ვიტ ჯორჯიაში" იგი თავდაპირველად, დუბლების მწვრთნელად მუშაობდა, მთავარ გუნდში კი გასული სეზონის მსვლელობისას გადაიყვანეს და მისი
- მიგაჩნიათ თუ არა, რომ ასეთი ანგარიშით დამარცხება სირცხვილია?
- ნება მომეცით, პრესისა და გულშემატკივრების პოზიცია არ გავიზიარო. რაღა თქმა უნდა, 0:6 არავისთვისაა სასიამოვნო, მაგრამ ყველაფერს თავისი ახსნა აქვს. ბუნებრივია, მარცხზე პასუხისმგებლობას არ გავურბივარ, მაგრამ არალოგიკური ნამდვილად არაფერი მომხდარა. თავს უხერხულად ვგრძნობ, მაგრამ ილუზიონისტი არ ვარ, რომ ერთ თვეში სასწაული ჩავიდინო.
ეს იგივეა, ფრონტის წინა ხაზზე ჯარისკაცი დაშლილი იარაღით რომ გაუშვა და თან უბრძანო, იარაღიც ააწყვე, გაისროლე კიდეც და თავიც დაიცავიო. ამ ყველაფერს დრო სჭირდება, რაც ჩვენ საკმარისი არ გვქონდა. დამერწმუნეთ, ერთ წელიდადში "ვიტ ჯორჯიას" ეს შემადგენლობა ძალიან ბრძოლისუნარიანი იქნება.
- კი მაგრამ, ისიც ხომ შეიძლება, მოუმზადებელი ჯარისკაცი საერთოდ არ გაუშვა ომში?! თქვენც ამდგარიყავით და ერთი წლის შემდეგ გეთამაშათ ევროპის ლიგაზე. ნუთუ აუცილებელი იყო ასეთი გუნდით ევროტურნირზე თამაში?
- დიახ, იმიტომ რომ ჩვენმა ახალგაზრდებმა მძიმე დარტყმის გარდა, სასიცოცხლოდ აუცილებელი გამოცდილებაც მიიღეს, რომელიც ახლო მომავალში აუცილებლად გამოადგებათ. ჭაბუკ მოთამაშეს ოდესმე ხომ უნდა ჰქონდეს დებიუტი ევროთასებზე?!
- გასაგებია, რომ უფრო ძლიერ გუნდს შეხვდით, მაგრამ ნუთუ არ შეიძლებოდა, ღირსეულად მაინც წაგეგოთ?
- ეს ნამდვილად შეგვეძლო, მაგრამ თავის მართლებაში ნუ ჩამომართმევთ და და გარკვეულმა გარემოებებმა მაინც შეგვიშალა ხელი. პირველ ტაიმში ბიჭებმა თავდადებით იბრძოლეს, მაგრამ კვარაცხელიაზე წესების დარღვევისთვის მსაჯმა პენალტი არ დანიშნა, ამას გარდა, იმავე კვარაცხელიამ რეალური საგოლე მომენტი გაუშვა ხელიდან, მეორე გოლმა კი გუნდი ბოლომდე გატეხა.
შეგვეძლო, თავიდანვე დაცვითი ტაქტიკა აგვერჩია და მინიმალური ანგარიშით დამარცხებაზე მაინც გვეზრუნა, მაგრამ მერწმუნეთ, ამ შემთხვევაში მინიმუმ, 0:10-ს წავაგებდით.
როგორც იცით, წინა სეზონის დასრულებისთანავე "ვიტ ჯორჯია" ექვსმა წამყვანმა ფეხბურთელმა დატოვა, ამას ხურცილავას ტრავმაც დაემატა და ძირითად შემადგენლობაში არაერთი გამოუცდელი მოთამაშე მოხვდა – მიქაბერიძეს, ადამაძეს, მაისაშვილსა და გურეშიძეს გასულ სეზონში ძირითადში სულ რამდენიმე მატჩი აქვთ ჩატარებული, ამას დაუმატეთ ბეჭვაია, კლიმიაშვილი და კვარაცხელია, რომლებიც სულ ახლახანს გამოჯანმრთელდნენ და ოპტიმალურ ფორმაში არ არიან. პრობლემები განსაკუთრებით დაცვაში იგრძნობოდა და ეს არცაა გასაკვირი, ერთმანეთთან შესათამაშებლად ყველაზე ცოტა დრო ჩვენს მცველებს ჰქონდათ. განსაკუთრებით ახალგაზრდა ჭანკვეტაძე გააკრიტიკეს, რომელმაც ნამდვილად ბევრი შეცდომა დაუშვა, მაგრამ მერწმუნეთ, მას დიდი მომავალი აქვს და მალე ამაში ყველა დარწმუნდება.
მოკლედ, 0:6 მართლაც უსიამოვნო ანგარიშია, მაგრამ რეალობიდან გამომდინარე, სირცხვილს ვერ ვგრძნობ. ვამაყობ იმით, რასაც "ვიტ ჯორჯიაში" მივაღწიე. ვგულისხმობ გასულ სეზონს, როცა გუნდი ჩემი ხელმძღვანელობით უფრო კომბინაციურად ათამაშდა და საქართველოს თასიც დამსახურებულად მოიპოვა. ის შემადგენლობა რომ შეგვენარჩუნებინა, "ბანიკის" დამარცხების შესანიშნავი შანსიც გვექნებოდა. თუმცა რას ვიზამთ, რაც მოხდა, მოხდა...
- "ვიტ ჯორჯიადან" საკუთარი ნებით წახვედით თუ კლუბის პრეზიდენტ რუხაძის გადაწყვეტილებით?
- ეს მთლიანად ჩემი სურვილი იყო.
- გუნდიდან წასვლა "ბანიკთან" მატჩის შემდეგ გადაწყვიტეთ თუ მანამდე?
- ამის თაობაზე პრეზიდენტს ცოტა ხნის წინ, ევროტურნირების დაწყებამდე ვუთხარი, მაგრამ მაშინ შევთანხმდით, რომ ამ თემას ევროთასებზე ასპარეზობის შემდეგ მივუბრუნდებით. "ბანიკთან" შეხვედრის შემდეგ კი გულახდილად ვისაუბრეთ და ერთმანეთს თბილად დავშორდით. "ვიტ ჯორჯიას" გულშემატკივრად აუცილებლად დავრჩები.
- ადრე არაერთხელ გითქვამთ, რომ "ვიტ ჯორჯიაში" მუშაობა მოგწონდათ და შორსმიმავალი გეგმებიც გქონდათ. აქედან გამომდინარე იბადება კითხვა: მაშ რატომ მოისურვეთ წასვლა?
- მაპატიეთ, მაგრამ ამის კონკრეტულ მიზეზებზე საუბრისგან თავს შევიკავებ.
- მხოლოდ მთავარი მწვრთნელის თანამდებობიდან მიდიხართ თუ "ვიტ ჯორჯიას" საერთოდ ტოვებთ?
- "ვიტ ჯორჯიასთან" უკვე აღარაფერი მაკავშირებს.
- სხვა კლუბებიდან რაიმე კონკრეტული წინადადება ხომ არ გაქვთ?
- ჯერჯერობით, არა ჩემი მომავალი საქმიანობის შესახებ კი მაშინვე გეტყვით, როცა ახალ ადგილზე მუშაობას შევუდგები. ამ ეტაპზე ბავშვთა ფეხბურთში დაბრუნებას არ ვაპირებ, ჩემი სურვილი უმაღლეს ლიგაში მუშაობაა.
