მოლდოველებთან შეხვედრის შემდეგ გამართულ პრესკონფერენციაზე თემურ ქეცბაიამ თქვა: "დღევანდელ მატჩში საუკეთესო სანდრო კობახიძე იყო, თუმცა კარგად დაწყებული ცუდად დაასრულა და მეტოქის პროვოკაციას წამოეგო. პროფესიონალი ფეხბურთელისთვის ასეთი არასერიოზულობა არ შეიძლება".24 წლის კობახიძე მართლაც საუკეთესო იყო, გოლიც გაიტანა და მოლდოველებს გამუდმებით თავსატეხს უჩენდა, ვიდრე არბიტრმა მოედნიდან არ გააძევა.
კიევის "არსენალი", ტრავმა, საკლუბო მომავალი და ნაკრები - სანდროს ამ თემებზე ველაპარაკეთ.
- ნაკრებში ბევრი მატჩი არ დაგეთვლება, მოლდოვასთან კი გამოცდილი წევრივით იყავი, ქეცბაიამ საუკეთესოდაც დაგასახელა.
- მე უფრო ჩემს თანაგუნდელებს გამოვყოფ, რომლებიც
- ყველაფერი კარგი იყო, გაძევების გარდა. არადა, შეიძლებოდა, თამაში უპრობლემოდ დაგესრულებინა.
- ემოციებს ავყევი და ისეთი უსიამოვნების მონაწილე გავხდი, მოთამაშეს რომ არ ეპატიება. ვწუხვარ და ძალიან უხერხულად ვგრძნობ თავს.
- როგორც ვიცი, ეს წითელი ბარათი ოფიციალურ შეხვედრებზე არ იმოქმედებს.
- ეგრეა და ეს მახარებს. ისე, ინგლისის პრემიერლიგაში, შესაძლოა, მსაჯს ყვითელი ბარათიც კი არ ეჩვენებინა. მაგრამ, ვიმეორებ, დამნაშავე მე ვარ და არა მსაჯი, ნაკრებში თამაში დიდი პატივია და თავშეკავება, ემოციების მოთოკვა მმართებდა, მაგრამ...
- უკრაინაში თავიდან არ გწყალობდნენ, მაგრამ კიევის "არსენალში" გენდობიან და გათამაშებენ. აშკარაა, უფრო თავდაჯერებული ხარ, რაც ნაკრებშიც დაგეტყო და კლუბშიც.
- "არსენალში" ლეონიდ კუჩუკი დაგვინიშნეს, რომელიც ტირასპოლის "შერიფს" ავარჯიშებდა. სერიოზული სპეციალისტია და ძლიერი გუნდი ჩამოყალიბდა. პირველად მომიხდა უკრაინაში იმ მწვრთნელთან მუშაობა, რომელიც მენდობა. ემოციური ვარ და მწვრთნელის დამოკიდებულება ჩემზე განსაკუთრებულად მოქმედებს. კუჩუკი კარგი ფსიქოლოგია, მისმა ნდობამ და სათამაშო პრაქტიკამ კი მართლაც თავდაჯერებული გამხადა. ცხადია, საკუთარ თავზეც ვმუშაობდი.
ეგაა, საქართველო-საბერძნეთის მატჩამდე ერთი კვირით ადრე კუნთი დამეჭიმა და ამ შეხვედრასთან ერთად უკრაინის ჩემპიონატის ერთი ტურიც გამიცდა. სანამ ტრავმა მოვირჩინე და ფორმა აღვიდგინე, ძირითადში პოზიციები შემერყა. თუმცა ბოლო ოთხი ტურიდან ორში ძირითადში მათამაშეს, ორჯერაც შეცვლაზე და მიმაჩნია, რომ ეს არის ჩემი საუკეთესო უკრაინული სეზონი. ასე მგონია, რომ ჩემი გუნდი და ადგილი ვიპოვე.
- "არსენალთან" იჯარა როდის გიმთავრდება?
- იანვარში, მაგრამ წასვლა არ მინდა.
- კლუბის მხარდაჭერას რომ არ გრძნობდე, ამას არ იტყოდი.
- ასეც არის, ჯერჯერობით შეთანხმება იჯარაზეა, მერე კი ვნახოთ. "არსენალში" თავს მშვენივრად ვგრძნობ და მწვრთნელიც დაინტერესებულია, საიჯარო ვადის შემდეგ "არსენალის" საკუთრება გავხდე, მათი სურვილი კი ჩემსას ემთხვევა. მაგრამ ეს ამბავი ჯერ კიდევ გადასაწყვეტია.
- ქართველებს უკრაინაში ისე არსად გაუხარიათ, როგორც "არსენალში" - შალვა აფხაზავა, გელა შეყილაძე, ლაშა ჯაკობია, ჯაბა კანკავა და გიორგი დემეტრაძე მისი ლიდერები იყვნენ.
- შეიძლება ითქვას, იღბლიანი, საჩვენო კლუბია. უკრაინელებისგან განსხვავებულ და ჩვენთვის უფრო მისაღები სტილის ფეხბურთსაც თამაშობენ.
- რა არის წლეულს "არსენალის" მიზანი?
- ევროპის ლიგაზე თამაში, რისთვისაც ოთხეულში მოხვედრაა საჭირო. კარგი გუნდი გვყავს და ეს შესაძლებელი მგონია, თუმცა ძლიერი კონკურენტები გვყავს.
- "არსენალშიც", ისე, როგორც ნაკრებში, მარცხენა შემტევ ნახევარმცველად გათამაშებენ?
- ხან მარცხენა ფლანგზე მაყენებენ, ხანაც - მარჯვნივ. გუნდი 4-3-3 სქემით თამაშობს და სადაც მწვრთნელს ვჭირდები, იქ მათამაშებს.
- რა ხეირია ცაციას მარჯვენა ფლანგზე დაყენებაში, ასე ხომ ბურთის ჩაწოდების თუ მარცხენა ფეხზე გადატანისას შეტევა ყოვნდება?
- დღეს ასე ბევრ გუნდშია და ამას თავისი პლუსები აქვს. მაგალითად, ამ დროს შუაში ხშირად შედიხარ და უფრო მოხერხებულად უტევ. მაგრამ მაინც მარცხნივ მირჩევნია, რადგან ბავშვობიდან სულ ამ პოზიციაზე ვთამაშობ.
- უკრაინაში მოთამაშე ქართველებზე რას იტყვი?
- უმრავლესობა თავისი კლუბის ლიდერია, რაც დასაფასებელი ამბავია, რადგან უკრაინაში სამი წელია, ვთამაშობ და ჩემპიონატის დონე ძალიან ამაღლდა. შეუძლებელია, იქ ფეხბურთელი არ გაიზრადოს, ყოველ შემთხვევაში, გარკვეულ მინიმუმს მაინც დააკმაყოფილებს. სამწუხაროდ, პრემიერლიგაში არც ისე ბევრი ქართველია, მაგრამ მათ პატივს სცემენ. მაგალითად, კანკავა და ლობჟანიძე "კრივბასს" კარგად შეეწყვნენ და მათ გარეშე ეს გუნდი წარმოუდგენელია. თარგამაძე კი "ოლექსანდრიას" ლიდერი და მიმდინარე ჩემპიონატის ერთ-ერთი აღმოჩენაა. წლებია, "ტავრიაში" თამაშობს გიგიაძე, რომელიც ამ კლუბის სიმბოლო გახდა.
ყოველდღიური სპორტული გაზეთი "ლელო"
