ფეხბურთის განვითარების სახელმწიფო პროგრამის პრეზენტაციის შემდეგ ცნობილი გახდა, რომ რამდენიმე კლუბს პრეტენზია ჰქონდა. ერთ-ერთი ასეთი კლუბი გორის "დილა" იყო... თუმცა კლუბის დირექტორი გიორგი ტუღუში "ლელოსთან" ინტერვიუში აბსოლუტურად განსხვავებულ პოზიციას აფიქსირებს და ამბობს, რომ პროგრამა "დილას" ძალიან წაადგება...- ცნობილია, რომ სახელმწიფო პროგრამის განხილვისას, კლუბების წარმომადგენლებს კითხვები გაგიჩნდათ, მათ შორის - გორის "დილასაც". იქნებ, დააკონკრეტოთ, რით იყავით უკმაყოფილო?
- მე ასე არ ვიტყოდი. კითხვები გვქონდა, მაგრამ, რომ გავეცანით პროგრამას, ყველაფერი გასაგები გახდა - ძალიან პროდუქტიული და სასარგებლო დოკუმენტია. მიმაჩნია, რომ ის
კარგია, რომ ამიერიდან ფული აკუმულირებული იქნება საფეხბურთო ოჯახში, ყველა გუნდზე თანაბრად გადანაწილდება და ყოველ წელს არ ვიქნებით იმის ფიქრში, ფული საიდან და როგორ მოვიტანოთ.
- რამდენად მართალია, თითქოს "დილასთვის" უკვე სპონსორს ეძებთ?
- ზუსტად ამ პროგრამამ გვიბიძგა, რომ სპონსორი მოვძებნოთ. თანხის გამომუშავება შესაძლებელია სტიმულირებისა და პრემიალური ფონდებიდანაც. ერთიანი ფონდიდან დამატებითი თანხა გადაეცემა იმ გუნდს, რომელიც ტრანსფერიდან ან სპონსორებისგან შემოსავლებს მოიზიდავს.
თუ სპონსორი მოვიზიდეთ, პირველი ფონდიდან კლუბი, მაქსიმუმ, 400 ათას ლარს მიიღებს, პრემიალურ ფონდში კი 750 ათასი ლარია. "დილა" ლიდერებშია და ბუნებრივია, აქედანაც გარკვეული თანხის მიღებას ვიმედოვნებთ. ეს დიდი სტიმულია და რამდენიმე კომპანიასთან მოლაპარაკებას უკვე ვაწარმოებთ კიდეც.
- სპონსორებთან მოლაპარაკება ბოლომდეა მიყვანილი?
- დიახ, მოლაპარაკებები მთავრდება და ამაზე განცხადებას მალე გავაკეთებთ.
- სოლიდურ თანხაზეა ლაპარაკი?
- დიახ, საკმაოდ სოლიდურ თანხებზე. რომ იცოდეთ, მოლაპარაკება სხვა კლუბებსაც აქვთ. იმიტომ, რომ კლუბებში სტაბილურობის განცდა შეიქმნა, მომავლის აღარ გვეშინია - დააფინანსებენ თუ არა გორის "დილას". ბიზნესსაც სწორედ ეს იზიდავს.
- ცნობილია, რომ "დილას" ფეხბურთელების დავალიანება აქვს. მის გასტუმრებას თუ ახერხებთ?
- დიახ, ვცდილობთ, რომ გარდამავალი ჩემპიონატის დაწყებამდე დავალიანებები დავფაროთ და გუნდი ჩვეულ სამუშაო რეჟიმს დაუბრუნდეს. გორის "დილასთვის" გამოყოფილი თანხა ხომ მთლიანად გუნდს არ ხმარდება?! მას გარდა, ფული იხარჯება ჭაბუკთა, დუბლებისა და ამპუტანტთა გუნდებზე, საფეხბურთო სკოლაზე, პლუს, სტადიონის მოვლა-პატრონობასა და მისი თანამშრომლების ხელფასებზე.
- ანუ, კონკრეტულად გუნდზე რა თანხა იხარჯებოდა?
- 2015 წელს ამაზე გათვალისწინებული იყო 1,28 მილიონი ლარი. მაგრამ სახელმწიფო პროგრამა ისეთი სტიმულია, უკვე მსგავსი პრობლემების ნაკლებად გვეშინია, სპონსორების მოზიდვაც დიდი სტიმულია და იმედია, ამას მოვახერხებთ.
- ცნობილია, რომ "დილას" 2 მილიონით აფინანსებენ. პროგრამით კი უმაღლესი ლიგის კლუბს საბაზისო თანხად მილიონს გამოუყოფენ. ამით იყო გამოწვეული, რომ ახალი დაფინანსების სისტემაზე კითხვები გიჩნდებოდათ?
- ჩვენ ის პერიოდიც გვახსოვს, როცა "დილას" 9 მილიონი ლარი დაურიცხეს... მაგრამ იყო დრო, კლუბს ფულს საერთოდ არ აძლევდნენ. ახლა კი სტაბილური დაფინანსებაა გარანტირებული. გარდა ამისა, პრეზენტაციაზე ითქვა, რომ ლიგიდან გავარდნილი კლუბიც კი 2 მილიონს მაინც მიიღებს. სტიმულირებისა და პრემიალური ფონდებიდან შესაძლო შემოსავლებზე უკვე გითხარით. ამიტომ, ეს ძველზე ბევრად უკეთესი და მისაღები სისტემაა. მჯერა, პროგრამას ფეხს ავუწყობთ. ახლა ყველაფერი კლუბის მენეჯმენტზეა დამოკიდებული.
- თქვენი აზრით, ამ პროგრამით შესაძლებელია, რომ "დილათი" არა მხოლოდ სპონსორი, არამედ, კერძო სექტორი დაინტერესდეს?
- ჩემი აზრით, შესაძლებელია, რადგან "დილა" ბრენდად ჩამოყალიბდა - გავხდით ჩემპიონები, თასის მფლობელები და ორჯერ ევროპის ლიგის პლეი ოფში გავედით. ახლა ერთიანი ფონდის ხელმძღვანელს უნდა შევხვდეთ და გვაინტერესებს, რა მექანიზმებით არის შესაძლებელი, კლუბი კერძო მეპატრონის ხელში რომ გადავიდეს.
გარდა ამისა, გორის მუნიციპალიტეტისაა საფეხბურთო სკოლა და ამიერიდან როგორი იქნება მასთან ჩვენი ურთიერთობა? პასუხის მიღება ამაზეც გვსურს - რას დააფინანსებს მერია და რას - ფონდი. ამ ყველაფერს შევათანხმებთ, გავაანალიზებთ და შემდეგ უფრო კონკრეტულად გვეცოდინება, რა გზას დავადგებით.
(იბეჭდება მცირე ცვლილებით)
ყოველდღიური სპორტული გაზეთი "ლელო"
