საქართველოს ეროვნულმა ნაკრებმა მსოფლიოს 2014 წლის ჩემპიონატის შესარჩევი ციკლი გამარჯვებით დაიწყო. 7 სექტემბერს, ბორის პაიჭაძის სახელობის ეროვნულ სტადიონზე თემურ ქეცბაიას გაწვრთნილმა გუნდმა ბელორუსის ნაკრებს უმასპინძლა და ანგარიშით 1:0 დაამარცხა.
ერთადერთი გოლი მატჩის 52-ე წუთზე თორნიკე ოქრიაშვილმა გაიტანა.
შეხვედრა გუნდებმა დაბალ ტემპში დაიწყეს. მასპინძლები შეტევის განხორციელებას ძირითადად მარცხენა ფრთიდან ეშურებოდნენ, თუმცა გრიგალავა-კანკავა-ოქრიაშვილი-ანანიძის კომბინაცია ბელორუსთა კართან რეალურ ხიფათს ვერ ქმნიდა. შედეგად, საქართველოს ნაკრების ერთადერთი გამოკვეთილი ფორვარდი ლევან მჭედლიძე მეტწილად უმოქმედოდ რჩებოდა.
სამაგიეროდ, ნელ-ნელა ფხა გამოაჩინეს სტუმრებმა და რომ არა გიორგი ლორიას ბრწყინვალე
საერთოდაც, თბილისის "დინამოს" გოლკიპერმა ბრწყინვალე შეხვედრა ჩაატარა და საქართველოს ნაკრების მიერ მოპოვებულ 3 ქულაში მისი წვლილი უმთავრესი თუ არა, ერთ-ერთი უმნიშვნელოვანესია. გიორგიმ ამის შემდეგაც რამდენიმე ძალიან სახიფათო ეპიზოდში ძალზე დამაჯერებლად ითამაშა.
საქართველოს ნაკრებს პირველ ტაიმში დასამახსოვრებელი თითზე ჩამოსათვლელი ეპიზოდები ჰქონდა - ჯერ იყო და ოქრიაშვილის თავით დაგდებული ბურთის ერთი შეხებით კარში გადაგზავნას გუნდის კაპიტანი ჯაბა კანკავა ცდილობდა ამაოდ, შემდეგ კი ჯანო ანანიძის გამჭოლი გადაცემით, ლევან მჭედლიძე შეეცადა ზუსტად დარტყმას.
პირველი, არცთუ შთამბეჭდავად ჩატარებული ტაიმის შემდეგ, თემურ ქეცბაიას შეგირდებმა მეორე ტაიმში აშკარად განსხვავებული თამაში გვიჩვენეს და შედეგმაც არ დააყოვნა.
მატჩის 52-ე წუთზე მეტოქის საჯარიმოში მყოფმა თორნიკე ოქრიაშვილმა ცრუმოძრაობით პირში ჩალა გამოვლებული ერთბაშად სამი ბელარუსი მცველი დატოვა (რომელთაგან ორი სულაც გაზონზე გაწვა) და მეკარისგან შორეულ კუთხეში აუღელვებლად შეაგორა ბურთი - 1:0.
გატანილი გოლის შემდეგ სტუმრებმა სცადეს გათანაბრება, თუმცა პირველი ტაიმისგან განსხვავებით, ისე მწვავედ ვეღარ უტევდნენ. საქართველოს ნაკრებმაც ნელ-ნელა უკან დაიხია და უფრო მეტად კარის უსაფრთხოებაზე დაიწყო ფიქრი, რამაც გეორგი კონდრატიევის შეგირდებს სივრცე შეუზღუდა.
ბელორუსებს მეორე ტაიმში ერთადერთი მეტნაკლებად კარგი მომენტი 86-ე წუთზე ჰქონდათ, თუმცა "ცხრიანში" წასული ბურთი ლორიამ ბრწყინვალე ნახტომში კუთხურზე მოიგერია.
ამრიგად, საქართველოს ნაკრებმა შესარჩევი ციკლი ძალზე მნიშვნელოვანი გამარჯვებით დაიწყო. შეგახსენებთ, ურთულეს ჯგუფში ჩვენი მეტოქეები, ბელორუსთა გარდა, ესპანეთის, საფრანგეთისა და ფინეთის ეროვნული გუნდებია.
მომდევნო შეხვედრას თემურ ქეცბაიას შეგირდები 11 სექტემბერს მსოფლიოსა და ევროპის ჩემპიონებთან ისევ "დინამო არენაზე" გამართავენ.
ასევე იხილეთ:
თემურ ქეცბაია: მეამაყება, რომ ამ ფეხბურთელების მწვრთნელი ვარ
