3 სექტემბერს მინსკში შეკრება დაიწყო ბელორუსის ეროვნულმა ნაკრებმა, რომელიც 2014 წლის მსოფლიოს ჩემპიონატის შესარჩევ ციკლს 7 სექტემბერს თბილისში საქართველოსთან შეხვედრით გახსნის, 11-ში კი პარიზში საფრანგეთს ეწვევა.ბელორუსების მთავარმა მწვრთნელმა გიორგი კონდრატიევმა შეკრებაზე შემდეგი ფეხბურთელები გამოიძახა:
მეკარეები: იური ჟევნოვი ("ზენიტი, რუსეთი), სერგეი ვერემკო ("კრილია სოვეტოვი", რუსეთი), ალექსანდრ გუტორი (ბატე);
მცველები: დენის პოლიაკოვი, მაქსიმ ბორდაჩევი, არტომ რადკოვი (ყველა - ბატე), დმიტრი ვერხოვცევი ("კრილია სოვეტოვი"), მაქსიმ ჟავრენჩეკი ("ყუბანი", რუსეთი), ალექსანდრ მარტინოვიჩი ("კრასნოდარი", რუსეთი), იგორ შიტოვი ("დინამო", მოსკოვი, რუსეთი, ბატე), ვიტალი ტრუბილო ("დინამო", მინსკი),
ნახევარმცველები: სერგეი ბალანოვიჩი, ანდრეი ხაჩატურიანი ("შახტიორი", სოლიგორსკი), სტანისლავ დრაგუნი ("დინამო", მინსკი), პაველ ნეხაიჩიკი ("დინამო", მოსკოვი, რუსეთი), ალექსანდრ კულჩი ("სიბირი", რუსეთი), იან ტიგორევი ("ლოკომოტივი", მოსკოვი, რუსეთი), ანტონ პუტილო ("ფრაიბურგი", გერმანია), სერგეი კისლიაკი ("კრასნოდარი"), რენან ბრესანი (ბატე);
თავდამსხმელები: სერგეი კორნილენკო ("კრილია სოვეტოვი"), დმიტრი მოზოლევსკი, ვიტალი როდიონოვი (ორივე - ბატე).
15 აგვისტოს სომხეთთან გამართული შეხვედრის შემდეგ კონდრატიევმა აღარ მიიწვია ლონდონის ოლიმპიადაზე გამორჩეული ნახევარმცველი დმიტრი ბაგა (ბატე), ნახევარმცველი ოლეგ ვერეტილო ("დინამო", მინსკი) და თავდამსხმელი დმიტრი კომაროვსკი ("შახტიორი", სოლიგორსკი).
გუნდში არც ყველაზე ცნობილი ბელორუსი ალექსანდრ გლებია - ის ტრავმირებულია.
სამაგიეროდ, ჩვენი მეტოქის რიგებში დააბრუნეს ბორისოვოს ბატეს თავდამსხმელი, ჩინებულ ფორმაში მყოფი 28 წლის ვიტალი როდიონოვი, რომელმაც ჩემპიონთა ლიგის საკვალიფიკაციო ეტაპისა და პლეი ოფის 6 შეხვედრაში 4 გოლი და 1 საგოლე გადაცემა მიითვალა.
ბელორუსულმა "პრესბოლმა" კონდრატიევის საუბარი გამოაქვეყნა:
"მიმაჩნია, რომ თითოეულ შეხვედრაში გუნდი მოგებისთვის უნდა განეწყოს. ამიტომ ამ ორ შეხვედრაში 6 ქულა დამაკმაყოფილებს.
ორჯერ მხოლოდ 4 სექტემბერს ვივარჯიშებთ, დანარჩენ დღეებში - ერთხელ. გლების ძალიან მეიმედებოდა, რადგან მშვენივრად ათამაშდა.
მის ნაცვლად კისლიაკი ავიყვანე... მუხლი ასტკივდა და აღსადგენად ერთი კვირა სჭირდება. იმედია, ნაკრებს საშინაო შეხვედრებში დაეხმარება.
...რა თქმა უნდა, სამ ფრონტზე თამაში ძნელია, მაგრამ არა მგონია, რომ ბატეს ფეხბურთელებს სირთულეები შეექმნათ. ბიჭები პროფესიონალები არიან, ნაკრები კი დადებით ემოციებს აღვიძებს. მათ ფიზიკურ მდგომარეობას დავაკვირდებით. ჩემთვის მთავარია, მოედანზე გამოვიდნენ და ბოლომდე დაიხარჯონ.
