დინამო (თბ)-ტორპედო 0:0 - არ არის ფეხბურთი, არის ჩხუბი და გინება! [VIDEO]

გარდამავალი ჩემპიონატის პირველი წრე დასრულებულია. ორივე ჯგუფს გამოკვეთილი ლიდერები ჰყავს - "ჩიხურა" და "სამტრედია". აქედანვე ჩანს, რომ ბრძოლა ყველა ფრონტზე მძაფრი იქნება. უკვე გასაკვირი არ არის "ლოკომოტივის" მეორე ადგილი. ამ გუნდმა ბევრ ძლიერ მოთამაშეს მოუყარა თავი და "ჩიხურას" კონკურენციას გაუწევს, ყოველ შემთხვევაში, ეცდება მაინც, იმერულ კლუბს ცხოვრება გაურთულოს...

არ გეუცნაურათ, რომ "თეთრი ჯგუფის" ორი გუნდი ვახსენეთ და არაფერი გვითქვამს თბილისის "დინამოზე"? ასეა - მოქმედი ჩემპიონი და ქვეყნის ყველაზე ტიტულოვანი კლუბი მისთვის შეუფერებელ მესამე ადგილზეა. იურაი იარაბეკის გუნდი დაუმარცხებელი კია, მაგრამ ზედიზედ მესამე ფრე ითამაშა, აქედან ორი - უგოლო. რა თქმა უნდა, "დინამოს" ბრძოლა არ დაუმთავრებია.

"წითელ ჯგუფში" ლიდერ "სამტრედიას" ბათუმის "დინამო" უდგას კვალში. სწორედ მათი სამტრედიული დაპირისპირებით იწყება მეორე წრე. ცენტრალური მატჩი გველოდება "თეთრ ჯგუფშიც" - თბილისის "დინამო" "ჩიხურას" უმასპინძლებს...

ჯერ იმ მოვლენებზე, მატჩამდე წერეთლის გამზირზე რომ განვითარდა. სამწუხაროდ, "ქართული კლასიკოს" წინ გულშემატკივრები ერთმანეთს დაუპირისპირდნენ და სიტუაციის განსამუხტავად საჭირო გახდა სამართალდამცავთა ჩარევა.

- "დინამოსა" და "ტორპედოს" ფანებს შორის მატჩამდე დაპირისპირება მოხდა [VIDEO]

კიდევ უფრო სამწუხარო ისაა, რომ მთელი მატჩის განმავლობაში ორივე გუნდის ქომაგთა მხრიდან ისმოდა ერთმანეთის შეურაცხმყოფელი, უცენზურო შეძახილები, რასაც ფეხბურთთან საერთო არაფერი აქვს.

უკვე წლებია, ამ ორი გუნდის გულშემატკივრებს შორის დაპირისპირება გრძელდება და ალბათ დროა, სიტუაცია დალაგდეს. ერთხელაც, შესაძლოა, ტრაგედიამდე მივიდეთ და მაშინ ნამდვილად გვიან იქნება თითზე კბენანი...

ახლა უშუალოდ თამაშზე, რომელიც ისეთი ვერ გამოვიდა, როგორსაც ველოდით. ამ შემთხვევაში "ტორპედოს" ნაკლებად ვუსაყვედურებთ. ქუთათურთა მთავარი მწვრთნელის პოსტზე კახა ჩხეტიანი ახალი მისულია. გუნდში ჯერაც ბევრი რამაა დასალაგებელი, "დინამოს" კი უკეთესად თამაში მართებს.

ბოლო დროს ჩემპიონს ფრეების ეპიდემია შეეყარა. უკვე მესამე მატჩია, დინამოელები არც იგებენ და არც აგებენ. ფაქტია, ამ გუნდს მეტის პოტენციალი აქვს. ფეხბურთელები როგორღაც შებოჭილნი არიან მინდორზე, ვერ ავლენენ თავიანთ საუკეთესო თვისებებს.

თუ ასე გაგრძელდა, იურაი იარაბეკს "დინამოში" დიდხანს დარჩენა არ უწერია. თბილისელთა თამაშში არ არის ჟინი და აგრესია, გუნდი ვერ ახერხებს საგოლე მომენტების რეალიზებას.

იარაბეკმა "ტორპედოს" სიურპრიზი მოუმზადა: მარცხენა მცველად ითამაშა უჩა ლობჟანიძემ, მარჯვენა მცველის პოზიციაზე კი სტეფან ველევი დადგა. ორივე გუნდი ერთი გამოკვეთილი ფორვარდით (აქეთ ლადო დვალიშვილი, იქით ოთარ კვერნაძე) უტევდა და მინდვრის ცენტრში მოპოვებული უპირატესობის ფონზე ეძებდა გამორჩენას.

გამოჩნდა, რომ ჩხეტიანის მისვლის შემდეგ "ტორპედო" უფრო აზრიანად თამაშობს და, რაც მთავარია, "მაღალი პრესინგის" შესრულებას ცდილობს. ქუთათურებს ეს კარგად გამოსდიოდათ პირველ ტაიმში, მეორეში კი დაღლა დაეტყოთ და შედარებით უკნიდან ითამაშეს.

საერთოდ, ისეთი თამაში იყო, კაცს მალე რომ დაავიწყდება - აშკარა საგოლე მომენტი რასაც ჰქვია, სულ რამდენიმე შეიქმნა. პირველად "დინამოს" ქომაგები შეშფოთდნენ: ოთარ კვერნაძემ გადმოვარდნილ ბურთს დაჰკრა, თუმცა გიორგი ლომაია ადგილზე აღმოჩნდა.

