საქართველოს ეროვნული ნაკრები ევრო 2012-ის შესარჩევ ციკლს საბერძნეთთან დაპირისპირებით დაასრულებს. შეხვედრა 11 ოქტომბერს თბილისში, მიხეილ მესხის სახელობის სტადიონზე გაიმართება.გუშინ ტექნიკურ ცენტრ "ბასაში" ეროვნული გუნდის შეკრება დაიწყო. ნაკრების მთავარი მწვრთნელი თემურ ქეცბაია მედიას შეხვდა და მზადების გეგმებზე ელაპარაკა.
- ეს ციკლის ბოლო მატჩია და მოთამაშეთა უმეტესობა შეკრებაზე ხვალ საღამოს გამოცხადდება, ასე რომ, მოსამზადებლად დიდი დრო გვაქვს და ყველაფერი უნდა გავაკეთოთ, შესარჩევი ეტაპი მოგებით რომ დავასრულოთ. სამწუხაროდ, არის გარკვეული პრობლემები, დაგვაკლდებიან ტრავმირებულები, მაგრამ ეს ყოველთვის ხდება.
- ნაკრებში ირაკლი მაისურაძისა და
- დიახ, მიზეზი ისაა, რომ სანდრო კობახიძე დაშავდა და ვერ დაგვეხმარება. იმედია, ასეთ ცუდ ამბავს აღარ შევიტყობთ.
- დევდარიანი რატომ ვერ ჩამოდის, ისევ ფეხი სტკივა?
- სიმართლე გითხრათ, დავიღალე დევდარიანის ჩამოუსვლელობით. ათჯერ გამოვიძახე და არ გამოცხადებულა, ბოლო მომენტში უარს ამბობს და არც ვიცი, ეს რას მივაწერო. კობახიძისა და დევდარიანის ჩანაცვლება საქართველოში მოთამაშე ფეხბურთელებით მსურდა, მაისურაძე უკვე გამოცხადდა, გელაშვილს კი მცირე ტრავმა აქვს.
- ბოლო მატჩებში "მეტალურგის" თავდამსხმელი დიმიტრი ტატანაშვილი შედეგიანად ათამაშდა. მის მიწვევაზეც ხომ არ ფიქრობთ?
- თუ ასე განაგრძო, დავინტერესდები.
- თქვენი აზრით, ნაკრებმა საკუთარი შესაძლებლობები გამოავლინა?
- თუ წინა ციკლს შევადარებთ, უკეთესობა არის, შედეგი გაუმჯობესდა და მთლიანობაში ციკლი წარმატებული გამოდგა. მაგრამ მეტი ქულის მოპოვება შეგვეძლო. გული იმაზე მწყდება, რომ ლატვიელებთან იქაც და აქაც საუკეთესო თამაშები ვაჩვენეთ, განსაკუთრებით თბილისში და ამ მატჩში მაინც მხოლოდ ქულას დავჯერდით. სამწუხაროდ, ფეხბურთში ასეც ხდება, შეიძლება, კარში 44-ჯერ დაარტყა და ვერ გაიტანო, მეტოქემ კი ერთი დარტყმით მოგიგოს. გასვლის შანსს მხოლოდ მათთან მოგება გვინარჩუნებდა, მაგრამ იღბალიც არ გვწყალობდა.
- შევიტყვეთ, რომ აკაკი გოგია საქართველოს ნაკრებში თამაშზე დაითანხმეთ, რაც ადრე დაუჯერებელი ჩანდა.
- ნამდვილად გვსურს, რომ ნაკრებში ითამაშოს, მაგრამ ჯერ პატარა პრობლემებია მოსაგვარებელი.
- ნოემბრის ამხანაგურ შეხვედრაში გამოიძახებთ?
- მშობლებს ველაპარაკე და კარგი იქნება, ნოემბერში თუ ჩამოვა, შემოდგომაზე დახმარება ახალგაზრდულ ნაკრებსაც სჭირდება.
- პრობლემა მოქალაქეობის შეცვლაა?
- ეს ყველაზე ადვილად მოსაგვარებელი პრობლემაა.
- მოთამაშეებს ახალგაზრდული ნაკრებიდანაც დაიმატებთ?
- ვნახოთ, შვეიცარიასთან 7 ოქტომბერს ვინ როგორ ითამაშებს.
- ითქვა, რომ შემდეგი ციკლისთვის ვეტერანებს აღარ გამოიძახებთ.
- ამაზე ლაპარაკი არასერიოზულად მიმაჩნია. თუ რამე გადაწყდება, ახალი ციკლის დაწყებამდე, წინასწარ გაცნობებთ,ახლა კი ბერძნებთან მატჩისთვის ვემზადებით.
- საბერძნეთს გასვლის შანსი აქვს და მოტივირებულია, ჩვენს მოთამაშეებს აქვთ კი მოტივაცია?