...ჯერ არ გადამიწყვეტია, კარში ვერემკო ჩადგება თუ ჟევნოვი. გადაწყვეტილებას მატჩის დღეს მივიღებ... არ მითქვამს, რომ ჟევნოვს მხოლოდ პატივისცემის გამო ვათამაშებ. იყო შეთანხმება, რომ ერევანში ის და ვერემკო თითო ტაიმს ითამაშებდნენ. არ არის საჭირო ჩემს ოთახში შავი კატის ძიება - ის იქ არ არის და ბიჭებთანაც კარგი ურთიერთობა მაქვს.
იგივეს ვიტყვი როდიონოვსა და კორნილენკოზე. ისინი ერთი ამპლუის მოთამაშეები არიან. ჯერ ფსონს კორნილენკოზე ვაკეთებ, მაგრამ როდიონოვზე ცუდს ვერაფერს ვიტყვი.
...ბერნდ შტანგე კაპიტნის არჩევნებს ატარებდა, მაგრამ ჩემთან გუნდში სამკლაურს მე გადავცემ. კანდიდატთა ოთხკაციანი სია მაქვს და საბოლოო გადაწყვეტილებას მატჩებამდე გეტყვით. რა თქმა უნდა, უპირობო ლიდერი გუნდს არ ჰყავს და სიაც ამიტომ შედგა.
...ქართველების ყველა ფეხბურთელზე ინფორმაციას ვფლობთ. ძლიერი დაცვა ჰყავთ. 190 სმ-ზე ნაკლები არც ერთი არ არის და სტანდარტებზე სიფრთხილე გვჭირდება.
ნახევარდაცვა ტექნიკურია. ორ ტანდაბალ ფეხბურთელს გამოვარჩევ - ჯანოსა და თარგამაძეს.
გამორჩეული ვარსკვლავები არ ჰყავთ, მაგრამ ორგანიზებული გუნდია და გამოცდილი მწვრთნელი ხელმძღვანელობს. ნაკრების გაახალგაზრდავების მიუხედავად, ქართველები არ დასუსტებულან.
მათი თამაშები გადავიღეთ, გავაანალიზეთ და შემიძლია ვთქვა, რომ მეტოქეს დეტალურად ვიცნობთ. თბილისში თამაშის ორი გეგმა მქონდა, მაგრამ გლების ტრავმამ მხოლოდ ერთის იმედად დაგვტოვა.
...საქართველოში ჩვენთვის უცხო კლიმატია და უდიდესი ენერგიის გაღება დაგვჭირდება. ამიტომ ყველაფერი ჩვენს მომზადებაზე იქნება დამოკიდებული - მატჩისთვის საუკეთესო კონდიციებში უნდა ვიყოთ. თუ ამაში მოვიკოჭლებთ, ძალიან გაგვიჭირდება.
ქართველების თამაშის სტილი ოდნავ თუ შეიცვალა. მათ ყოველთვის უყვარდათ ბურთის "თრევა". ახლა ევროპელებისგან ცოტა რამ ისწავლეს და ხშირად იყენებენ გრძელ გადაცემებს. იმიტომ, რომ ბევრი ძლიერ ჩემპიონატში გამოდის და მათი აზროვნება კარგად შეიცვალა.
...თბილისში ბევრჯერ მითამაშია და გოლი ერთხელაც არ გამიტანია. მაშინდელი "დინამო" ძალიან ძლიერი გუნდი იყო. თუ არ მეშლება, ერთხელაც არ მოგვიგია (კონდრატიევს დაავიწყდა, მინსკის "დინამომ" თბილისში 1985 წელს ჩემპიონატის პირველ შეხვედრაში 2:1 გაიმარჯვა - რედ.).
ახლა დრო შეიცვალა, გასვლაზე თამაში ძნელია, მაგრამ ქართველ ახალგაზრდებს უფრო გაუჭირდებათ, რადგან მაყურებლის უზარმაზარი ზეწოლის ქვეშ ითამაშებენ".
ყოველდღიური სპორტული გაზეთი "ლელო"
ასევე იხილეთ:
მეტოქე: რეპორტაჟი ბელორუსის ნაკრების პირველი ვარჯიშიდან
თემურ ქეცბაია: ჯერ ბელორუსთან თამაშზე ვიფიქროთ და მერე ესპანეთზე
ინფორმაცია ბელორუსსა და ესპანეთთან მატჩების ბილეთებზე
