"ბაია" სასურველი შედეგისთვის ბრძოლას მატჩის დასაწყისიდანვე შეუდგა და ორ წუთში ორი სახიფათო შეტევის ორგანიზება მოასწრო. უკვე მე-2 წუთზე სტუმართა ერთადერთი გამოკვეთილი ფორვარდი ირაკლი ქობალია მეკარესთან პირისპირ აღმოჩნდა, თუმცა არდალიონ მიქაბერიძეს ვერ აჯობა.
თბილისელმა ფეხბურთელებმა თამაში დიდხანს ვერ დაალაგეს. მეტოქე უფრო ორგანიზებული და მოტივირებული ჩანდა. ისიც თვალსაჩინო
იქამდე კი, ვიტ ჯორჯია ზუგდიდელთა საჯარიმოს პირველად მე-12 წუთზე მიუახლოვდა, თუმცა მეკარე არ შეუწუხებია. მასპინძლებმა ნელ-ნელა თამაში დაალაგეს, ფლანგების გამოყენებაც დაიწყეს და რამდენიმე სახიფათო შეტევაც განახორციელეს. ვიტჯორჯიელთა ფორვარდმა ბესიკ ჩიმაკაძემ ორი ხელსაყრელი მომენტი ვერ გამოიყენა.
ანგარიშის გახსნის რეალური შანსი "ვეტერინარებმა" 30-ე წუთზე გაუშვეს ხელიდან. კუთხურს ზუგდიდელთა საჯარიმოში არეულობა მოჰყვა, ბურთთან ყველაზე სწრაფად ჩიმაკაძე გაჩნდა და უძლიერესი დარტყმით ხარიხა შეაზანზარა.
ტაიმის დასრულებამდე ერთი წუთით ადრე მრავალსვლიანი კომბინაციის შემდეგ დასარტყმელ პოზიციაზე ისევ ჩიმაკაძე აღმოჩნდა. ის მეკარესთან პირისპირ დარჩა, თუმცა გამოცდილი გიორგი სომხიშვილის გაცურება ვერაფრით მოახერხა. იქამდე ვიტჯორჯიელებმა შორეული დარტყმებითაც სცადეს მეტოქის კარის დალაშქვრა, მაგრამ უშედეგოდ.
შესვენების შემდეგ, თხუთმეტი წუთის განმავლობაში ბურთი, ძირითადად, საჯარიმოებს შორის დაგორავდა. ისეთი შთაბეჭდილება შეიქმნა, თითქოს მასპინძლები "ბაიას" მოქანცვას ელოდნენ. ისინი საამისოდ ყველაფერს აკეთებდნენ: სწრაფი, ერთი ან ორი შეხებით გათამაშებული კომბინაციები, შეტევის მიმართულების ხშირი ცვლა, ბურთის ერთი ფლანგიდან მეორეზე გადატანა, ზუგდიდელებს დიდ ენერგიას ართმევდა, თუმცა ისინიც საკმაოდ მწარედ "იკბინებოდნენ". ონიანს მხარი შოთა ლომიამაც აუბა, რომელიც გამუდმებით ცდილობდა, ქობალია დასარტყმელ პოზიციაზე გაეყვანა.
61-ე წუთზე "ბაია" კიდევ ერთხელ გადარჩა. გიორგი ვასაძემ ფლანგური გარღვევის შემდეგ ბურთი საჯარიმოში ჩაჰკიდა, მეკარე კარიდან გამოსვლისას შეცდა. ჩიმაკაძემ ცარიელ კარში დაარტყა, მაგრამ ბურთი სომხიშვილის დასაზღვევად გადასულ ონიანს მოხვდა.
სტუმრებმა ამ დაძაბული ვითარების განმუხტვა კი მოახერხეს, მაგრამ "ვიტ ჯორჯიამ" ირწმუნა, რომ მეტოქის დაცვა გაუვალი სულაც არ იყო და ზეწოლა გააძლიერა, რამაც შედეგი 77-ე წუთზე გამოიღო. ზუგდიდელები საკუთარ ნახევარზე, მარცხენა ფრთაზე დაჯარიმდნენ. გიორგი ჯანელიძემ ბურთი საჯარიმო მოედანში ჩაჰკიდა. "ბაიას" ლიდერმა ონიანმა, ზემოთ ნახსენები ერთადერთი შეცდომა დაუშვა, ბურთს თავით კარგად ვერ შესწვდა და ისიც ისე, რომ მიმართულება არ შეუცვლია, მარცხენა დაბალ კუთხეში აღმოჩნდა.
სტუმრები მოვლენების ასეთ განვითარებას არაფრით შეეგუენ. თითქოს მეორე სუნთქვა გაეხსნათო, იერიშზე გადავიდნენ. მასპინძლები იძულებულნი გახდნენ, საკუთარი საჯარომოს მისადგომები გაემაგრებინათ. ანგარიშის გასათანაბრებლად კი "ბაიას" ათი წუთი დასჭირდა.
მარცხენა ფრთიდან ლომიას მიერ საჯარიმოში ჩაკიდებული ბურთი ყველას და ყველაფერს გადასცდა და მარჯვენა ფრთაზე, ლაშა სვირავას ნადავლი შეიქნა, რომელიც ხელსაყრელ პოზიციაში აღმოჩნდა. მისი ძლიერად დარტყმული ბურთი მიქაბერიძემ მოიგერია, თუმცა ქობალიამ იქვე თავი შეაგება და ანგარიში გაათანაბრა.
"სიხარულის" სტადიონს, რომელზეც ეროვნული ჩემპიონატის უმაღლესი ლიგის გუნდების მატჩი პირველად ჩატარდა, მაყურებელი დაღონებული ტოვებდა, რადგან დარჩენილ დროში "ვიტ ჯორჯიამ", დიდი მცდელობის მიუხედავად, გამარჯვების გოლის გატანა ვერ შეძლო. სამაგიეროდ, სტუმრად მოპოვებულმა ერთმა ქულამ "ბაია" დიდად გაახარა.
"ვიტ ჯორჯია"-"ბაია" 1:1
19.02. თბილისი. სიხარული. 100 მაყურებელი
1:0 რ.ონიანი (77. საკუთარ კარში) 1:1 ქობალია (87)
"ვიტ ჯორჯია" "ბაია''
4-4-1-1 4-4-1-1
მიქაბერიძე სომხიშვილი
ბეჭვაია სვირავა
ადამაძე აქუბარდია
კასრაძე გამრეკლიძე
ღანიაშვილი ონიანი
ვასაძე რიგვავა
მაისშვილი წურწუმია
გურ.გურეშიძე სიხარულია
კორიფაძე ვართაგავა
ჯანელიძე ლომია
ჩიმაკაძე ქობალია
მწვრთნელი მწვრთნელი
მ.კოჭლაშვილი ე.ქომეთიანი
"ვიტ ჯორჯია"
69. როსტიაშვილი-კორიფაძე
სათადარიგოები: ძაძამია, ზაქრაძე, ჭანკვეტაძე, გოგიაშვილი, გიორ. გურეშიძე, ხურცილავა
"ბაია"
63. რიგვავა-ქირია
71. ეხვაია-სიხარულია
88. აფაქიძე-ლომია
სათადარიგოები: მაქაცარია, შონია, ქვარცხავა, ჩანგელია.
გაფრთხილება: აფაქიძე(89)
არბიტრი: გ.ვადაჭკორია.
.