სტანდარტული სიტუაციის შემდეგ გატანა შეეძლო "დინამოსაც". გიორგი პაპუნაშვილის მიერ ჩაწოდებულ ბურთს თბილისელთა ბრაზილიელი მცველი რენე ფერეირა დაუხვდა, თუმცა არაზუსტად დაარტყა. იქვე იყო ოთარ კიტეიშვილისა და ვახტანგ ჭანტურიშვილის მომენტებიც.

პირველი ტაიმის დასრულებას ხუთიოდე წუთი აკლდა, როცა "ტორპედო" ორჯერ გადაურჩა გოლს. ჯერ იყო და ლადო დვალიშვილმა ვერ შეაგდო უაღრესად ხელსაყრელი სიტუაციიდან, მერე კი "ტორპედოს" ერთ-ერთმა მცველმა კიტეიშვილის დარტყმული ბურთი გადააგდო კუთხურზე.

პირველი ტაიმი ხომ არ წყვეტდა ციდან ვარსკვლავებს და, მეორე უარესი სანახავი გამოდგა. "დინამო არენაზე" შეკრებილი ათასამდე მაყურებელი მხოლოდ ორ-სამჯერ გამოცოცხლდა. დასამახსოვრებელი ეპიზოდი ვიხილეთ 58-ე წუთზე.

დვალიშვილმა მეურვე ჩამოიშორა და კარგად უპასა ჭანტურიშვილს, რომელმაც ბურთი მშვენივრად "მოჭრა", მაგრამ როინ კვასხვაძემ დიდებული რეაქციის ხარჯზე აარიდა გოლი "ტორპედოს".

მატჩის ბოლო წუთებში "დინამო" მოგებას ცდილობდა. პაპუნაშვილსა და ჯაბა ჯიღაურს შეეძლოთ კიდეც გატანა, მაგრამ დინამოელთა სურვილი რეალობად ვერ იქცა. აღსანიშნავია საქართველოს ნაკრების მეკარე კვასხვაძის ძალიან საიმედო გარჯა.

მატჩის შემდეგ
იურაი იარაბეკი (დინამო): "ჩვენ მიზნად სამი ქულის მოპოვება გვქონდა დასახული. განმეორდა წინა მატჩების სცენარი - სათამაშო უპირატესობა გვქონდა, მაგრამ მომენტების რეალიზება ვერ მოვახერხეთ".

კახა ჩხეტიანი (ტორპედო): "ვიცოდით, რომ რთული თამაში გველოდა. ვეცადეთ, "დინამოსთვის" შეგვეზღუდა სივრცეები, მათი მცველებისა და მეკარისთვის არ მიგვეცა ბურთის თავისუფლად ამოტანის საშუალება... ჩემი აზრით, ფრე ლოგიკური შედეგი იყო. 25 ოქტომბერს სამი დღით იხსნება სატრანსფერო ფანჯარა და თუ ფეხბურთელები დავიმატეთ, ყველა გაიგებთ. მანამდე ფონს ამ კონტინგენტით უნდა გავიდეთ. მადლობა ჩვენს ქომაგებს. ისინი წამითაც არ გაჩერებულან".

საქართველოს ჩემპიონატი. უმაღლესი ლიგა. VII ტური. თეთრი ჯგუფი
25.09. თბილისი. დინამო არენა
დინამო (თბ)-ტორპედო 0:0
დინამო: ლომაია, ველევი, რენე ფერეირა, ამისულაშვილი, უ. ლობჟანიძე, ცინცაძე, კიტეიშვილი (58. პარუნაშვილი), ჭანტურიშვილი, პაპუნაშვილი, ჯიღაური, დვალიშვილი (83. ლილუაშვილი).
სათადარიგოები: სკრიბე, თევზაძე, ხუბუტია, ჭელიძე, ზარია
მწვრთნელი: იურაი იარაბეკი
ტორპედო: კვასხვაძე, ტაბატაძე, გურული, ჭიჭინაძე, ქიმაძე, ფალავანდიშვილი, მამასახლისი, ბაბუნაშვილი (75. საღრიშვილი), დოლიძე, ტუღუში (86. ენდელაძე), კვერნაძე (70. კაპანაძე).
სათადარიგოები: ქვილითაია, წილოსანი, ნერგაძე, ბენაშვილი
მწვრთნელი: კახა ჩხეტიანი
გაფრთხილება: რენე ფერეირა (7), ქიმაძე (90)
არბიტრი: ა. ნონიკაშვილი.

VIII ტური. თეთრი ჯგუფი
1 ოქტომბერი
დინამო (თბ)-ჩიხურა
შუქურა-ტორპედო
ცხინვალი-გურია
ლოკომოტივი ისვენებს.

წითელი ჯგუფი
2 ოქტომბერი
საბურთალო-სიონი
სამტრედია-დინამო (ბთ)
კოლხეთი-ზუგდიდი
დილა ისვენებს

ბომბარდირები
ს. ლობჟანიძე (ჩიხურა) 6
თ. შონია (დინამო ბთ) 5
ჯ. დვალი (ცხინვალი) 4
ბ. ზივზივაძე (სამტრედია) 4.

(იბეჭდება მცირე ცვლილებით)
ყოველდღიური სპორტული გაზეთი "ლელო"