საქართველოს 17-წლამდელთა ნაკრებს გიორგი ნემსაძე გაწვრთნის

დღეს, 4 იანვარს, საქართველოს ფეხბურთის ფედერაციის ტექნიკურ ცენტრ "ბასაზე" 17-წლამდე ნაკრების შეკრება დაიწყო. საქართველოს ფეხბურთის ფედერაციის ვიცე-პრეზიდენტმა ალექსანდრე იაშვილმა ფეხბურთელებს ახალი მთავარი მწვრთნელი წარუდგინა - ამიერიდან 17-წლამდე ნაკრებს საქართველოს ეროვნული ნაკრების ყოფილი კაპიტანი, გიორგი ნემსაძე უხელმძღვანელებს, მისი თანაშემწე კი გიორგი ხიზანიშვილი იქნება.

ცვლილებაა სფფ-ის სტრუქტურაშიც - ეროვნული ნაკრების გარდა, ალექსანდრე იაშვილი ამიერიდან ასაკობრივ ნაკრებებსაც უხელმძღვანელებს.

"ჩემთვის დიდი პატივია, წარმოგიდგინოთ ახალი მთავარი მწვრთნელი - გიორგი ნემსაძე. მას ქართულ ფეხბურთში დიდი წარდგენა არ სჭირდება და დიდი იმედი მაქვს, რომ ერთად წარმატებული წელი გველოდება. ყოველთვის იცოდეთ და გჯეროდეთ ერთი: რა კარიერაც არ უნდა გქონდეთ, სადაც არ უნდა ითამაშოთ, რასაც არ უნდა მიაღწიოთ ცხოვრებაში, ვერასდროს ვერაფერი გადასწონის იმას, რასაც ეროვნული ნაკრების მაისურის ჩაცმა ჰქვია. ნაკრებში ღირსეული თამაში და ქვეყნისა და გულშემატკივრებისთვის ბრძოლა არის ყველაზე დიდი ჯილდო სპორტსმენისთვის" - ამ სიტყვებით მიმართა ალექსანდრე იაშვილმა 17-წლამდე ნაკრების ფეხბურთელებს.

სფფ-ის ვიცე-პრეზიდენტმა იქვე მადლობა გადაუხადა ნაკრების ყოფილ მწვრთნელ გურამ ასპინძელაშვილს და წარმატებები უსურვა მას კარიერაში.

საქართველოს 17-წლამდე ნაკრები დღეიდან 10 დღის განმავლობაში შეკრებას "ბასაზე" გაივლის, 14 იანვარს კი მინსკში გაემგზავრება, სადაც "განვითარების თასზე" მიიღებს მონაწილეობას.

ამჟამად გიორგი ნემსაძის ხელმძღვანელობით 30 ფეხბურთელი ვარჯიშობს...

მეკარეები: აკაკი თვალოძე (დინამო თბ), ლუკა ხარშილაძე (ლოკომოტივი), მამუკა ბახტაძე (საბურთალო);
მცველები: სანდრო მელიქიშვილი (საბურთალო), ირაკლი წაქაძე (ტორპედო), ზურაბ ბაქრაძე (ლოკომოტივი), ივა გელაშვილი (სპარტა, ჩეხეთი), აკაკი წაქაძე (დინამო თბ), გიორგი აბზიანიძე (სფფ აკადემია), ცოტნე კაპანაძე (საბურთალო), ირაკლი აზაროვი (დინამო თბ), ბექა ხარაიშვილი (საბურთალო);
ნახევარმცველები: ლუკა ჩაკვეტაძე (დინამო თბ), ცოტნე ჩოთალიშვილი (სფფ აკადემია), შალვა მაღალდაძე (დინამო თბ), ბექა აშორდია (სფფ აკადემია), ვახტანგ ჩარკვიანი (დინამო თბ), ანზორ მექვაბიშვილი (დინამო თბ), დავით ლორთქიფანიძე (ატალანტა, იტალია), ზურა დავითაშვილი (დინამო თბ), გიორგი ლომთაძე (დინამო თბ), საბა ჯინჭარაძე (შუქურა), ოთარ ფარულავა (ავაზა), ჯინო თუდები (დინამო თბ), ხვიჩა კვარაცხელია (დინამო თბ), ედიშერ უგრეხელიძე (ესენი, გერმანია);
თავდამსხმელები: გიორგი გულიაშვილი (სფფ აკადემია), გიორგი იაკობიძე (დინამო თბ), ელგუჯა ჯანგველაძე (დინამო თბ), ნიკა ქუთათელაძე (პსჟ, საფრანგეთი).

gff.ge