- ბერძნების მოტივაცია ჩვენ არ გვაინტერესებს, გვჭირდება თუ არა ქულები, მოგება საქართველოსაც არ აწყენს. ბოლო ორ წელიწადში 15 მატჩიდან 10 სტუმრად გავმართეთ, ჩვენი მაყურებელი თამაშს და მოგებას მონატრებულია და ხალხის გასახარებლად ყველაფერი უნდა გავაკეთოთ.
- მჭედლიძის დაბრუნებაზე რას გვეტყვით?
- ლევანი ყვითლების გამო შვეიცარიის ახალგაზრდულ ნაკრებთან ვერ ითამაშებს და მოვიწვიეთ. თუმცა 7 ოქტომბრის მატჩის შემდეგ მისი გამოაძახება ისედაც გვსურდა.
- გადაწყდა, ვის ვეთამაშებით ნოემბერში?
- არ ვიყავით დარწმუნებული, რომ ნოემბერში ამხანაგურ მატჩის გამართვა მოგვიწევდა. ჩვენ კი იმ დონის ნაკრები არ ვართ, საინტერესო გუნდები უცებ დავითანხმოთ. ამიტომ ახლა მოლაპარაკებები ჭირს.
- უდავოა, მსოფლიოს ჩემპიონატის შესარჩევ ციკლში კარგი კალენდარი გვაქვს.
- მართლაც კარგი კალენდარია, პირველი მატჩი საქართველოში გვაქვს, მაგრამ მხოლოდ კარგი კალენდარი რას გვარგებს, როდესაც უძლიერესი მეტოქეები შეგვხვდნენ. თუმცა ყველასთან უნდა ვიბრძოლოთ, ძლიერ ნაკრებებთან საკუთარი შესაძლებლობების გამოცდა ფეხბურთელებისთვისაც სასურველი იქნება.
ყველაზე ძნელი ბელარუსების დათანხმება აღმოჩნდა, რა არ მოიმიზეზეს, ამ დროისთვის მოედანი არ გვივარგაო, ჩვენთან სეზონი არ იქნება დაწყებული და ნაკრებიც მოუმზადებელი იქნებაო, მაგრამ ბოლოს კალენდრის წარმოდგენილ ვარიანტს დათანხმდნენ.
- საბერძნეთთან თქვენი ანგარიშები გაქვთ?
- ჩემს ანგარიშებზე ლაპარაკი არ მსურს. ციკლი სასურველ ნოტზე უნდა დავასრულოთ. 10 ქულა გვაქვს და, იმედია, კიდევ დავამატებთ.
- საქართველოს ჩემპიონატს თუ ადევნებთ თვალს? წლეულს ჩემპიონატი საინტერესოდ მიმდინარეობს.
- თვალს, ცხადია, ვადევნებ, მაგრამ ლეგიონერებს უფრო ვაკვირდები, რადგან ნაკრების წევრთა 90 პროცენტი უცხოეთში თამაშობს.
ჩემი აზრით, 12-გუნდიან ჩემპიონატზე გადასვლა სწორი ნაბიჯი იყო. რაც მეტი გუნდი იქნება რეგიონებში, მეტი ფეხბურთელიც გამოჩნდება. სამწუხაროდ, ისეთი დონის ჩემპიონატი არ გვაქვს, სასურველი ფეხბურთელი უცებ რომ შევარჩიოთ. მაგრამ დადგა დრო, ამ მიმართულებით რამე მოვიფიქროთ. მხოლოდ ასეთ შემთხვევაში გავზრდით იმ მოთამაშეებს, რომლებიც ნაკრებს სჭირდება.
- შეკრებაზე სოსო ჭედია დაგეხმარებათ?
- სოსო ახალგაზრდული ნაკრების მატჩის შემდეგ შემოგვიერთდება.
- ბოლო მატჩებში ნაკრები შეტევაზე იყო ორიენტირებული. ბერძნებთანაც ასე იქნება?
- ამაზე ლაპარაკი ჯერ არ მსურს, თუმცა გეთანხმებით, ბოლო მატჩებში უფრო შემტევი ფეხბურთი ვაჩვენეთ - პოლონეთთან, ლატვიასთან. სამწუხაროდ, არ გაგვიმართლა. ლატვიასთან შოკის შემდეგ, მალტასთან სასურველ შედეგს იმიტომაც ვერ მივაღწიეთ, რომ ბიჭები სტრესიდან ვერ გამოვიდნენ.
- ყენიამ ორჯერადი ვარჯიშები დაიწყო - ნოემბერში მასაც გამოიძახებთ?
- "შალკეში" ბერძენი მეგობარი მყავს, რომელიც ამბობს, რომ ყენია გუნდში არ უნახავს და სად ვარჯიშობს, წარმოდგენა არ მაქვს.
- ამბობენ, რომ ლევანი "შალკედან" წამოვიდა.
- მე რაც ვიცი, გითხარით. სამწუხაროა, ამ დონის მოთამაშე რომ გამოგვაკლდა. დარწმუნებული ვარ, ყენია რომ გვყოლოდა, გუნდი უკეთ იასპარეზებდა.
ყოველდღიური სპორტული გაზეთი "ლელო"
