ისევე როგორც სხვა გუნდებში, შემადგენლობა "სამტრედიაშიც" იცვლება. საკონტროლო მატჩებში მწვრთნელები სავარაუდო ახალწვეულებს აკვირდებიან და "სამტრედიას" დაკომპლექტება ჯერ არ დასრულებულა, მაგრამ რამდენიმე ახალი ფეხბურთელის ვინაობა უკვე ცნობილია. ესენი არიან თემურ ფურთუხია, რომელიც ბოლოს უკრაინაში თამაშობდა, პაატა ბაკარანძე, რომელიც "სამტრედიას" ზუგდიდის "ბაიადან" დაუბრუნდა, ილია პავლიაშვილი და ძმები შალიკაშვილები "გაგრადან", კვერენჩხილაძე "გურიადან",
რაც შეეხება წასულებს, "სამტრედიას" ყველაზე დიდ დანაკარგად მისი საუკეთესო ბომბარდირი ზაურ ხაჭიპერაძე უნდა მივიჩნიოთ, რომელიც კარიერას ქუთაისის "ტორპედოში" გააგრძელებს. მის გარდა, "სამტრედია" დატოვეს ბარამიძემ, ფირცხალავამ და სამსეიშვილმა. ეს უკანასკნელი "ბათუმს" დაუბრუნდა.
ბოლო ამხანაგური შეხვედრა "სამტრედიამ" შაბათს შინ ჩაატარა "ბათუმის" წინააღმდეგ და 2:1 გაიმარჯვა. ანგარიში კირკიტაძემ გახსნა თერთმეტმეტრიანი დარტყმით და პირველ ტაიმში მეტი გოლი აღარ გასულა. მატჩის მეორე ნახევარში კაკალაძემ ანგარიში გაათანაბრა, გამარჯვების გოლი კი ეცადეიშვილმა გაიტანა.
ამ შეხვედრაში იმერელთა ძირითადი შემადგენლობა ასეთი იყო: შენგელია – კირთაძე, გოგია, დვალიშვილი, ნინუა – კაპანაძე, ბაკურაძე, ფურთუხია, კირკიტაძე – ეცადეიშვილი, გოგიშვილი.
მეორე ტაიმში შეცვლაზე უმეტესად, სინჯებზე მყოფი ახალგაზრდები შევიდნენ. მათი ბედიცა და "სამტრედიას" საბოლოო შემადგენლობაც სამ-ოთხ დღეში გაირკვევა.
"სამტრედია" დღესდღეობით, ჯიხაიშის საწვრთნელ ბაზაზე ვარჯიშობს და მეტოქეებსაც იქ მასპინძლობს. 22 ივლისიდან გუნდ შეკრებაზე ქობულეთში ან ურეკში გაემგზავრება.
საკონტროლო მატჩების სერია კი სანაიას გუნდმა "ტორპედოსთან" დაპირისპირებით დაიწყო. ამ შეხვედრაში "სამტრედია" 0:1 დამარცხდა, შემდეგ კი იყო მატჩები რუსთავის "ოლიმპთან" (1:4), "გაგრასა" (0:1) და "ბათუმთან" (0:0).
20 ივლისს "სამტრედია" პირველლიგელ საჩხერის "ჩიხურას" გაეჯიბრება, 22 ივლისს იმავე ლიგის ბინადარ მარტვილის "მერანს", 29 ივლისს კი კიდევ ერთ მატჩს ჩაატარებს. თუ ვის შეხვდება "სამტრედია" ამ დღეს, ეს მოგვიანებით გაირკვევა.
ლევან ჯანეზაშვილი
