ქუთაისის"ტორპედოს" თურქულ შეკრებაზე საფრანგეთის მოქალაქე ფრანკ მბარგაც შეუერთდა

თურქულ შეკრებაზე გაემგზავრება ქუთაისის "ტორპედოც", რომელმაც მანამდე ბოლო საშინაო საკონტროლო შეხვედრა საღორიის საწვრთნელ ბაზაზე, ფოთის "კოლხეთთან" გამართა და 5:1 სძლია.

ეს იყო ოთარ კვერნაძის ბენეფისი - მან 4 გოლი მიითვალა. არადა, საინტერესოა, რომ უხვგოლიან მატჩში პირველი ტაიმი 0:0 მორჩა, მეორე ნახევრის სტარტზე კი ანგარიში ფოთელებმა გახსნეს. კვერნაძის გარდა, ერთი გოლი შოთა ბაბუნაშვილმა გაიტანა.

"ტორპედოს" დამრიგებელმა კობა ჟორჟიკაშვილმა ამ თამაშში რამდენიმე მოთამაშე გასინჯა, მათ შორის - ჰოლანდიელი მცველი იურგენ კოლინი, რომელზეც "ლელო" უკვე წერდა. პირდაპირ უნდა ითქვას, რომ 35 წლის ფეხბურთელმა საუცხოო შთაბეჭდილება დატოვა.

ქუთაისელები უკვე გაემგზავრნენ თურქეთში, სადაც გარდამავალი ეროვნული ჩემპიონატისთვის მზადებას ქალაქ ბოლუში გააგრძელებენ. კობა ჟორჟიკაშვილმა შეკრებაზე 25 ფეხბურთელი წაიყვანა:

მეკარეები: როინ კვასხვაძე, მაქსიმე ქვილითაია, ტარიელ ხაინდრავა;
მცველები: ვაჟა ტაბატაძე, ანრი ჭიჭინაძე, გია ნერგაძე, გიორგი გავაშელიშვილი, გიორგი გურული, იურგენ კოლინი, გიორგი ქიმაძე;
ნახევარმცველები: ოლეგ მამასახლისი, გუგა ფალავანდიშვილი, შოთა ბაბუნაშვილი, ავთო ენდელაძე, გაბრიელ საღრიშვილი, თენგიზ ბრეგვაძე, ვანო წილოსანი, ალექსი ბენაშვილი, ცოტნე მესხი, გრიგოლ დოლიძე, ბექა ტუღუში;
თავდამსხმელები: ოთარ კვერნაძე, თორნიკე კაპანაძე, ვახტანგ კვარაცხელია.

"ტორპედოს" პრესსამსახურის ცნობით, თურქეთში გუნდს 24 წლის საფრანგეთის მოქალაქე ფრანკ მბარგა შეუერთდა, რომელიც წარმოშობით კამერუნელია.

ეს გახლავთ ნახევარმცველი, თამაშობდა გერმანული "ჰოფენჰაიმისა" და "ვალდჰოფის" სარეზერვო გუნდებში, ბერძნულ იანიცას "ანაგენისში" და გაზოროსის "ეთნიკოსში", აგრეთვე, ბულგარეთის უმაღლესი ლიგის ბინადარ სოფიის "სლავიაში", ბოლოს კი - თურქეთის პირველი ლიგის კლუბ "1461 ტრაბზონში".

სიახლეა ისიც, რომ ჟორჟიკაშვილმა შეკრებაზე წაიყვანა ნიჭიერი ცოტნე მესხი, რომელიც სულ რაღაც 3 წლის წინ თბილისის "ლოკომოტივის", 17 და 19-წლამდელთა ნაკრებების ერთ-ერთი გამორჩეული თავდამსხმელი გახლდათ. მესხი ბოლო სეზონში ოზურგეთის "მერცხალში" თამაშობდა, ზაფხულში კი ლანჩხუთის "გურიასა" და ქობულეთის "შუქურაში" ისინჯებოდა.

ახალწვეულია ცენტრალური მცველი გიორგი გავაშელიშვილიც, რომელიც ჟორჟიკაშვილთან რუსთავის "მეტალურგის" (2012-14) შეუცვლელი ფეხბურთელი იყო და შემდეგ ბათუმის "დინამოშიც" წაიყვანა (2014-15). 26 წლის ფეხბურთელი 2010-11 წლებში თბილისის "დინამოს" წევრი გახლდათ, თამაშობდა ფოთის "კოლხეთში", ბოლოს კი - "ზუგდიდში".

ამავე დროს, ცნობილი გახდა, რომ გუნდიდან 18 წლის თავდამსხმელი ცოტნე ფურცხვანიძე გაუშვეს. ახალი თაობის ერთ-ერთი ყველაზე ნიჭიერი ტორპედოელი კარიერას სხვა კლუბში გააგრძელებს. სხვათა შორის, ეს ამბავი გულშემატკივართა ნაწილმა სოციალურ ქსელში გააპროტესტა...

დაბოლოს: ტორპედოელები პირველ სპარინგს 20 ივლისს, აზერბაიჯანის უმაღლესი ლიგის კლუბ "სუმგაითთან" ჩაატარებენ.

(იბეჭდება მცირე ცვლილებით)
ყოველდღიური სპორტული გაზეთი "ლელო"